JEREMÍAS 38 - Quichua Imbabura 2016

Jeremiasta, yacuta tandachina jatun utujupi churashcamanda

1Matán shuti runapaj churi Sefatías shuti runapash, Pasur shuti runapaj churi Gedalías shuti runapash, Selemías shuti runapaj churi Jucal shuti runapash, Malquías shuti runapaj churi Pasur shuti runapashmi, tucui gentecunapaj ñaupajpi cashna nishpa Jeremías villajujtaca uyanajurca:

2“Mandaj Diosca, cashnami nirca: ‘Maijambash cai pueblopi saquirishpaca, jatun macanajuipi cashpa, yarjaihuan cashpa, jatun ungüihuan cashpapash huañungapachami. Ashtahuangarin caimanda llujshishpa, caldeo runacunapaj maquipi yaicugrishpaca, prezu apajpimi, na huañunga’ nircami.

3Mandaj Diosca, cashnatapashmi nirca: ‘Cai puebloca, Babilonia llactata jatun mandajpaj macanajuj runacunapaj maquipi churai tucungapachami. Paimi, cai pueblotaca mishashpa quichunga’ nircami” nishpami villajurca.

4Shina villajujta uyashpami cati mandajcunaca, jatun mandajtaca cashna ninajurca:

“Cai runaca, cunanda huañunapachami. Paica, chashna villashpami, cai pueblopi puchushca macanajunata ali yachaj runacunatapash, tucui gentecunatapash, na ali yuyaicunata cushpa ashtahuan manllachijun. Cai runaca, gentecunapaj ali causaitaca na munashpami, ashtahuangarin na alitalla rimajun” ninajurcami.

5Shina ninajujpimi, jatun mandaj Sedequías shuti runaca, cashna nirca:

“Jeremiasca cangunapaj maquipimi. Jatun mandaj cashpapash, ñucaca cangunata imata jarcaitapash na ushanichu” nircami.

6Shina nijpimi paicuna, Jeremiastaca, Hamelec shuti runapaj churi Malquías rurachishca yacuta tandachina jatun utujupi huascacunahuan urai cacharinajurca. Chai utujuca, prezuna huasi patiopimi carca. Chai jatun utujupi yacu na tiyashpapash, turu tiyajpimi, Jeremiasca pambarirca.

7Etiopía llactamanda Ebed-melec shuti eunuco runami, mandana huasipi jatun mandajpajta rurashpa causarca. Paimi, yacuta tandachina jatun utujupi Jeremiasta shitashcataca yacharca. Jatun mandajca, Benjamín shuti pungupimi, mandajcunahuan tandanajushca tiyajurca.

8Ebed-melec shuti runaca, mandana huasimanda llujshishpa rishpami, jatun mandajtaca cashna nijurca:

9“Ñucata jatun mandajlla. Can churashca mandajcunaca, profeta Jeremiasta, yacuta tandachina jatun utujupi shitachun mandashpaca, na alitami rurashca. Chai utujupica, yarjaimanda huañungami. Cai pueblopica, tandallapash na ashtahuan tiyanllu” nircami.

10Shina nijpimi jatun mandajca, Etiopía llactamanda Ebed-melec shuti runataca, cashna nishpa cacharca:

“Shina cashpaca, quimsa chunga runacunata caimanda pushashpa rilla. Paicunata pushashpaca, profeta Jeremiastaca, nara huañujpillata chai jatun utujumanda llujchichun mandagri” nircami.

11Shina nijpimi Ebed-melec shuti runaca, chai runacunata pushashpa, jatun mandajpaj huasipi culquita alichina ucumandaca, ashtahuan ucuman yaicurca. Chai ucumandami, mauca finducunata, liqui churajunacunata apashpa, Jeremías japichun huascacunapi huatashpa, chai jatun utujuman shitanajurca.

12Chashna rurashpami, Etiopía llactamanda Ebed-melec runaca, Jeremiastaca cashna nirca:

“Cunanga, chai mauca finducunatapash, liqui churajunacunatapash, cambaj ishcandi rigra ucupi churashpa, cabiatapash rigra ucupi huatari” nircami.

Jeremiasca, pai nishcashnami rurarca.

13Shinami Jeremiastaca, chai yacuta tandachina jatun utujumandaca huascacunahuan llujchinajurca. Chai jipaca Jeremiastaca, prezuna huasi patiopimi saquirca.

Jatun mandaj Sedequías runaca, Jeremiastami pacalla tapujushca

14Utujumanda llujchishca jipami, jatun mandaj Sedequías runaca, profeta Jeremiastaca, paipaj ñaupajman pushamuchun cacharca. Paica, Mandaj Diospaj huasiman yaicuna ishcaipaj cati pungu huashapimi tiyajurca. Chaipimi jatun mandajca, Jeremiastaca cashna nirca:

“Shuj tapuitami charini. Imatapash ama pacashpa, tucuita villahuangui” nircami.

15Shina nijpimi Jeremiasca, Sedequías runataca cashna nirca:

“Can tapushcata ñuca villajpica, ñucataca huañuchinguipachami. Ali yuyaita cujpipash, na uyahuanguichu” nircami.

16Shina nijpimi jatun mandaj Sedequías runaca, Jeremiastaca cashna nishpa, pacalla juramenturca:

“Ñucanchiman causaita caraj Mandaj Diosca, causajunmi. Candaca, napacha huañuchishachu. Canda huañuchingapa munanajuj chai runacunapaj maquipipash, napacha churashachu” nircami.

17Shina nijpimi Jeremiasca, Sedequías runataca cashna nijurca:

“Tucuita Mandaj, Israelcunapaj Taita Diosca, cashnami nin: ‘Babilonia llactata jatun mandaj churashca mandajcunapajman canllata ucha rishpa japi tucushpaca causanguimi. Shinallata, cai pueblopash, na rupachi tucungachu. Cambash, cambaj huasi ucupurapash causanguichimi.

18Ashtahuangarin, Babilonia llactata jatun mandaj churashca cati mandajcunapajman, canllata japi tucungapa na rijpica, cai puebloca caldeo runacunapaj maquipimi, churai tucunga. Paicunami, cai pueblotaca rupachinga. Cambash, paicunapaj maquimandaca, napacha pacajui ushanguichu’ ninmi” nijurcami.

19Shina nijpimi, jatun mandaj Sedequías runaca, Jeremiastaca cashna nirca:

“Caldeo runacunapajman chimbashca, Judá llacta runacunatami manllani. Paicunapaj maquipi ñucata churajpica, na cazushpa asishpami llaquichihuanga” nircami.

20Shina nijpimi Jeremiasca, cashna nijurca:

“Na paicunapaj maquipi churangachu. Cunanga, Mandaj Dios rimashcata ñuca villajta ali uyai. Chaita uyashpaca, na imapash tucunguichu, alimi causangui.

21Ashtahuangarin, canllata na paicunapaj maquipi japi tucujpica, cashna tucunatami Mandaj Diosca villahuarca:

22‘Judá llactata jatun mandajpaj huasipi puchushca tucui huarmicunami, Babilonia llactata jatun mandaj churashca cati mandajcunapajman llujchishpa apai tucunga. Chai huarmicunallatami, cashna ninajunga: Cambaj cumbacunallatami, candaca umachishpa mishashca. Paicunaca, cambaj chaquita turupi pambajshna saquishpaca, huashaman tigrarcallami ninajungami.

23Cambaj tucui huarmicunata, huahuacunatami, caldeo runacunaca caimanda llujchishpa apanga. Cambash, paicunapaj maquimandaca napacha pacajui ushanguichu. Ashtahuangarin, Babilonia llactata jatun mandajpaj maquipimi, prezu japi tucungui. Cai pueblopash, rupachi tucungami’ nishpami villahuarca” nijurcami.

24Shina villajpimi Sedequías runaca, Jeremiastaca cashna nijurca:

“Cai shimicunata, pipash na yachaj chayajpica na huañunguichu.

25Imashpapash ñuca canhuan parlanajushcata cati mandajcuna yachashpa, cambajman shamushpaca, cashnami tapunga: ¿Cunanga, imatapash ama pacashpa villai. Jatun mandajhuanga, ¿Imatata parlajurcangui, jatun mandajca candaca imata nirca? Chaita villajpica, na huañuchishunllu” ninajungami.

26Shina nijpica, cashna ningui: “Ama Jonatanbaj huasiman tigrachihuaichu. Chaipi huañungapaca, na munanichu nishpallami, jatun mandajtaca mañajurcani ningui” nijurcami.

27Chai jipaca, tucuilla cati mandajcuna shamushpami Jeremiastaca, imata parlanajushcata tapuchinajurca. Paicuna tapuchijpica, Jeremiasca jatun mandaj yachachishcashnami tigrachirca. Chaita tigrachijpimi, Jeremiastaca saquishpa rinajurca. Jatun mandajhuan Jeremías imata parlanajushcataca, pipash na yacharcachu.

28Shinami Jeremiasca, Jerusalén pueblota caldeo runacuna mishashpa quichungacaman, chai prezuna huasi patiopi tiyajurca. Jerusalenda mishashpa quichuna punllapica, chaipimi carca.