1Jatun tucushpa, machashpalla causaj Efraín ayllupaj miraicunalla, ¡aij imachari tucunga!
Paicunaca, ninan ushaita charishca cashpapash, anguyashca sisashnami canga.
Vinotalla ufiashpa causashpami, juyailla pambapi sisa chaquishcashna canguichi.
2Mandaj Diosca, ninan ushaita charij shinlli runatami cachamunga.
Paica, ninanda rundushpa, jatun acapanahuan tucuchinshnami canga.
Ninanda yacu jatarishpa tucui alpata fichanshnami tucuchinga.
3Machashpalla causaj, jariyashca Efraín ayllupaj miraicunataca, sarushpami tucuchinga.
4Juyailla pugru pambapi, juyailla sisa chaquishpa tucurishcashnami tucunguichi.
Rupai punllacunapi, punda fucushca higota, maijambash japishpa micushpa tucuchishcashnami tucuringuichi.
5Chai punllapica, tucuita Mandaj Diosca, Pai agllashca gentecunamanda puchushcacunapajca,
punchapamba coronashna, juyailla diademashnami canga.
6Aliguta ricushpa mandangapa tiyarijcunamambash, alitalla rurana yuyaitami cunga.
Pueblo pungupi ricushpa shayajcunamambash, ashtahuan ali ushaitami cunga.
7Shina cashpapash vinota, sidrata ufiashpami, pandarirca.
Sacerdotepash, profetapash, sidrahuan, vinohuan machashpami pandarinajurca.
Sidrata ufiashpa muspayashpami, Dios rimashcatapash pandashpa villanajurca.
Aliguta ricushpa mandanapipashmi pandarinajurca.
8Tucuilla mezacunapimi, shunguta tigrachishpa mapayachishca.
Maijan pushtupillapash, mapa illajca na tiyarcachu.
9Paicunaca cashnami ninajun: “Ali yachajunataca, ¿pimanshi yachachinga?
Na cashpaca, Diosmanda yachachinataca, ¿pimanshi yachachinga?
Chaitaca ¿Uchilla huahuacunamanllu yachachinga?
10Chai mandashcatallata, chai shimicunatallata,
chai yachajunatallata, quilcashcatallatami, cutin cutin yachachijun.
Ashataca shujmanda, ashataca caishujmandami yachachijun” ninajunmi.
11Cai gentecunamanga, rimaitapash na ushaj runashna, na rijsishca rimaipimi yachachinga.
12Paicunatami Diosca, cashna nirca: “Shaijushcacunaca, caipimi samana canguichi.
Caipi samaichi nijpipash, napacha uyajcunami canguichi” nircami.
13Mandaj Diosca, chai mandashcatallata, chai shimicunatallata,
chai yachajunatallata, chai quilcashcatallatami, cutin cutin yachachijun.
Ashataca shujmanda, ashataca caishujmandami yachachijun.
Paicuna urmashpa, llaquita apashpa, prezu apai tucushpa ringacamanmi, chashna yachachijurcalla.
Jerusalenbi causajcunata shinlli rimashcamanda14Jerusalenbi causajcunata na ali mandaj runacuna,
Mandaj Dios rimashcata uyaichiyari.
15Cangunaca, cashnami ninajurcanguichi:
“Ñucanchica, huañuitapash na huañushunllu,
Seolhuambash, napacha rishunllu.
Ninanda huaira jatarishpa shamushpapash, ñucanchitaca na llaquichingachu.
Ñucanchica, llullashpami quishpirishun.
Umachishpami, imatapash mishashun” nircanguichimi.
16Shinamandami Mandaj Jatun Diosca, cashna nin:
“Sion pueblopica Ñuca agllashca, juyailla, shinlli, pipash na cuyuchi ushanalla rumitami, huasichishpa callarina ucuman churarcani.
Chai rumita yariajlla causaj runaca, imatapash na manllangachu.
17Ñucami, aliguta ricushpa mandanataca, aliguta yachachisha.
Alitalla ruranataca, aligutapachami yachachisha” ninmi.
Canguna llullashpa pacajunataca, rundumi tucuchinga.
Canguna pacajunataca, yacumi apanga.
18Ñucanchica na huañushunllu ninajushcapash, yangapimi saquiringa.
Seolmanga napacha rishunllu ninajushcapash, na pactangachu.
Ninan shinlli huaira shamushpami, cangunataca tucuillata tucuchinga.
19Chai shinlli huaira yali callarishpami, cangunataca apanga.
Tutandi, punllandimi ninanda huairajunga.
Chaita uyashpami, imamanda chashnapacha cajta na yachashpa, ninanda manllaringuichi.
20Chutarishpa sirijungapaca, camapash na pactangachu,
jatanapash pilluringapaca na pactangachu.
21Mandaj Diosca, Perazim lomapishnami shayaringa.
Gabaón shuti pambapishnami, ninanda fiñaringa.
Paica, canguna na yachai ushanallata rurangapami, chashna fiñaringa.
22Ama ashtahuan llaquichi tucungapami, na jariyashpa rimana canguichi.
Cai tucui llactata tucuchinataca, tucuita Mandaj Diosca ña ricushcallami charijun.
23Ñuca imata villashcataca, aligutapachami uyana canguichi.
Ñuca imata nijujtapash, alipachami uyana canguichi.
24Tarpungapa yapuj runaca, ¿tucui punllachu yapujungalla?
¿Pambapi curpacunata ñutushpa chishangallachu?
25Alpata aliguta ñutushpa alichishca jipaca,
¿nachu eneldo muyuta cashpa, comino muyuta cashpapash tarpunlla?
Nachu, ¿Trigotapash huachupi tarpun?
Nachu, ¿Cebadatapash, maipi tarpunapilla tarpun?
Nachu, ¿Avenatapash pamba muyundipi tarpun?
26Tarpuj runataca, paipaj Taita Diosmi aliguta yachachijun.
27Eneldo muyutaca, na trillanahuan trillanllu.
Comino muyutapash, na carretahuan saruchishpa trillanllu.
Eneldo muyutapash, comino muyutapash jamzilla varahuanllami huactan.
28Grano urmangacamanllami trillan.
Carretahuanga, na ñutungacaman sarunllu.
Trillashpaca, na ñutungacaman sarunllu.
29Chaicunatapash, tucuita Mandaj Diosllatami rurarca.
Paica, imata cashpapash ninan ushaihuan rurashcata,
tucuita ali yuyaihuan rurashcata ricuchingapami, chashna rurarca.
Who We AreWhat We EelieveWhat We Do
2025 by iamachristian.org,Inc All rights reserved.