JOB CALLARI YUYAI - Quichua Imbabura 2016
CALLARI YUYAIIsraelcuna imalla tucushcata ricushca jipaca, cai Job shuti quilcashcapica, juyailla yuyaicunata cuj shimicunatami ricunchi.Cai quilcashcapica, caipi chaipi causajushca, ninan charij, ashtaca ayllucunata charij, ali shunguta charij shuj ñaupa taitapaj causaitami ricunchi.Paitaca, manllanayai llaquipachami japimushca. Paitaca, Taita Diosllata llaqui japichun saquijpimi, paipaj tucui charishcacunapash tucurishca. Paipaj tucui churicunapashmi, llaquinayaita huañushca. Paitaca, yapa nanai, ninan jatun ungüi japishpami, tucui cuerpopi carachaman tigrashca.Callari ishcai capitulopica paica, imata ruraitapash na ushajushcatami villajun. Chaita yachashpaca, pundaca paipaj quimsa cumbacuna, chaipaj catica ashtahuan shujcunapash, paita ricungapa rishcatami villajun.Capítulo 3manda 37caman ricujpica, chai cumbacunahuan parlanajushcata, huaquimbica fiñanajushpa rimarinajushcatami villajun. Chai punllacunapica, ima llaqui japijpipash, “Juchamandami chashna tucunchi” yanmi cashca.Job runaca, cashnami nijushca: “Ñuca tucui causaipi pitapash llaquij, imagutapash caraj, Taita Diosta manllaj, ali shungu runami carcani. Cai llaquicunaca, yangamandami japihuashca” nijushcami.Ashtahuangarin paipaj cumbacunaca: “Na chashnachu juchatami rurashcangui” ninajushcami. Paicunapaj yuyaipica, Job runaca juchata rurashcapachami ricurishca. “Juchata rurashcamandami, cai llaquicuna shamun” nishca yuyaitaca, Job runaca na chasquishcachu. “Taita Dioshuan ñavi ñavi tuparishpami, imamanda chashna llaquichishcataca yachaiman” yajushcami. Shina yajushpaca, paica “Ima na alitapash na ruraj, Taita Diostapash manllaj, ali runa cajta ricuchishpami, paipaj ñaupajpica ali ricurisha” yajushcami.Capítulo 38manda 42:6 caman ricujpica, Job tapujpi Taita Dios tigrachishcatami villajun. Taita Diosca, Jobtaca na tigrachi ushanalla yapa shinllitami tapuchishca. Tucui cai pachapi, jahua pachapi imalla tiyajta ricuchishpami: “Caicunataca, ¿pita rurarca, imashnata carca?” nishpa tapuchishca. Chaimandami tucui chaicunataca, pai ninan ushaita charij cashpa, alipacha yachajushca cashpa, juyaillata rurashcata Jobman ricuchishca.Jobca, cashna tucuita yachaj, tucuita rurai ushaj jatun Diospaj ñaupajpimi, “Ima na alitapash na rurashcanichu” nishpa, Taita Diosman tigrarishca. Jobca: “Ñucaca, napash yachashpatami, quiquin Taita Diosta na ali shimicunata rimashpa fiñachishcani” nishpami llaquirishca.Capítulo 42:7-17 caman ricujpica, Taita Diospajman Job tigrarijpi paitaca, punda imashna charishcatapash yalita, Taita Diosca cushcatami villajun. Taita Diosca, Jobtaca paipajman tigrarijpica, paipaj ñaupajpi ali runa cajta ricushpa chasquishpalla na saquishcachu. Ashtahuangarin chai tucui charishcacuna tucurishcamandaca, ashtahuan chaupi yalitapashmi cushca.Job runapaj cumba cashpata rimajcunataca, Taita Diosllatami: “Yangatami, Jobtaca juchachircanguichi” nishpa rimashca. Shinallata paicuna pandata yarishpa, Job runata juchachishcamandaca: “Juchata rurashcata anchuchingapapash, animalcunata ñucaman cuichi” nishpami, Taita Diosca mandashca. “Ashtahuangarin canguna cushcata chasquingapaca, ñucapajta ruraj Job runallata Ñucata mañachun” nishcami.Chaimandami cunan punllapipash crijcunaca, ima llaquita maijambash apajujpica: “Juchamandami llaquita apajun” nishpaca, na yangata ninalla canchi.
