NÚMEROS 18 - Quichua Imbabura 2016

Sacerdotecunaman, levitacunaman imatalla cuna cashcamanda

1Mandaj Diosca, Aarondami cashna nijurca: “Ñucapajlla huasipi imata ruranata na pactachishpaca, cambash, cambaj churicunapash, cambaj taitapaj huasi ucupurapashmi llaquichi tucunguichi. Shinallata, sacerdotecuna juchata rurashcamandaca, cambash, cambaj churicunapashmi llaquichi tucunguichi.

2Cambaj taita Levipaj ayllu, cambaj huauquicunatapash, canhuan tandanajuchun mandangui. Paicunami candaca yanapanajunga. Cambash, cambaj churicunapashmi jatun carpa ucupi Ñucapajta rurashpa causanguichi.

3Ñuca huasipi tucui imatalla ruranataca, can mandajpimi ruranajunga. Ashtahuangarin paicunapash, cangunapash ama huañungapaca, Ñucapajlla cachun shicanyachishpa churashcacunamanmi, na quimirina canguichi. Altarmanllapash, na quimirinachu canguichi.

4Paicunapash canhuan tandanajushpami, Ñucahuan tuparina jatun carpapi ruranacunata ruranajunga. Pipash shujcunaca, cangunahuan tandanajuitaca napacha ushangachu.

5Israelcunata, Ñuca ama ashtahuan fiñachunmi, Ñucapajlla shicanyachishca ucutapash, Ñuca altartapash huacaichina canguichi.

6Mandaj Dios Ñucami, cangunapaj huauqui levitacunataca, Israelcunamanda agllarcani. Ñucallatami, Ñucahuan tuparina carpapi, Ñucapajta rurashpa causachun cangunaman curcani.

7Ashtahuangarin cambash, cambaj churicunapash sacerdotecuna cashcamandami, altarpi tucui imatalla ruranacunatapash, fachahuan jarcashca ucupipash ricuriashpa, Ñucapajta rurana canguichi. Sacerdotecuna cashpa, Ñucapajta rurana munaita charichumbash, Ñucami curcani. Pipash shujcunaca, cangunahuan tandanajushpaca huañungapachami” nijurcami.

8Mandaj Diosca, Aarondaca cashnatapashmi nijurca: “Ofrendata Ñucaman carashcacunata ricuchunga canmanmi curcani. Israelcuna, Ñucaman carangapa shicanyachishcataca, aceiteta talishpa javi tucushca sacerdote cajpimi, canmambash, cambaj churicunamambash, tucui causaipi pactachinajuchun curcani.

9Ñucaman shicanyachishpa carashca ofrendamanda, na rupachishpa saquirishcacunaca, cambajmi canga. Ñucaman ofrendata apamushcacunapash, imata carangapa tucui apamushcacunapash, paicunapaj juchamanda cushcacunapash, paicuna na alita rurashcamanda Ñucaman cushcacunapash, cambajmi canga. Chaicunaca, Ñucapajlla shicanyachishca cashpami, cambajpash, cambaj churicunapajpash canga.

10Chaicunataca tucuilla jaricunami, Ñucapajlla huasipi micuna canguichi. Chaicunaca, Ñucapajlla shicanyachishcami canga.

11Caicunapashmi cambaj canga: Vichai ricuchishpa cushca ofrendacunapash, Israelcuna vichai cuyuchishpa cushca ofrendacunapashmi, cambajpash, cambaj churicunapajpash, cambaj ushicunapajpash canga. Chaicunataca, mapa illaj causanajuj tucui cambaj huasi ucupuracunami micunga. Chaicunaca, tucui causaipi pactachinajuchun cushca mandashcacunami canga.

12Aceitemanda, llullu vinomanda punda llujshishcatapash, punda fucushca trigomandapash ashtahuan alita agllashpami, Mandaj Dios Ñucaman cunajunga. Chaicunataca canmanmi cuni.

13Paicunapaj alpapi ima punda fucushcata, Mandaj Diosman apamushcacunaca, cambajmi canga. Chaicunataca, mapa illaj causanajuj tucui cambaj huasi ucupuracunami micunga.

14Israelcuna, Ñucaman carashapachami nishpa, tucuita shicanyachishcapash cambajmi canga.

15Causaita tucui charijcuna punda huacharishcataca, genteta cashpa, animalta cashpapash, Ñucaman cungapa tucui apamushcacunaca, cambajmi canga. Shina cajpipash punda huacharishca churita cacharichingapaca, culquita cuchun mandangui. Shinallata punda huacharishca, na micunachu nishca animalcunata cacharichingapapash, culquita cuchun mandangui.

16Chaicunata cacharichingapaca, huacharishca punllamanda, shuj quillata charijpimi, mashnata cuna cashcata ricushpa, picha siclo culquita cunga. Shuj siclo culquica, Ñucapajlla huasipi pezashcashnami, ishcai chunga gera culquita pezanga.

17Ashtahuangarin, punda huacharishca animalcunataca, huagra cajpi, llama cajpi, chivo cajpipash, chaicunata cacharichitaca na ushangachu. Chaicunaca, Ñucapajlla cachun shicanyachishca cajpimi yahuartaca, altar jahuapi tsirapachina cangui. Virataca, Mandaj Dios Ñuca ñaupapi mishquilla ashnajuchunmi, Ñucaman cushpa rupachina cangui.

18Chai animalcunapaj aichaca, cambajmi canga. Vichai cuyuchishpa, Ñucaman cushca pecho aichapash, ali maqui rigra aichapash, cambajmi canga.

19Israelcuna, Mandaj Dios Ñucaman vichai ricuchishpa cushca, Ñucapajlla ofrendacunatapash, tucuitami canman cuni. Chaicunataca canmambash, canhuan causanajuj cambaj churicunamambash, ushicunamambashmi cuni. Chaicunaca, tucui causaipi pactachinajuchun cushca mandashcacunami. Chaicunaca, Mandaj Dios Ñuca ñaupajpica, cambash, cambaj miraicunapash, tucui causaipi, Ñucahuan ari nishcata ricuchij cachihuan sellashcashnami canga” nijurcami.

20Mandaj Diosca, Aarondaca cashnatapashmi nijurca: “Canga, Israelcunahuan alpata japinataca na charinguichu. Ñucami, Israelcunapaj chaupipica, can japina alpashna canhuan causajuni.

21Ñucaca, Leví shuti runapaj churicuna Israel llactapi japinataca, Ñucapajta ruranajushcamandami, chungamanda shujguta Ñucaman cushcataca, tucuillata paicunaman cuni. Paicunami, Ñucahuan tuparina jatun carpapica, Ñucapajta rurashpa causanajun.

22Israelcunaca, Ñucahuan tuparina jatun carpamambash na ashtahuan quimiringachu. Paicuna chaiman yaicushpa, juchayu tucushpa ama huañungapami, na yaicuna canga.

23Ashtahuangarin, ñucahuan tuparina jatun carpapica, levitacunami Ñucapajta ruranajunga. Paicuna na alita rurashpaca, paicunallatami llaquita apanajunga. Caicunaca, paicunapaj miraicunapash, tucui causaipi pactachinajuchun cushca mandashcacunami. Levitacunaca, Israelpurapica ima alpatapash na charingachu.

24Levitacuna japina cashcataca, chungamanda shujguta Mandaj Dios Ñucaman, Israelcuna ofrendata apamushcatami, paicunaman curcani. Chaimandami: ‘Israelpurapica, ima alpatapash na japinajunga’ nircani” nijurcami.

25Mandaj Diosca, Moisestaca cashnami nijurca:

26“Levitacunaman cashna ningui: ‘Chungamanda shujguta Israelcuna apamushcacunataca cangunami japinguichi. Shinallata, chai chungamanda shujguta apamushcamandapash, chungamanda shujgutaca, Mandaj Dios Ñucaman shicanyachishpami, vichai cuyuchishpa cuna canguichi.

27Chaicunami, cangunapaj chagramanda trigota cushcashna, uvacunata cutana pushtumanda vinota cushcashna canga.

28Chashnami Israelcuna apamushca ofrendacunata japishpaca, Mandaj Dios Ñucamanga, cangunapash chungamanda shujguta cuna canguichi. Chai apamushcamanda, Mandaj Dios Ñucaman cushcataca, sacerdote Aaronmanmi cuna canguichi.

29Cangunaman tucui imatalla apamushcamandaca, Mandaj Dios Ñucaman ofrendata cunami canguichi. Chai apamushcamandaca, alitallami Ñucaman cuna canguichi. Chaicunaca, Ñucapajlla cachun shicanyachishcami canga ningui’ nijurcami.

30Levitacunataca cashnatapash ningui: ‘Chai apamushcacunamanda ashtahuan alitalla agllashpa cushcacunaca, levitacunapajca, paicuna trillana pambamanda, uvacunata cutana pushtumanda cushcashnami canga.

31Chaitaca maipi cashpapash cangunapash, cangunapaj ayllucunapash micunguichilla. Ñucahuan tuparina jatun carpapi, Ñucapajta ruranajushcamandaca chaicunatami micuna canguichi.

32Chai apamushcacunamanda, ashtahuan alitalla agllashpa, Ñucamanra cushca cashpaca jucha illajmi saquiringuichi. Canguna ama huañungapaca, Ñucapajlla cachun shicanyachishpa, Israelcuna Ñucaman carashcacunataca napacha mapayachinachu canguichi’ ningui” nijurcami.