NÚMEROS 8 - Quichua Imbabura 2016

Aarón lamparacunata japichishcamanda

1Mandaj Diosca, Moisestaca cashnami nirca:

2“Aaronda cashna ningui: ‘Canchis lamparacunata japichishpaca, candelero ñaupajman punchayachijuchun churangui’ ningui” nircami.

3Aaronga chashnallatami rurarca. Mandaj Dios Moisesman mandashcashnami, lamparacunata japichishpaca, candelero ñaupaman punchayachijuchun churarca.

4Candelerotaca, curimanda rurashpami, chaquimanda callarishpa, sisacunacaman, tacashpa juyaillaguta rurashca carca. Mandaj Dios, Moisesman imashna rurachun ricuchishcashnami, candelerotaca, chashnatapacha rurarca.

Diospajlla cachun Levitacunata shicanyachishcamanda

5Mandaj Diosca, Moisestaca cashnatapashmi nijurca:

6“Israelpuramanda shicanyachishpami, levitacunataca mapa illaj cachun rurana cangui.

7Paicuna jucha illaj cachunga cashnami rurana cangui: Juchata maillashcata ricuchingapami, paicunataca jacuhuan talina cangui. Chai jipaca, chaquimanda umacaman tucuilla milmata anchuchichun, shinallata paicunapaj churajunatapash tajshachunmi mandana cangui. Chashna rurashpami paicunaca mapa illaj tucunga.

8Chai jipaca, shuj maltun shicutapash, aceitehuan chapushpa masashca, ali jacutapashmi apamunga. Shinallata, paicunapaj juchamanda cungapapash, shuj maltun shicutami apamunga.

9Levitacunataca, Ñucahuan tuparina jatun carpaman pushashpami, tandanajushca tucuilla Israelcunatapash chaipi tandachina cangui.

10Mandaj Dios Ñuca ñaupajman, levitacuna ña quimirimujpimi, Israelcunaca, levitacunapaj umapi paicunapaj maquita churanga.

11Shina cajpimi, Israelcuna cushca levitacunaca, Ñucaman Aarón cujpi, Mandaj Dios Ñucapajtalla rurashpa causanajunga.

12Levitacunapash, maltun shicucunapaj umapimi maquita churanga. Shuj shicutaca, paicunapaj juchamandami Ñucaman cuna cangui. Caishujtaca, Mandaj Dios Ñucaman cushpami, tucuillata rupachina cangui. Levitacunapaj juchamandami chashna rurana cangui.

13Shinallata levitacunataca, Aaronbaj, paipaj churicunapaj ñaupajpi shayachishpami, Mandaj Dios Ñucaman ofrendatashna cuna cangui.

14Chashnami levitacunataca, Israelpuramanda Ñucapajlla cachun shicanyachijpi, paicunaca Ñucapajlla tucunga.

15Chai jipami levitacunaca, Ñucahuan tuparina jatun carpapi, Ñucapajta rurangapa shamunajunga. Paicunataca mapa illajta rurashpami, ofrendatashna Ñucaman cuhuangui.

16Tucuilla Israelpuramandaca, punda huacharishca churicunapaj randimi levitacunaca, Ñucapajlla shicanyachi tucushca. Paicunataca, tucui Israelcunapaj punda churicunapaj randimi japircani.

17Israelpurapica punda churicunapash, punda huacharishca jari animalcunapash tucuilla Ñucapajmi. Paicunataca, Egipto llactapi punda huacharishcacunata huañuchishca punllamandapachami, Ñucapajlla cachun shicanyachircani.

18Shinamandami, levitacunataca, tucuilla Israelcunapaj punda churicunapaj randi japircani.

19Ñucami, Israelpuramanda levitacunataca, Aaronmambash, paipaj churicunamambash curcani. Levitacunami, Israelcunamandaca, Ñucahuan tuparina jatun carpapi, tucuita ruranajunga. Israelcuna, Dioshuan ali tucuchumbash, Ñucapajlla huasiman Israelcuna chayamujpi, huañuchij llaqui ama japichumbashmi, chashna curcani” nijurcami.

20Moisespash, Aaronbash, tucui Israelcunapashmi, Mandaj Dios imashna Moisesta mandashcashna, levitacunahuanga tucuita rurashpa pactachinajurca. Shinami Israelcunaca, levitacunataca, Diospajlla cachun shicanyachinajurca.

21Levitacunaca, mapa illajcuna tucushpami, paicunapaj churajunacunatapash tajshanajurca. Shina cajpimi, Aaronga, levitacunataca, Mandaj Diospaj ñaupajman pushamushpa ofrendatashna curca. Shinallata, levitacuna mapa illaj saquirichunmi, paicunapaj juchacunamanda ofrendata curca.

22Chai jipami levitacunaca, Mandaj Dioshuan tuparina jatun carpapica, Aaronbaj ñaupajpi, paipaj churicunapaj ñaupajpipash, Diospajta rurangapa shamunajurca. Mandaj Dios, Moisesta, imashna mandashcashnami, levitacunahuanga tucuita rurashpa pactachinajurca.

23Chai jipami Mandaj Diosca, Moisesta cashna nijurca:

24“Levitacunaca, Ñucahuan tuparina jatun carpapi, Ñucapajta rurangapaca, ishcai chunga picha huatata charijmanda vichaimanllami yaicui ushanga.

25Paicunaca, picha chunga huatata pactachishpaca, Ñucapajta ruranata saquinami canga. Paicunaca, Ñucapajta rurangapa yaicumuitaca cutinga na ushangachu.

26Shina cashpapash, paicunapaj huauquicunahuanmi, Ñucahuan tuparina jatun carpata huacaichishpa causanajunga. Ashtahuangarin, pundashnaca napacha Ñucapajta rurai ushangachu. Levitacuna, Ñucapajta rurashpa causanajuchunga, cai mandashcacunatami tucuita pactachina cangui” nijurcami.