1 REYES 3 - Quichua Imbabura 2016

Salomonga, Faraonbaj ushihuanmi cazarashca

1Salomonga, Egipto llactata jatun mandaj Faraonbaj ushihuan cazarashpami ayllupura tucurca. Paipaj huarmitaca, Davidpaj pueblopi causangapami pushamurca. Salomonga, pai mandashpa tiyajuna huasitapash, Mandaj Diospaj huasitapash, Jerusalén pueblo muyundi pircatapash chairami rurachishpa tucuchijurca.

2Mandaj Diosta yarina huasica nara tiyajpimi, lomacunapi tiyanajuj altarcunapilla animalcunata Diosman cushpa huañuchinajuj carca.

Salomonga, alipacha yachajushca canatami mañashca(2 Crón. 1:1-13)

3Ashtahuangarin Salomonga, Mandaj Diosta juyashpami, paipaj taita David yachachishcata cazushpa causarca. Paica, lomacunapi tiyajuj altarcunapimi animalcunata Diosman cushpa huañuchishpa, inciensotapash cushnichijun carca.

4Jatun mandajca, Gabaón shuti puebloman rishpami, chai lomapi tiyajuj ashtahuan ali altarpi, Diosman animalta cushpa huañuchijurca. Chai altarpimi, huaranga animalcunata, Diosman cushpa tucuillata rupachijurca.

5Shuj tutami Mandaj Diosca, Gabaón pueblopi Salomonman muscuipi ricurirca. Chaipimi Taita Diosca: “Imata carachun munashpapash, mañahuailla” nirca.

6Shina nijpimi Salomonga, cashna nirca: “Canga, Cambajta ruraj ñuca taita Davidtaca, ninandapachami llaquircangui. Ñuca taitaca, Cambaj ñaupajpica tucui shunguhuan, alitalla rurashpami tucuita pactachishpa causajurca. Chaimandami, Can ninandapacha llaquishcataca ricuchingapaca, pai mandashpa tiyajushcapica, paipaj churita churahuashcangui. Chaica cunan cai punllami pactamushca.

7Cunanga, ñucata Mandaj Taita Dioslla, Cambajta ruraj ñucataca, ñuca taitapaj randi jatun mandaj cachunmi churahuashcangui. Ñucaca, chairalla viñai huambra cashpami, imagutapash nara ali yachapani.

8Cambajta ruraj ñucaca, Can agllashca gentecunapaj chaupimi cani. Paicunaca, maitapash na yupai ushanalla, mashna cajtapash na yachai ushanalla ashtaca gentecunami.

9Chaimanda, Cambajta ruraj ñucamanga, Can agllashca gentecunata mandangapa ali yuyaita charij shunguta carahuailla. Shinallata ima ali cajta, ima na ali cajtapash ricushpa alichingapa yuyaita carahuailla. Cai tucui ashtaca gentecunata mandaitaca, ¿pita ushangayari?” nijurcami.

10Salomón chashna mañashcapash, Jatun Diospaj ñaupajpica alimi uyarirca.

11Chaimandami Taita Diosca, cashna nirca: “Unaicaman causanata, charij tucunata, canda fiñajcunata huañuchinataca, na mañarcanguichu. Ashtahuangarin, imata cashpapash ali ricushpa alichina yuyaitami mañarcangui.

12Shinamandami can mañashcashnallata rurashcani. Alipacha yachajushca ali yuyaita charij shungutami canman curcani. Chashna alipacha yuyaita charij runaca, pundapash na tiyashcachu, jipamambash na tiyangachu.

13Shinallata charij tucunata, ninanda alicachi tucunata can na mañajpipash, chaitapashmi cuni. Cambaj tucui causaipica, jatun mandajpuramandaca, maijambash canshnaca na tiyangachu.

14Shinallata, ñuca quilcachishca shimicunata, ñuca mandashcacunata, cambaj taita Davidshna, cazushpa causajujpica, cambaj causana punllacunatapash mirachishami” nijurcami.

15Salomón rijcharishpaca, muscuitalla muscujushcatami yacharca. Chaimandami Jerusalenman shamushpa, Mandaj Dioshuan ari ninajushcata alichishca arca ñaupajpi shayarirca. Chaipimi, Diosman animalcunata cushpa huañuchishpa tucuillata rupachirca. Dioshuan ali cangapapashmi, animalcunata carashpa huañuchirca. Jatun micuitapashmi, tucui paipajta rurajcunaman rurarca.

Salomonga, alipacha yachajushca, tucuipi alimi cashca

16Chai punllacunami, culquimanda huainayaj ishcai huarmicunaca, jatun mandaj Salomonbaj ñaupajman shamurca.

17Shuj huarmica cashnami nirca:

“¡Aij, ñucata mandajlla! Ñucapash, cai huarmipashmi shuj huasipilla causarcanchi. Ñuca, chai huasipillata cashpami, huahuata charircani.

18Ñuca huahuata charishca quimsa punlla jipami, paipash shuj huahuata charirca. Chai huasipica, ñucanchi ishcaillami causarcanchi.

19Shuj tutami cai huarmipaj huahuaca, puñujushpa paillata llapijpi huañushca carca.

20Chaimandami paica, chaupi tuta jatarishpaca, ñuca huahuata japishpaca, paipaj puñuj pushtuman churashca carca. Shinallata paipaj huahua huañushcataca, ñuca puñuj pushtupimi churashca carca.

21Tutamandata ñuca jatarishpa huahuata chuchuchisha yajpica, huañushcami carca. Ña punllayajujpi ricushpaca, na ñuca huahua cashcatami ricurcani” nijurcami.

22Shina nijpimi, caishuj huarmica:

“Na chashnachu, ñuca huahuami causajun. Cambaj huahuami huañushca” nirca.

Shina nijpimi, chaishuj huarmipash:

“Na chashnachu, cambaj huahuamari huañushca. Ñucapaj huahuami causajun” nirca.

Chashnami, jatun mandajpaj ñaupajpi rimarinajurca.

23Chaimandami jatun mandajca, cashna nirca: “Cai huarmica: ‘Ñuca huahuami causajun. Cambaj huahuami huañushca’ ninmi. Caishuj huarmipash: ‘Cambaj huahuamari huañushca, ñuca huahuami causajun’ ninmi” nijurcami.

24Chashna nijushpami, jatun mandajca:

“Shuj espadata apamuichi” nirca.

Shina nijpimi shuj espadata, jatun mandajman apamurca.

25Ña apamunhuanmi, jatun mandajca cashna nirca:

“Causajuj huahuata chaupipi fitishpa, shuj chaupitaca caishuj huarmiman, shuj chaupitaca chaishuj huarmiman cuichi” nirca.

26Shina nijpimi, causajuj huahuapaj mamaca, (paipaj huahuamandaca, shungu junda ninanda llaquirishpa), jatun mandajtaca cashna nirca:

“¡Aij, ñucata mandajlla, ama huañuchipaichu! Causajuj huahuataca, caishuj huarmiman cupailla” nirca.

Ashtahuangarin chaishuj huarmica:

“Ñucapajpash, cambajpash ama cachun, chaupichunlla” nirca.

27Shina nijpimi jatun mandajca, cashna nirca:

“Causajuj huahuataca, ama huañuchishpa, chai huarmiman cuichilla. Paimi, chai huahuapaj mama cashca” nircami.

28Chai fiñanajuita, jatun mandaj alichishcataca, tucui Israelcunami yacharca. Imata alichingapapash, Taita Dios cujpi alipacha yachajushca cajpimi, Salomondaca manllanajurca.