1Chai punllacunapica, jatun mandaj ángel Miguelmi,
cambaj llactapura Israelcunata yanapangapa shayaringa.
Cai pachapi gentecuna causai callarishcamanda,
nara tiyashca jatun llaquicunami tiyanga.
Chai llaquimandaca, libropi shutita quilcashca, Can agllashca gentecunallami quishpiringa.
2Huañushpa alpapi samajcunapash, ashtacacunami causaringa.
Shujcunaca, causaita causagringapa, caishujcunaca, causaita causaicaman llaquita apangapa causaringa.
3Alitalla yachachij, ali yachajushcacunaca, jahua pacha punchayachijshnami punchayachinajunga.
Imatapash alitalla rurashpa causanajuchun,
ashtaca gentecunaman yachachijcunaca, luzerocunashnami causaita causaicaman punchayachinajunga.
4Daniel, canga cai shimicunata quilcashcataca, tucurimui punllacamanmi vichashpa, sellashpa alichina cangui. Ashtaca gentecunami caiman, chaiman rinajunga. Ima yachajunacunapash, ashtahuanmi miranga” nihuarcami.
5Chai jipaca, Daniel ñucaca, ishcaipura runacuna shayanajujtami ricurcani. Shuj runaca, jatun yacu ricuj cai manñapi, caishuj runaca jatun yacu rijuj caishuj manñapimi shayanajurca.
6Paicunamanda shujmi, lino churajunata churajushca jatun yacu jahuapi shayajuj angeltaca: “Cashna manllarinacuna pactamushpaca, ¿ima punllashi tucuringa?” nishpa tapurca.
7Shina nijpimi, jatun yacu rijuj jahuapi, lino churajunata churajushca shayajuj angelca, ishcandi maquita vichai churashpa, causaita causaicaman causajuj Diospaj shutipi cashna nishpa juramenturca: “Quimsa huata chaupitami, chashna llaquica tiyanga. Diospajlla causajcunata shuj llactacunaman llujchishpa cachana tucurijpimi, tucui cai llaquicunaca tucuringa” nircami.
8Shina nijta uyashpapash, na yachai ushashpami: “Ñucata mandajlla, cashna tucunaca, ¿ima punllata pactanga?” nishpa tapurcani.
9Shina tapujpica, cashnami nihuarca: “Daniel, cunanga rilla. Cai shimicunaca, tucurimui punllacunacaman sellashpa vichashcami tiyajunga.
10Ashtaca gentecunami, tucui mapata maillashpa, yurajyachishca, mapa illajcuna canga. Diosta na manllajcunaca, cashna tucunataca shujllapash na yachai ushashpami na alitalla rurashpa catinajunga. Ashtahuangarin ali yachajushcacunaca, tucuita yachai ushangallami.
11Diosman animalcunata cushpa rupachinata anchuchishpa, ninan na ali, millanayaita rurana punllamandami, huaranga ishcai patsaj iscun chunga punllacuna yalinga.
12Maijambash huaranga quimsa patsaj quimsa chunga picha punllacunata Taita Diospi shuyajca, ninandami cushijunga.
13Canga, huañui punllacaman aliguta catijunguilla. Samajushca jipa, tucurimui punllapi jatarishpami, can japinataca japingui” nihuarcami.
Who We AreWhat We EelieveWhat We Do
2025 by iamachristian.org,Inc All rights reserved.
