1Juyashca crijcuna cunanga, Apunchi Jesuspaj shutipimi, cangunataca, ñucanchi imashna causanata yachachishcashna causachun, shinllita rimashpa, ninanda mañanajupanchi. Shina causashpami, Taita Diostalla cushichishpa, ashtahuan ali causanguichi.
2Apunchi Jesusmanda, cangunaman imatalla yachachishcataca ñami yachanguichi.
3Taita Diosca, cangunataca Paipajlla causachunmi munan. Shinamandami, huainayashpa causanataca saquina canguichi.
4Cangunaca tucuicunami, cangunapaj huarmihuanlla aliguta, Diospajlla causana canguichi.
5Taita Diosta na crijcunashna, jatun na ali munaicunatalla rurashpaca na causanachu canguichi.
6Maijambash na paipaj huauquitallata umashpa, na alita rurashpa llaquichinachu. Chashna na alita rurajcunataca, Apunchi Jesusmi imashna llaquichina cashcashna llaquichinga. Chaitaca, ñami “chashnapachami canga” nishpa villarcanchi.
7Taita Diosca, ñucanchitaca, juchata rurashpa causachunga na agllarcachu. Ashtahuangarin, Paipajlla aliguta causachunmi agllarca.
8Cai yachachishcata yangapi churashpaca, na runacunata yangapi churanllu. Ashtahuangarin, jucha illaj Espirituta caraj Taita Diostami yangapi churan.
9Juyarishpa causanamandaca na quilcanachu cani. Caishujhuan, chaishujhuan juyarishpa causanataca, Taita Dios yachachijpimi cangunallata yachanguichi.
10Macedonia llactapi causanajuj tucui crijcunahuambashmi, cangunaca juyaita ricuchishcanguichi. Shina cajpimi, juyashca crijcuna, chashna juyaihuan causapanguichi nipani.
11Cangunaca, ali causaitami charina canguichi. Canguna imatalla charingapa ruranacunatapash, cangunapaj maquihuambacha rurashpami, ñucanchi imashna yachachishpa mandashcashna causana canguichi.
12Chashna causashpami, na crijcunapaj ñaupajpipash, tucuicuna alicachijpi, imagupash na illaj causanguichi.
Apunchi Jesús tigramunatami villajun13Juyashca crijcuna, huañushcacuna ima tucunatapash yachachunmi munanchi. “Huañushcacunaca na causaringachu” yashpa causajcunashna, ama llaquirinajuchunmi cashna ninajunchi.
14Apunchi Jesús huañushpa causarishcataca crinchimi. Shinallata, Jesusta crij huañushcacunata,Taita Diosca, Jesushuan causachinatapash crinchimi.
15Apunchi Jesús yachachijpimi, caitaca villanchi: Apunchi Jesús tigramuna punllacaman ñucanchi causanajushpaca, huañushcacunataca na ñaupashpa rinachu canchi.
16Apunchi Jesusca, mandashpa rimashcahuan, mandaj ángel caparishcahuan, Taita Diospaj trompetata huacachishcahuanmi, jahua pachamanda urai shamunga. Shina shamujpimi, Cristota crishpa huañushcacunaca, punda causaringa.
17Chai jipaca, ñucanchi caipi causajcunapash apai tucushpami, huañushpa causarishcacunahuan fuyupi tandanajushpa, Apunchi Jesushuan chaipi tuparishun. Shina tuparishpami, Apunchi Jesushuan causaita causashun.
18Shinamandami, caishuj chaishuj, cai shimicunata parlashpa ñaupajman catina canguichi.
Who We AreWhat We EelieveWhat We Do
2025 by iamachristian.org,Inc All rights reserved.
