DEUTERONOMIO 30 - Quichua Imbabura 2016

Diospajman cutin tigrarijpi bendicianamanda

1Cambaj causaipi, cai bendiciashca shimicuna, llaquichina shimicuna pactashpa yalishca jipa, canda Mandaj Taita Dios llujchishpa cachashca llactacunapi cashpaca, cutinmi llaquirishpa tigrarina cangui.

2Shina llaquirishpa, canda Mandaj Taita Diospajman, cambash, cambaj huahuacunapash, tucui ñuca mandashcacunata, tucui shunguhuan, tucui causaipi, Pai rimashca shimicunatami cazuna cangui.

3Shina rurajpimi Mandaj Diosca, cambaj llactapuracuna prezu apai tucushcataca, ninanda llaquishpa cutin tigrachimunga. Canda Mandaj Taita Diosca, shuj llactacunaman caita chaita cachashca cashpapash, cutinmi cangunataca tandachimunga.

4Canda Mandaj Taita Diosca, cambaj llactapuracunataca, cai pacha mai carupi cajpipash, cutinmi tandachimunga.

5Canda Mandaj Taita Diosca, cambaj ñaupa taitacuna, paicunapaj cachun japinajushca llactaman tigrachimushpami, chai llactataca cutin canman cunga. Shinallata, ashtahuan ali causaita charishpami ñaupa taitacunatapash yalishpa miranguichi.

6Canda Mandaj Taita Diosllatami, circuncisionda rurajshna, cambaj shungutapash, cambaj miraicunapaj shungutapash mushujyachinga. Canda Mandaj Taita Diosta tucui shunguhuan, tucui causaipi juyashpa, cai llactapi causai ushachunmi, shina ruranga.

7Canda Mandaj Taita Diosca, llaquichina tucui cai shimicunatami, canda fiñajcunaman cachamunga. Canda na ricunayachishpa, catiriyashpa canda llaquichijcunatapashmi chashna ruranga.

8Canga, Mandaj Diospajman tigrarishpami, Pai rimashca shimicunataca, Ñuca yachachijpi, tucui mandashcacunata pactachishpa causana cangui.

9Shina causajpimi, canda Mandaj Taita Diosca, cambaj maquihuan tucui imatalla rurashcatapash, cambaj huahuacunatapash, cambaj animalcunatapash, tarpushpa fucuchishca granocunatapash, bendiciajpi ali causangui. Mandaj Diosca, cambaj ñaupa taitacunahuan cushijushcashnami, canman alita rurashpa, canhuambash cushijunga.

10Canda Mandaj Taita Dios rimashcata uyashpa, mandashca shimicunata quilcashcacunata cazushpa causajpimi, chashna cushijunga. Canda Mandaj Taita Diospajman tucui shunguhuan, tucui almahuan tigrarijpimi, chashna cushijunga.

11Cai ñuca mandashcacunaca, cazungapa na shinlli cajpimi, pactachita ushanalla tiyajun.

12Chaicunaca, na jahua pachapica tiyajunllu. Jahua pachapi cajpica cashnami ninguiman: ‘¿Pita ñucanchipaj randi jahua pachaman rishpa, ñucanchi pactachinajuchun uyachingapa chai mandashcataca apamunga?’ ninguimanmi.

13Shinallata, na mama cucha chimbaman tiyajunllu. Mama cucha chimbaman tiyajujpica cashnami ninguiman: ‘¿Pita ñucanchipaj randi, mama cuchata chimbashpa, ñucanchi pactachinajuchun uyachingapa chai mandashcata apamunga?’ ninguimanmi.

14Ashtahuangarin cai shimicunaca, cambaj ñaupajpi, cambaj shimipipash, cambaj shungupipash pactachinallami tiyajun.

15Cunanga, cambaj ñaupajpimi, causaitapash, huañuitapash churani. Shinallata, alitapash, na alitapashmi churani.

16Cunanmi ñucaca, canda Mandaj Taita Diosta juyashpa, Paipaj ñanda catishpa, Pai mandashca shimicunata tucuita cazushpa, pactachishpa causachun mandani. Chashna pactachishpami, cangunaman carashca llactapica canda Mandaj Taita Dios bendiciajpi, ninanda mirashpa aliguta causanguichi.

17Ashtahuangarin, cambaj shungupash Diosmanda anchurishpa, mandashcatapash na cazushpa, shuj dioscunatara catishpa alicachishpa causanguiman.

18Shina causashpaca, cangunaca: ‘Huañushpa chinganapachami canguichi’ ninimi. Jordán yacuta chimbashpa, canguna japigrijushca llactapica, na unaita causai ushashpami huañunguichi.

19Cunanga jahua pachapaj, cai pachapaj ñaupajpimi, causaitapash, huañuitapash, bendiciai tucunatapash, llaquichi tucunatapash, cangunapaj ñaupajpi churani. Cunanga cambash, cambaj miraicunapash causangapaca, ali causaitami agllana cangui.

20Cangunata Mandaj Taita Diosta juyashpa, Pai rimashca shimicunata uyashpami, Paita catina canguichi. Shina causashpami, unaicaman causanguichi. Mandaj Diosllata, cangunapaj ñaupa taita Abrahamman, Isaacman, Jacobman carashami nishpa juramentushca llactapi causangapami, chashna cazushpa causana canguichi” nijurcami.