1Taita Dioslla,
jatun mandajmanga, ali yuyaita cupayari.
Jatun mandajpaj churimambash, alitalla rurashpa mandana ushaita cupayari.
2Paimi, Can agllashcacunataca, alitalla rurashpa mandanga.
Llaquilla causajcunatapash, aliguta ricushpami mandanga.
3Urcucunapash, gentecunaman ali causaita carachun.
Lomacunapash, alitalla ruranajuchun.
4Llaquilla causaj gentecunataca, aliguta ricushpami mandanga.
Imagupash illajcunapaj miraicunataca quishpichingami.
Llaquichijcunataca, sarushpami tucuchinga.
5Indipash, lunapash tiyangacamanga,
Canda manllashpami causanajunga.
Jatun mandajca, causaita causaicaman causajuchun.
6Jatun mandajca, jihuata cuchushca pambapi tamianshnami shamujunga.
Jamzi paramu urmashpa, alpata mutiyachijshnami shamujunga.
7Pai mandajui punllacunapica, alitallami ruranga.
Luna na tiyangacamanmi, juyailla ali causanaca tiyanga.
8Paica, mama cucha manñamanda, chaishuj manñacamanmi mandajunga.
Jatun yacumanda callarishpaca,
cai pacha tucuri manñacamanmi mandajunga.
9Paipaj ñaupajpimi, jichushca pambapi causajcunaca cungurinajunga.
Paita fiñajcunapash, alpaman chayajtami cumurinajunga.
10Tarsis pueblota jatun mandajcuna,
yacu manñapi tiyaj llactacunata jatun mandajcunami, caranacunata paiman apamunajunga.
Sabá shuti, Seba shuti llactacunata jatun mandajcunapashmi, caranacunata apamunajunga.
11Tucui jatun mandajcunami, paipaj ñaupajpi cunguringa.
Tucui shuj llactacunapi causajcunami, paipajta ruranajunga.
12Imagupash illajcuna caparishpa mañajpica, paimi yanapanga.
Pipash yanapajpi, llaquilla causajtapashmi yanapanga.
13Imagupash illajtapash, imagutapash na charijtapash llaquingami.
Imagutapash na charijcunataca, ricuriashpami huacaichinga.
14Paicunataca, umachi tucunamandapash,
ninanda llaquichi tucunamandapashmi huacaichinga.
Paica, chai gentecunataca ninanda juyashpami chashna huacaichinga.
15Jatun mandajca causajungallami.
Sabá shuti llactamanda curitami paimanga caranajunga.
Paimandaca Diosta mañanajungallami.
Punllandimi paitaca bendicianajunga.
16Pambacunapipash, urcu alpacunapipash, ashatallami tarpunga.
Shina cajpipash, Líbano urcu quirucunatapash yalitami fucunga.
Pueblopi causajcunapash, pambapi jihuacunashnami miranga.
17Jatun mandajpaj shutica, causaita causaicamanmi canga.
Indi tiyashcacamanga, paipaj shutica tucui causaicamanmi catinga.
Paimandami, tucui shuj llactacunapi causajcunaca bendiciai tucunajunga.
“Paica, ninandami bendiciai tucushca” ninajungami.
18Mandaj Taita Diosca, alicachi tucushca cachun.
Israelcunapaj Taita Diosca, alicachi tucushca cachun.
Paillami, jatun alicunataca rurashca.
19Paipaj jatun shutica, causaita causaicaman alicachi tucushca cachun.
Pai ninan ushaita charishcapash, tucui cai pachapi junda cachun.
Chashna cachun. Chashna cachun.
20Isaí shuti runapaj churi David mañashca shimicunaca, caipimi tucurin.
Who We AreWhat We EelieveWhat We Do
2025 by iamachristian.org,Inc All rights reserved.
