1 SAMUEL 7 - Quichua Imbabura 2016

1Quiriat-jearim pueblopi causajcuna shamushpami, Mandaj Diospaj arcata apashpa, lomapi tiyajun Abinadab shuti runapaj huasipi churanajurca. Mandaj Diospaj arcata ricushpa causachumbash, Abinadab runapaj churi Eleazartami, Diospajlla cachun shicanyachinajurca.

2Diospaj arcata, Quiriat-jearim puebloman apashca punllamandaca, ishcai chunga huatatami chaipi carca. Shina cajpimi, Israelcunaca ninanda huacashpa, Mandaj Diostaca mascanajurca.

Samuelca, Israelcunapaj juez tucushcamanda

3Samuelca, Israelcunataca cashnami nirca: “Mandaj Diospajman tucui shunguhuan tigraringapa munashpaca, shuj dioscunatapash, Astarot shuti huarmi diostapash anchuchinami canguichi. Chai jipaca, cangunapaj shungutapash alichirishpa, Mandaj Diospajtalla rurashpami causana canguichi. Chashna rurajpimi, filisteocunapaj maquimandaca cacharichinga” nircami.

4Shina nijpimi, Israelcunaca, Baal shuti, Astarot shuti dioscunata anchuchishpa, Mandaj Diospajtalla rurashpa causanajurca.

5Shina cajpimi Samuelca, cashna nirca: “Israelcunataca, Mizpa shuti pueblopi tandanajuchun cachaichi. Ñucami cangunamandaca, Mandaj Diosta mañasha” nircami.

6Shinallata Israelcunaca, Mizpa pueblopi tandanajushpami, yacuta llujchishpa, Mandaj Diospaj ñaupajpi talinajurca. Chai punllapica na micushpa, Diosta mañashpami: “Juchata rurashpami, Mandaj Diosta fiñachishcanchi” ninajurca. Samuelca, Mizpa pueblopimi, Israelcunataca mandashpa causajurca.

7Filisteocunata mandajcunaca: “Israelcunaca, Mizpa pueblopimi tandanajushca” nijta uyashpami, Israelcunahuan macanajungapa rinajurca. Chaita yachashpami Israelcunaca, filisteocunataca ninanda manllanajurca.

8Shinamandami Israelcunaca, Samueltaca cashna ninajurca: “Filisteocunapaj maquimanda ñucanchita quishpichijuchun, ñucanchita Mandaj Taita Diosta mañanataca, ama saquipanguichu” ninajurca.

9Shina nijpimi Samuelca, Mandaj Diosman cungapa, huahua llamaguta huañuchishpa, tucuillata rupachirca. Shina rurashpa Mandaj Diosta, Israelcunamanda mañajpimi, Mandaj Diosca uyarca.

10Tucuillata rupachina llamaguta Samuel huañuchijujpimi, Filisteocunaca, Israelcunahuan macanajungapa chayamurca. Ashtahuangarin, chai punllapica, filisteocunapaj jahuapi, Mandaj Dios rayuta cachamushpa manllachijpimi, Israelcunaca mishai usharca.

11Israelcunaca, Mizpa pueblomanda llujshishpami, Bet-car shuti pueblo uraicaman catishpa, filisteocunataca huañuchinajurca.

12Chai jipami Samuelca, Mizpa shuti pueblohuan, Sen shuti pueblohuan tiyanajuj chaupipi, shuj jatun rumita shayachishpa. Chaitami: “Mandaj Diosca, caicamanmi ñucanchitaca yanapashca” nishpa, chai rumitaca: “Eben-ezer” shutita shutichirca.

13Chashna mishai tucushpami, filisteocunaca, Israel llactaman tigrashpa yaicuitaca na ashtahuan usharca. Samuel causajui punllacunapica, Mandaj Diosmi filisteocunata llaquichijurca.

14Filisteocuna macanajushpa, Israelcunata quichushca pueblocunaca, Ecrón shuti pueblomanda callarishpa, Gat shuti pueblocamanmi carca. Chai pueblocunatami, filisteocunapaj maquimanda, Israelcunaca cutin quichushpa japinajurca. Shinami, Israelcunahuan, amorreo gentecunahuanga, na ashtahuan macanajui tiyarca.

15Samuelca, tucui paipaj causaipimi, Israelcunataca mandajurca.

16Paica tucui huata chayajpimi, Bet-el, Gilgal, Mizpa shuti pueblocunaman rishpa, chaicunapi ima llaquicuna alichina tiyajpipash Israelcunata ricushpa alichijurca.

17Chai jipaca, Ramá shuti pueblopi paipaj huasiman tigrashpami, tucui Israelcunata mandashpa causajurca. Shinallata, chai pueblopimi, Mandaj Diosman shuj altartapash rurarca.