1Culquitaca alpa ucumandami llujchina.
Curitapash rupachishpa, juyaillaguta rurana pushtumi tiyan.
2Jirrutaca, ñutu alpamandami llujchin.
Cobretaca, rumimanda surcushpami yacuyachin.
3Ninata japichishpami, yana tutatapash tucuchinajun.
Shina rurashpami, ucuta allashpa mascanajun.
Manllanayai yana, huañui japinalla llandu ucupimi, rumicunaca tiyanajun.
4Pipash na causanajuj pushtucunapimi, caruta rishpa allanajun.
Pipash na purij, jichushca pushtucunapimi mascanajun.
Huascacunahuan huatarishpami, ucucunaman huashajunajun.
5Micunapash, alpamandallatami llujshin.
Chai alpa ucupica, ninanda rupajuj ninami tiyan.
6Chai pushtupica, zafiro rumimi tiyan.
Chai ñutu alpamandaca, curitami llujchin.
7Chai pushtutaca, alasyu animalca, napacha rijsircachu.
Jatun angapash, na ricui usharcachu.
8Millai animalcunapash, chaitaca napacha sarurcachu.
Leonbash, chaitaca na yalircachu.
9Paipaj maquihuanmi chaipi rumicunataca tacarca.
Urcu ucucunatapashmi paica allarca.
10Jaca rumicunata faquishpami, ñanda ruran.
Chaipi juyailla rumicuna tiyashcataca, paicunapaj ñavihuanmi ricunajun.
11Jatun yacu maipi llujshijujtapashmi ricunajun.
Ima pacalla tiyashcatapash, mascashpa tarinllami.
12Ashtahuangarin ali yachajunataca, ¿maipishi tariringa?
Ali yachajuna pushtuca, ¿maipishi tiyanga?
13Chai yachajuna alipacha cashcataca runaca na yachanllu.
Cai pachapica, chai ali yachajunaca napacha tiyanllu.
14Manllanayai ucu ucu yacuca: ‘Na caipichu’ ninmi.
Mama cuchapash: ‘Ñucahuambash na canllu’ nircami.
15Chaitaca, curihuambash na randi ushanallachu.
Pezashca culquita cujpipash, na jatungachu.
16Chaitaca, Ofir shuti llactamanda curihuambash na randi usharingachu.
Punchapamba ónice rumihuambash, zafiro rumihuambash, na randi ushanallachu.
17Curipash, punchapamba diamante rumipash, chai ali yachajushca canahuanga na chimbapurai ushanllu.
Chaitaca, alipacha curimanda juyailla rurashcacunahuambash, na randi ushanallachu.
18Chai ali yachajunaca, coraltapash, perlacunatapash yali alipachami.
Ali yachajunaca, juyailla punchapamba rumicunatapash yalimi.
19Chaihuanga, Etiopía shuti llactamanda topacio rumipash, na chimbapurai ushanllu.
Alipacha curihuambash, na randi usharinllu.
20Shina cashpaca, ali yachajunaca ¿maimandashi shamujun?
¿Chai ali yachajuna tiyajuj pushtuca maipita canga?
21Runacunapaj ñavipica, pacallami chaica tiyajun.
Jahuata rij alasyu tucui animalcuna ricunamandapash pacallami.
22Abadonbash, huañuipash cashnami ninajurca:
‘Pai tucuipi rijsishca cajtaca, ñucanchi rinrihuanmi uyarcanchi’ ninajurcami.
23Taita Diosmi ali yachajuna maipi cajtapash yachan.
Imashna paiman chayanatapash, Paillami yachan.
24Paica, cai pacha tucuri manñacamanmi ricujun.
Cai pachapi imalla tiyajtapash, tucuitami ricujun.
25Huairatapash pezashpa,
yacucunatapash tupushpami, Paica chashna ali yachan.
26Tamiatapash, imashna tamianatami mandarca.
Culun nishpa punchalla shitajtapash, Paimi ñanda ricuchirca.
27Chashna cashpami, ali yachajuna maipi cashcataca ricurca.
Aliguta ricushpa yachashpami, tucuicunaman ricuchirca.
28Runataca cashnami nirca: ‘Jatun Diosta manllanaca, ali yachanami.
Na alimanda anchurinaca, ali yuyaimi’ nishcami” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
