1Chai punllami, Débora shuti huarmihuan, Abinoam runapaj churi Barac shuti runahuanga, cashna nishpa alicachinajurca:
2“Israelcunata pushajcuna ñaupashpa rishcamandapash,
paicunapaj munai macanajuiman llujshij gentecunamandapash, Mandaj Diostami alicachina canchi.
3Jatun mandajcunapash, uyanguichi.
Cati mandajcunapash, uyanguichi.
Ñucami, Mandaj Diostaca salmocunahuan alicachigrini.
Israelcunapaj Taita Diostaca, chashnami alicachigrini.
4Mandaj Dioslla, Seir shuti urcumanda llujshimujpipash,
Edom pambacunamanda shamujpipash, alpa mamami cuyurca.
Jahua pachapash yacuyashpami,
fuyumandapash yacu shutumurca.
5Mandaj Diospaj ñaupajpica, urcucunapash cuyurcami.
Israelcunata Mandaj Taita Diospaj ñaupajpica, Sinaí urcupash cuyurcami.
6Anat runapaj churi Samgar shuti runa causajui punllapi,
Jael shuti huarmi causajui punllapimi, ñangunaca jichushca saquirirca.
Chai ñangunata purijcunaca, quingu ñangunatami purinajurca.
7Israel llactapica, muyundi uchilla pueblocunapash llaquinayaitami, jichushca saquirirca.
Shina cajpipash, Débora shuti ñuca shayaringacamanmi, chashna jichushca carca.
Israelcunapaca mamashnami shayarircani.
8Shuj mushuj dioscunata catingapa agllanajujpimi, macanajunaca ña chayamujurca.
Chuscu chunga huaranga Israelcunapica ¿shuj escudollapash, tucsishpa huañuchina shuj jirrullapash na ricurircachu?
9Tucui shunguhuanmi, Israelcunata pushajcunataca alicachini.
Paicunapaj munai macanajungapa llujshimuj gentecunatapash alicachinimi.
Mandaj Diostami alicachina canchi.
10Yuraj burrupi tiyarishpa purijcunapash, llaquicunata alichijcunapash,
shuj llactacunaman chaquilla yalijcunapash, villanami canguichi.
11Macanajuimanda anchurishpami, animalcuna yacuta ufiana pugyupi alicachinajun.
Chaipimi Mandaj Dios mishashcataca villanajunga.
Israel llactapi tiyaj muyundi uchilla pueblocunapi causajcuna mishashcatapash, chaipimi villanajunga.
Mandaj Dios agllashca gentecunami pungucaman rinajunga.
12¡Rijchari, rijchari Débora huarmigu!
Rijcharishpa, shuj juyailla candanaguta candapailla.
¡Jatari Barac! Abinoam runapaj churilla,
Prezu japi tucushca runacunata apashpa rilla.
13Paicuna rijpimi, caishuj mandajcunapash catinajurca.
Mandaj Dios agllashcacunaca, ushaita charij runacunahuanmi, macanajungapa shamurca.
14Amalec gentecunahuan causaj, Efraín ayllucunami shamurca.
Benjamín ayllucunapash, macanajuj runacunahuanmi urai shamunajurca.
Maquir shuti llactamandaca, mandajcunami urai shamunajurca.
Zabulón ayllumandaca, mandana varata charijcunami urai shamunajurca.
15Isacar aylluta pushajcunapash, Débora shuti huarmihuanmi rinajurca.
Isacar ayllucunapash, Barac shuti runashnami, pugru pambaman rinajurca.
Rubén ayllupuracunaca, imatalla ruranatami shungumanda yarinajurca.
16¿Imapata llamacuna huacanajujta uyangapa corral pungupi saquirircanguichi?
¿Rubén ayllupurapica, manllaita charijcuna tiyangachu?
17Galaad ayllucunaca, Jordán yacu chimbapillatami saquirirca.
Dan ayllupuracunaca, ¿imashpata canoacunapillata saquirircanguichi?
Aser ayllupuracunaca, mama cucha manñapillatami saquirircanguichi.
Chaimandaca, na anchurishpami chaipi saquirircanguichi.
18Zabulón ayllucunapash, huañunataca na manllashpami rinajurca.
Neftalí ayllupash, macanajuna pambaman rircallami.
19Jatun mandajcuna shamushpami macanajurca.
Canaán llactata jatun mandajcuna shamushpami macanajurca.
Meguidopi yacucuna tiyajuj pushtuman shamushpami,
Taanac shuti pueblopi macanajurca.
Chaimandaca ima culquitapash na apashpa tigrarcachu.
20Jahua pachapi lucerocunapash macanajurcami.
Paicunaca, Sísara runahuanmi macanajurca.
21Ninanda jatarijuj, Cisón shuti huaicu yacumi, fichanshna aparca.
Pundamanda tiyajuj, Cisón shuti yacumi tucuillata aparca.
Ñuca almalla, ama manllashpa jaculla.
22Caballocunaca, carucaman uyarijtami calpanajurca.
Ninan shinlli runacuna caballopi tiyarishpa calpanajujpimi, chashna uyarijurca.
23Mandaj Diospaj angelca,
Meroz shuti pueblotami, llaquichina shimicunahuan cashna nirca:
‘Chai pueblopi causajcunataca, ima llaquipash japishpachari alicaman ninguichi.
Paicunaca, Mandaj Dios cayajpica na shamurcachu.
Shinlli runacunahuan macanajungapa, Mandaj Dios cayajpica na shamurcachu’ nircami.
24Ceneo gentecunamanda, Heber shuti runapaj huarmi Jael shuti huarmica,
paipaj huasipi tucui huarmicunatapash yali alicachi tucushca cachun.
25Sísara runa yacuta mañajpica, Jael shuti huarmica lechetami cararca.
Mandajcunaman carana jatun tastapimi, llullu quesota cararca.
26Paica, tacashpa shayachina caspitami japirca.
Paica, ali maquipica tacana mazotami japirca.
Sísara runapaj umapimi shayachina caspihuan, tacarca.
Chai runapaj umapimi, alpacaman yalijta tacarca.
27Sísara runaca, paipaj ñaupajpimi curparishpa, alpapi shitarirca.
Paipaj chaquipimi curparishpa shitarirca.
Chaillapitami curparishpa ñapash huañurca.
28Sísara runapaj mamaca, huasimandami chapajurca.
Huacashpami, cashna nishpa caparijurca:
‘¿Imashpashi paipaj carretaca, na ucha shamun?
¿Imamandashi paipaj carretacuna na ucha chayamun?’ nijurcami.
29Chaita uyashpami, ali yachaita charij huarmicunapash cashna rimanajurca.
Paipaj mamapashmi, paillata cashna nijurca:
30‘Macanajuipi quichushcatami chaupirinajunga.
Chairalla viñai cuitsacunataca shuj shuj, na cashpaca ishcai ishcaimi japinajunga.
Sísara runamangarin, juyailla churajunatami cunajunga.
Manñacunata juyailla sirashca churajunatami cunajunga.
Ishcandi manñata bordashca churajunatami mandajcunamanga cunajunga’ ninajurcami.
31Mandaj Dioslla, canda fiñajcunaca tucuilla chashna tucurichun.
Ashtahuangarin, canda juyajcunaca, indi punchapamba llujshimujshna, punchapamba cachun” nishpami candanajurca.
Israelcunaca, macanajui illajpimi chuscu chunga huatacaman, ali causanajurca.
Who We AreWhat We EelieveWhat We Do
2025 by iamachristian.org,Inc All rights reserved.
