Psalms 12 - Quichua Imbabura 2016

Na ali gentecunamanda cachariringapa Diosta mañashcamandaTaquinata ali yachaj runaman, Seminit shuti taquipi candachijuchun, David rurashca Salmomi.

1Mandaj Dioslla, quishpichihuayari.

Na ali gentecuna mirashpami chaupipi churahuashca.

Candalla yarishpa causajcunaca ña tucurishcamari.

2Tucuicunallatami caishuj, chaishuj llullashpa parlanajun.

Mishqui shimi jayaj shungu cashpami,

shimihuanlla ninanda alicachishpa parlanajun.

3Mandaj Diosca, shimihuanlla alicachishpa parlajcunatapash,

jariyashpalla parlajcunatapash, tucuillatami tucuchinga.

4Paicunaca: “Ñucanchi rimashpami mishashunchi.

Ñucanchi shimihuan rimajujtaca ¿Pita upallayachingayari?” ninajurcami.

5Mandaj Diosca: “Huajchacunata llaquichijpi mañanajujpimi,

paicunamanda shayarishpa quishpichigrini” ninmi.

6Mandaj Dios rimashca Shimicunaca, mapa illajmi.

Pai rimashca Shimicunaca, alpa hornopi rupachishpa,

mapata anchuchishpa punchayachishca culquishnami.

Canchiscaman rupachishpa mapa illajta saquishcashnami.

7Mandaj Diosmi, paicunataca huacaichipangui.

Cai na ali miraimandaca, causaita causaicamanmi huacaichipangui.

8Na ali gentecunaca chaupipimi churahuashca,

chai gentecunaca, na alitallami ashtahuan alicachishpa catinajun.