HEBREOS 13 - Quichua Imbabura 2016

Crijcuna imashna causanamanda

1Tucuicunami, caishuj chaishuj juyarishpa causana canguichi.

2Huasipi mingachinataca na cunganachu canguichi. Ashtahuangarin huaquingunaca, na yachashpatami angelcunata mingachishca.

3Prezu tiyajcunatapash, paicunahuan prezu tiyajujshnami yarina canguichi. Ninanda llaquichi tucujcunatapash, canguna llaquita apanajunshnami yarina canguichi.

4Tucuicunami, cazaraitapash, cusa huarmi juyarishpa causanatapash ninanda alicachishpa pactachina canguichi. Nara cazarashpallata huainayajcunatapash, cazarashca jahua shujhuan causajcunatapash, Taita Diosmi ninanda llaquichinga.

5Ninanda charijyanataca na mascashpami, imaguta charishcahuanlla cushijushpa causana canguichi. Diosca cashnami nirca: “Candaca na jichushachu, na saquishachu” nircami.

6Shinamandami cushijushpa:

“Jatun Diosmi, ñucataca yanapajun.

Runacuna ima na alita ruranataca, napacha manllashachu” ni ushanchi.

7Cangunata michijcunataca yarinami canguichi. Paicunami Diospaj Shimita yachachirca. Paicuna imashna ali causashcatapash ricushpami catina canguichi.

8Jesucristoca, cainapash, cunambash, causaita causaicamambash Paillatami.

9Na rijsishca, panda yachachishcacunataca napacha catinachu canguichi. Diospaj ninan juyaihuanmi, cangunapaj shungutaca shinlliyachina canguichi. Micunatalla yariyashpa causanaca na alichu.

10Ñucanchica, shuj altartami charinchi. Carpa huasipi imatapash rurashpa causajcunaca, chai altarmanda japishpa micuitaca na ushanllu.

11Juchamanda apamushca animalcunapaj yahuartaca, sacerdotecunata mandajllami, Diospajlla shicanyachishca ucuman apan. Chai animalcunapaj aichataca carpa huasimanda canllapimi rupachin.

12Shinallatami Jesuspash, gentecunapaj juchacunata anchuchingapaca, pueblomanda canllaman llujchi tucushpa, yahuarta jichashpa huañurca.

13Ñucanchipash, carpa huasimanda llujshishpami, Jesuspajman quimirishpa, Paishnalla llaquicunata apana canchi.

14Cai pachapica, ashacamanlla causanajushpami, jipa causaita shuyanajunchi.

15Shinamandami, Taita Diostaca, animalcunata cushpa rupachijshna, punllandi ninanda alicachishpa causana canchi. Ñucanchi shimihuanmi Jesusmanda villashpa causana canchi.

16Shinallata, caishuj chaishuj yanaparinata, ima alita ruranataca napacha cunganachu canguichi. Chashna alita rurashcatami, Taita Diosca cushijushpa chasquin.

17Cangunata michijcunataca cazushpami, paicuna mandashcataca pactachina canguichi. Paicuna imatalla rurashcataca, Diosman ricuchina cashcamandami, cangunapaj almacunataca ricurianajun. Paicunapash na llaquirishpa, cushijuihuan Diospajta ruranajuchunmi, chashna cazuna canguichi. Na chashna cazushpaca, na alitami ruranguichi.

18Ñucanchimandaca Diosta mañapanguichi. Ñucanchipash ali yuyaihuan, tucuita aliguta rurangapami munanchi.

19Ashtahuambachaca, caimanda cangunapajman ñuca ucha tigrangapami, chashna ninanda mañapanguichi nijuni.

“Aliguta causapanguichi, Dios bendiciapachun” nishpami tucuchishca

20Ali causaiguta caraj Taita Diosmi, llamacunata jatun Michij ñucanchi Apunchi Jesucristotaca, huañushcacunapaj chaupimanda causachirca. Paimi yahuarta jichashpa, Dioshuan ari nishcataca, causaita causaicaman pactachirca.

21Diosllatami, alita rurashpa, Pai munashcashna pactachinajuchun ushaita carashca. Shinallata, Pai munashcashna ñucanchi imatapash Jesucristomanda rurachunmi yachachijun. Paica, causaita causaicaman ninanda alicachi tucushca cachun. Chashna cachun.

22Juyashca crijcuna, cangunata shinllita rimashpa yachachishcataca, ama fiñarishpa chasquipaichi. Cai asha quilcamushcataca, ali shunguhuambacha uyapanguichi nipanimi.

23Ñucanchi huauqui Timoteotaca, ñami prezumanda cacharishca. Chaitaca yachachunmi munani. Pai uchalla chayamujpica, cangunata ricungapa rishami.

24Tucuilla cangunata michijcunatapash, tucui crijcunatapash, “alillachu capanguichi” nijunmi nishpa villapaichi. Italia llactamanda crijcunapashmi, cangunataca “alillachu capanguichi” ninajun.

25Taita Diospaj ninan juyaica, tucui cangunahuan cachunmi munani. Chashna cachun.