APOCALIPSIS 21 - Quichua Imbabura 2016

Jahua pachapash, cai pachapash mushuj canamanda

1Jahua pachapash, cai pachapash mushuj cajtami ricurcani. Punda churashca jahua pachapash, cai pachapash illarcami, mama cuchapash ña na tiyarcachu.

2Juanmi cani. Taita Diospajlla shicanyachishca mushuj Jerusalén pueblotaca, jahua pachamanda urai shamujtami ricurcani. Chai puebloca, cusata cazarangapa juyailla alichirishca cuitsagushnami carca.

3Shinallata, jahua pachamandaca cashna nishpa ninanda caparijtami uyarcani: “Ricuichi, Taita Diosta yarina huasica, gentecunapaj chaupipimi shayajun. Paicunahuanmi,Taita Diosca pacta causajunga. Paicunaca Diospaj huahuacunami canga. Paicunapaj Taita Dios cashpami, paicunahuan causajunga.

4Paicunapaj huacashca viquitapash Taita Diosmi fichachijunga. Huañuipash, huacaipash, llaquipash, nanaipash, na ashtahuan tiyangachu. Punda chai llaquicunaca ña illangami” nircami.

5Mandangapa tiyarinapi tiyajujmi cashna nihuarca: “Ricui, Ñucami imatapash tucuita mushujta rurani” nihuarcami. Cutin cashnatapash nishpaca: “Cai Ñuca villajushca shimicunaca, na llulla cashpa; pactanapacha cajpimi quilcana cangui” nihuarcami.

6Shinallata, cashnatapashmi nihuarca: “Cashna nishcataca, ña pactachircanimi. Ñucami, A letrashna tucuita callarichijpash, Z letrashna tucuita tucuchijpash cani. Maijambash yacunayachijpica, causaita caraj pugyumanda yacugutami carasha.

7Na alita ruranata mishajllami, paiman tucui carashcata japinga. Ñucami, paipaj Taita Dios casha. Paica, Ñuca huahuami canga.

8Ashtahuangarin, tucui imatapash manllajcuna, napacha crijcuna, na alitalla rurashpa causajcuna, huañuchijcuna, huainayajcuna, brujucuna, rurashcalla dioscunata mañajcuna, llullacunaca, tucuillami azufrehuan rupajuj ninaman rinapacha canga. Chaica, jipa huañuimi canga” nihuarcami.

Mushuj Jerusalenmanda

9Chai jipallami, tucurimui punllacunapi llaquichinacunata jundachishca, canchis copacunata, canchis angelcuna charinajujta ricurcani. Paicunapuramanda shuj ángel shamushpaca: “Caiman shamui, ñucami Llamaguhuan cazaragrijuj cuitsagu imashna alichirishcata ricuchisha” nihuarcami.

10Shinallata, Diospaj Espiritumi, shuj jatun urcu jahuaman apahuarca. Chaiman apashpami, Diospajlla shicanyachishca Jerusalén jatun pueblotaca, Taita Diospaj jahua pachamanda urai shamujujta ricuchihuarca.

11Taita Dios punchapambagu cajpimi, chai pueblopash punchapambagu ricurijurca. Chai puebloca, ninan juyailla rumishna, jaspe rumishna, punchapamba espejoshnami ricurijurca.

12Chai puebloca, chunga ishcai pungucunahuan, jatun pircatapashmi charirca. Chai pungucunapica, chunga ishcai angelcunami shuj shujlla shayanajurca. Chai pungucunapica, taita Israelpaj chunga ishcai churicunapaj shuticunatami quilcashca tiyajurca.

13Quimsa punguca, indi llujshimujman, shuj quimsa punguca janajman, shuj quimsa punguca uraman, shuj quimsa punguca, indi huashajunmanmi carca.

14Pueblota muyushca jatun pircataca, chunga ishcai mulun rumi jahuapimi shayachishca carca. Chai rumicunaca, Llamagu villachun cachashca, chunga ishcai apostolcunapaj shuticunata quilcashcami carca.

15Ñucaman villaj angelca, pueblotapash, pueblota muyushca jatun pircatapash, pungucunandi tupungapami, shuj curi vara sucusta charijurca.

16Chai puebloca, chuscundimanmi ñaupajta charirca. Chuscundillatami chashnallata carca. Chai ángel, sucushuan tupujpica, ishcai huaranga ishcai patsaj kilometrotami charirca. Shinallata, largomambash, vichaimambash, anchomambash chashnallatami carca.

17Pueblota muyushca jatun pircata tupujpica, sucta chunga chuscu metro jatunmi carca. Runacuna alpata tupunshnami, angelpash chashna tupurca.

18Chai jatun pircataca, juyailla jaspe rumicunahuan rurashcami carca. Shinallata puebloca, curihuan rurashca, punchapamba espejoshnami carca.

19Pueblota muyushca jatun pircapaj mulun rumicunaca, tucui tiyashca juyailla rumicunata churashpa, juyaillaguta rurashcami carca. Callaripi churashca mulun rumica, jaspe, cati rumica, zafiro, ishcaipaj cati rumica, ágata, quimsapaj cati rumica, esmeraldami carca.

20Shinallata, chuscupaj cati rumica, ónice, pichapaj cati rumica, cornalina, suctapaj cati rumica, crisólito, canchispaj cati rumica, berilo, pusajpaj cati rumica, topacio, iscumbaj cati rumica, crisopraso, chungapaj cati rumica, jacinto, chunga shujpaj cati rumica, amatista shutimi carca. Chai tucui juyailla rumicunahuanmi rurashca carca.

21Chai chunga ishcai pungucunaca, chunga ishcai perlacunami carca. Chai chunga ishcai perlacunaca, pungucunami carca. Shinallata, pueblopi tiyaj ñambash, ashtahuan ali curihuan rurashca, punchapamba espejoshnami ricurijurca.

22Chai pueblopica, Diospaj huasica illarcami. Tucui ushaita charij Mandaj Taita Diospash, Llamagupash, Diospaj huasishnami carca.

23Chai puebloca, indipash, lunapash punchayachijuchunga na shuyanllu. Chai pueblotaca, Taita Diospash, Llamagupashmi, punchapamba michashna punchayachijun.

24Tucui llactacunamanda quishpirishca gentecunaca, chai pueblopaj michapimi purinajunga. Shinallata, cai pachapi jatun mandajcunapash, paicuna imata charishcatapash apashpami, alicachingapa rinajunga.

25Chaipica, tutapash na tiyajpimi, pungucunataca napacha vichashca canga.

26Shinallata, tucui llactacunapi causajcunapash, tucui imata charishcatapash apashpami, alicachingapa rinajunga.

27Ima mapapash, llullashpa ima na alita rurajcunapash, chai pueblopica napacha yaicungachu. Ashtahuangarin, causaita causagrinata villajuj libropi, paicunapaj shutita quilcashcacunallami yaicugringa. Chai librotaca, Llamagumi charijun.