ROMANOS 5 - Quichua Imbabura 2016

Ali cashcatalla rurashcatashnami Diosca chasquishca

1Jesusta crishcamandalla, alita rurashcatashna chasquijpimi, Apunchi Jesusmandaca, Taita Dioshuan cushijushpa causaita charinchi.

2Paita crishcamandami ñucanchica, shinllitapacha cati ushanajungapa Diospaj ninan juyaita japishcanchi. Shinallata, Taita Diospaj punchapamba llactapi causagrinata shuyanajushpami, ninanda cushijunajunchi.

3Na chaillachu, ashtahuangarin ninan llaquicunata apashpapashmi cushijunchi. Llaquicunaca, na ñapash fiñarishpa causanatami yachachijun.

4Na ñapash fiñarijlla cashpaca, llaquicunatapash mishanchimi, llaquicunatapash mishai ushashpaca, Dios carajpi japigrinatami shuyanchi.

5Chaita shuyanajushpaca, na pingai tucunachu canchi. Taita Diosca, Jucha illaj Espirituta cachamushpami, Paipaj ninan juyaita ñucanchi shungupi talijshna caramurca.

6Ñucanchillataca, imata na rurai ushanalla cajpimi, Cristoca, pai huañuna punllallata, tucui juchayujcunamanda huañurca.

7Ali cashcatalla ruraj runamandaca pipash na huañunmanllachu yanimi. Ashtahuangarin, ali shunguta charij runamandaca, “ñuca huañushallami” nishpa maijambash huañunmanllari.

8Ashtahuangarin Taita Diosca, Paipaj ninan juyaitami ñucanchiman ricuchimurca. Ñucanchi juchayuj cajpipash, Cristomi ñucanchita quishpichingapa huañurca.

9Cristopaj yahuarmandami, ñucanchitaca, alitalla rurajtashna ña chasquirca. Chai jahuami Diosca, ñucanchita fiñashpa llaquichinamandapash quishpichinga.

10Diosta fiñajcuna cashpapash, paipaj Churi Cristo huañujpimi, Taita Dioshuan ali tucurcanchi. Dioshuan ali tucushca cashpacarin, Cristo huañushpa causarishcamandami quishpichi tucushun.

11Na chaillachu, ashtahuangarin, ñucanchi Apunchi Jesucristomanda, Dioshuan ali tucushca cashpami, cunanga ninanda cushijunatapash charinchi.

Adanmandapash, Cristomandapashmi villajun

12Shinamandami, juchaca shujlla runamanda cai pachapi callarirca. Chai juchamandami, huañuipash callarirca. Shinami, juchata rurashcamandaca tucuicuna huañunata charinchi.

13Mandashca shimicuna nara tiyajpillatami, cai pachapica juchata rurai callarirca. Ashtahuangarin, mandashca shimicuna illajpica, “juchatami rurashcangui” nishpa juchachinaca illarcami.

14Shina cajpipash, Adanmanda callarishpaca, Moisés shamungacamanmi huañuica mandajurca. Na paishnalla juchata rurajcunatapashmi huañuica mandajurca. Adán runaca, shuj runa jipaman shamunatami ricuchijurca.

15Diospaj juyaica, juchata rurashcahuanga na chimbapuranllu. Shujlla runa Diosta na cazushcamandami, ashtacacuna huañurca. Chaitaca yalimi, Taita Diospaj ninan juyaipash, aliguta caramushcapash, ashtacacunapaj chayamurca. Paica, ninanda juyashpa caramushca Jesucristomi.

16Shujlla runa juchata rurashpa causajpipash, Diosca ashtahuan aligutami caramurca. Shujlla runa juchata rurashpa callarijpimi, ninanda llaquichi tucunapash callarirca. Ashtahuangarin ashtacacuna na cazujpimi, ali cashcatalla rurashcatashna chasquishpa, Diosca tucuicunaman juyashpa caramurca.

17Shujlla runa na cazuimandami, huañuica mandajurca. Ashtahuangarin chaitapash yalimi Jesucristomandaca, paihuanllata causashpa mandanajunga. Diospaj ninan juyaita, shinallata imatapash cashcatapacha ruranata chasquijcunami mandanajunga.

18Shina cashcamandami, shujlla runa na cazushcamanda, llaquichi tucunaca tucuicunapaj chayamurca. Shinallata, shujlla runa imatapash cashcatapacha rurangapa shamushcamandami, imatapash cashcatapacha rurashcatashna tucuicunata chasquishpa, causaita causagrinata cararca.

19Shujlla runa na cazujpimi, ashtacacuna juchayu tucushca. Shinallata shujlla runa cazushcamandami, ashtacacuna imatapash cashcatapacha rurajcuna tucunga.

20Mandashca shimicuna yaicumujpimi, juchaca ashtahuan mirarca. Jucha ashtahuan yaicumujpimi, Diospaj ninan juyaipash ashtahuan ninandapacha shamurca.

21Imashnami juchata rurajpi huañui mandajurca, shinallatami, Diospaj ninanda juyajuipash, imatapash cushcatapacha rurashcatashna chasquishpa, Ñucanchi Apunchi Jesucristomanda causaita causagrinata charichun mandajurca.