1Shina nijpimi Jobca, cashna nirca:
2“¡Ñuca llaquicunata, nanaicunata, pezashpachari ali canman.
Shinallata, tandachishpa balanzapi churashpachari ali canman!.
3Chashna ricujpica, mama cucha manñapi t'iyu alpatapash yali llashajmi canman.
Shinamandami na jarcarishpa rimarcani.
4Tucui ushaita charij Diospaj flechacunami chayamushca.
Chai venenoca, ñuca espiritucamanmi chayashca.
Taita Dios cachamushca llaquicunahuanmi macanajushpa causajuni.
5¿Sacha burruca, jihuapi shayajushpaca huacanllu?
¿Huagrapash, jihuata micujushpaca huacangachu?
6¿Cachi illaj micunataca, micurinllachu?
¿Lulunmanda yurajtalla micujpi alichu canga?
7Ñuca cai llaquicunata apanaca,
chashna cachi illaj micunashnami.
8¡Ñuca mañashcata pipash carangapa shamushpami ali canman!
¡Taita Diosca, ñuca munashcata pactachishpami ali canman!
9Taita Diosca, ñucata ñutushpachari ali canman.
¡Paipaj ushaihuan, ñucata tucuchishpachari ali canman!
10Ñucaca ninandachari cushijuiman.
Ama llaquishpa, ucha huañuna nanaihuan tucuchijpimi samaiman.
Jucha illaj Dios rimajuj shimimandapash, na pacajuimanllu.
11¿Ima ushaihuanda shinlli tucushpa shuyasha?
Cashnaca, ¿Imapata causashpa catishayari?
12¿Rumishna shinlli cai ushanichu?
¿Ñuca aichaca, bronce jirrushnachu?
13¿Nachu ima ushaipash illaj causajuni?
¿Ñucata yanapangapaca, pipash tiyangachu?
14Llaquita apaj runataca, paipaj cumbami yanapanga.
Tucuita rurai ushaj Diosta na manllajtapash, chashnallatami yanapanga
15Ashtahuangarin, ñuca huauquicunallatami yacu jatarinshna llaquichihuan.
Manllanayai jatun yacu yalijshnami llaquichihuan.
16Paicunaca, chiri chiri yacupi pacajushcashnami.
Shinallata, rasu quilpashcashnami.
17Chaicunaca, indi shitamujpica chinganllami.
Rupaipica chaquishpa chinganllami.
18Tandanajushpa rijushpapash, caiman chaiman rinllami.
Asha asha tucurishpa chinganllami.
19Chaitaca, Temán llactamanda runacunapash ricunajurcami.
Sabá shuti llactamanda runacunapash, chaitaca shuyanajurcami.
20Paicuna shuyanajushca yacu na ricurijpimi, pingai tucunajurca.
Chai yacucuna tiyaj pushtucaman chayashpapash, na tarishpami musparinajurca.
21Cunanga cangunapash, chashnallatami canguichi.
Jatun llaquita ricushpaca, manllaringuichimi.
22¿Cangunataca, imatapash apamuchun mañashcanichu?
¿Cangunapaj alpamandaca, imatallapash apamuichi nircanichu?
23¿Ñucata fiñajcunapaj maquimanda cacharichihuaichi.
Ñucata llaquichijcunapaj maquimanda cacharichihuaichi” nircanichu?
24Ñuca imapi pandashcatapash villahuaichi.
Chaita villajpica upalla cashallami
25¡Ali rimashca shimicunaca, cushichinmi!
Ashtahuangarin canguna rimashca shimicunaca, ¿Imapata ali cangayari?
26Ñuca rimashcatapash ¿yangapichu churanguichi?
Chai yangata rimashcacunaca, ¿nachu huaira apanalla?
27Cangunaca, taita mama illaj huahuatapash jatunguichillami.
Cangunapaj cumballata huashajuchunmi, utujuta allanguichi.
28Cunanga, ñuca ñavita ricungapa munashpaca ricuhuaichilla.
Cangunapaj ñaupajpi llullashpa nijujpipash, ricuhuaichilla.
29Cunanga, ali yuyaita japishpa, ima na alitapash na rimanachu canguichi.
Ñucataca, alitalla ruraj cashcata yachaichiyari.
30¿Ñucaca, na alitachu rimashcani?
Ali cajtapash, na ali cajtapash ¿nachu yachai ushani?
Who We AreWhat We EelieveWhat We Do
2025 by iamachristian.org,Inc All rights reserved.
