DANIEL 7 - Quichua Imbabura 2016

Chuscu animalcunata, muscuipishna ricushcamanda

1Babilonia llactata jatun mandaj Belsasar mandashpa callarijui huatapimi Danielca, shuj muscuita charirca. Paica, imatalla muscushcata yarishpami, villashpa quilcarca.

2Danielca cashnami nirca: “Ñucaca, tutami muscuipishna cashnata ricujurcani: Jahua pacha chuscundi manñamanda huaira shamushpami, mama cucha yacutaca caiman chaiman cuyuchijurca.

3Shinallata, chuscu jatun animalcunami, mama cuchamanda llujshirca. Chai animalcunaca, shujcunaca shuj, caishujcunaca shuj shicanpachami carca.

4Punda ricurij animalca, leonshnallami carca. Shinallata, jatun angapaj alastashnami charirca. Chaita ñuca ricujujpillatami, paipaj alastaca fitirca. Chai jipaca, shuj runatashna ishcai chaquihuan shayachishpami, gentepaj shunguta curca.

5Jipa ricurij animalca, ososhnallami carca. Paipaj huashaca, shujca ashtahuan vichai yalishcami carca. Paipaj shimipica, quimsa costillatami quiruhuan charijurca. Paitaca: ‘Jatari, ashtaca aichata micui’ nijtami uyarcani.

6Chai jipaca, leopardoshnalla animaltami ricurcani. Chai animalca, angapaj alastashnalla, chuscutami paipaj huashapi charirca. Shinallata, chuscu umatapashmi charirca. Paimanmi mandana ushaitapash curca.

7Chai jipaca, quimsapaj cati shuj animaltapashmi muscuipishna ricurcani. Chai animalca, manllanayai, ninan millai, ninan ushaita charijmi carca. Chai animalca, chunga cachucunatami charirca. Jatun jirru quirucunata charishpami, tucuita ñutushpa micujurca. Puchushcataca, paipaj chaquihuanmi sarushpa tucuchijurca. Chai animalca, punda ricushca tucui animalcunamandaca, shujpachami carca.

8Chai chunga cachu chaupimandaca, ñuca ricujujpillatami shuj uchilla cachu ñapash viñashpa, chai chunga cachumandaca, quimsa cachuta urmachirca. Jipa viñashca cachuca, gentepaj ñavitashnami charirca. Shimitapash, na ali shimicunallata rimaj shimitami charirca.

9Ñuca ricujujpillatami, mandangapa tiyarinacunata churarca. Chaipica, unai huatacunata charij shuj Rucugumi tiyarirca. Pai churajushcapash, rasushna yuraj yurajmi carca. Paipaj uma ajchapash, mapa illaj yuraj milmagushnami carca. Pai mandangapa tiyarinaca, rupajuj ninami carca. Chai tiyarinapaj pirurucunapash, rupajuj ninallatami carca.

10Paipaj ñaupajmandaca, ninami jatun yacushna llujshijurca. Huaranga huarangacunami, pai mandashcata ruranajurca. Shinallata, ashtaca huaranga huarangacunami, paita alicachishpa shayanajurca. Chai Rucugu tucuita ricushpa mandangapa tiyarishpami, tucuicunaman ima cuna cashcata cungapa librocunata pascajurca.

11Ñucaca, na ali shimicunatalla rimajuj cachutami ricujurcani. Shina ricujujpillatami, chai animaltaca huañuchishpa, paipaj aichataca ñutushpa, ninapi rupachinajuchun cunajurca.

12Caishuj animalcuna mandai ushanataca quichushcami carca. Shina cashpapash paicunataca, ashata causachun saquircami.

13Muscuipishna tuta ricujushpallatami, Runa Aichayujman rijchajca, unai huatacunata charij Rucugupajman fuyupi jahua pachamanda shamujujta ricurcani. Paitaca, chai Rucugupaj ñaupajmanmi pushanajurca.

14Runa Aichayujman rijchajca, tucui ushaihuan, llactacunata mandangapami ushaita chasquirca. Paitaca, tucui llacta gentecuna, shuj shuj rimaita rimajcunami tucuipi cazunajurca. Pai mandana ushaica, causaita causaicaman na tucurinami carca. Pai mandanaca napacha tucuringachu.

15Daniel ñucaca, chaicunata muscuipishna ricushpami, ñuca shungupica ninandapacha manllarishpa, imatapash na rurai ushajurcani.

16Chaimandami, chaipi shayajuj shuj runapajman quimirishpa, tucui chaicuna imalla cashcata villahuai nishpa mañarcani. Chashna nijpimi paica cashna nihuarca:

17‘Cai chuscu jatun animalcunaca, chuscu jatun mandajcuna cai pachapi mandangapa shamunatami ricuchijun.

18Paicunapaj jipaca, jahua pachapi causajuj Diospajlla causajcunami, llactataca causaita causaicaman mandangapa japinga’ nihuarcami.

19Shinamandami ñucaca, quimsapaj catipi ricushca animalca imapacha cajta yachangapa munarcani. Chai animalca, tucui caishuj animalcunamandaca shujpachami carca. Chai animalca, ninan millai, jirru quirucunata, bronce sillucunatami charirca. Chai animalca, tucuita ñutushpa micushpami, puchushcataca paipaj chaquihuan sarujurca.

20Shinallata, chunga cachucunata umapi charij animal ima cajtapashmi yachangapa munarcani. Chai animalpaj cachucuna chaupicunamanda, shuj uchilla cachu viñashpami, quimsa cachucunata urmachishca carca. Chai cachuca, ñavicunatapash, na ali shimicunatalla rimaj shimitapashmi charirca. Chai cachuca, caishuj cachucunataca yali jatunmi carca.

21Chai cachuca, Diospajlla causajcunahuan macanajushpa mishajtami ricurcani.

22Shina cajpimi, unai unai huatacunata charij Rucugu chayamushpa, jahua pachapi causajuj Diospajlla causajcuna ricushpa llaquichinajuchun ushaita curca. Diospajlla causajcuna llactata mandana punllacuna pactamujpimi ushaita japinajurca.

23Chaitaca, cashnami nihuarca: ‘Quimsapaj catipi ricushca animalca, quimsa jatun mandajcunapaj cati, cai pachapi mandana llactatami ricuchijun. Chai mandanaca, chaishuj mandajcunamandaca, shujpacha cashpami, tucui cai pachataca llaquichishpa, ñutushpa tucuchinga.

24Chunga cachucunaca, chai mandanamandaca chunga jatun mandajcuna mandanatami ricuchijun. Paicunapaj jipaca, punda tiyashca mandajcunamandaca shujpacha, shuj jatun mandajmi tiyaringa. Paimi, quimsa jatun mandajcunataca mishanga.

25Jahua pachapi causajuj Diostaca, na ali shimicunahuanmi rimajunga. Shinallata, jahua pachapi causajuj Diospajlla causajcunatapashmi, ninanda llaquichijunga. Diospajta imashna rurashpa causanatapash, Diospaj shimitapash, shujman tigrachingapami munanga. Diospajlla causajcunataca, quimsa huata chaupicamanmi, pai munashcata tucuita rurachinga.

26Ashtahuangarin, mandangapa Juez tiyarishpami, pai mandanataca causaita causaicaman tucuchinga.

27Tucui cai pacha llactacunata mandana ushaitami, jahua pachapi causajuj Diospajlla causajcunaman cunga. Shina cajpimi, causaita causaicaman mandanga. Shinallata, tucui cai pachapi mandajcunami tucuipi cazunajunga’ nihuarcami.

28Pai villashca shimicunaca caicunami carca. Chaicunata uyashpami, Daniel ñucaca ninanda manllarishpa, ñavipash shuj tucurcani. Shina cashpapash, tucui chaicunataca pimambash na villarcanichu” nircami.