EZEQUIEL 7 - Quichua Imbabura 2016

Tucurina punlla chayamunamanda

1Mandaj Diosca cashnami nihuarca:

2“Huañuna aichayuj runa, Israelcunapaj Mandaj Jatun Diosca cashnami nin, nishpa villagri: Cangunapaj tucurina punllacunaca ñami chayamujun. Cangunapaj tucurina punllacunaca, chuscundi suyucunamandami shamujun.

3Canguna tucui na alicunata rurashcamandami, ninandapacha fiñarishpa llaquichishpa tucuchisha. Canguna na alita rurashpa causashcamandami, chashna tucuchisha.

4Cangunataca, napacha llaquishpami tucuchisha. Canguna, na alita rurashpa causashcamandami chashna llaquichisha. Shina rurajpimi Ñucataca, Mandaj Dios cajta yachanguichi.

5Mandaj Jatun Diosca, cashnatapashmi nin: Jatun llaquicunami, cati cati chayamugrin.

6Canguna tucurinaca ñami chayamujun. Tucuilla tucurinaca, ñami chayamugrin.

7Israel llactapi causajcunalla, cangunata llaquichina punllacunaca ñapachami chayamujun. Urcucunapi cushijushpa caparingapa randica, jatun llaqui punllacunami chayamugrin.

8Ñuca, cangunata ninandapacha fiñarishpa llaquichina punllacunami ña chayamugrin. Chai punllacunapica, canguna na alita rurashcamandami, ninanda llaquichisha.

9Ñucaca, cangunataca napacha llaquishpami, tucuchisha. Canguna, na alita rurashpa causashcamandami, llaquichisha. Shina rurajpimi Ñucataca, Mandaj Dios cajta yachanguichi.

10Punllacunaca ñami chayamushca. Llaquichina punllapash ñami pactamushca. Israelcunaca, na cazushpami, ashtahuan na alitalla ruranajun.

11Ninan na alita rurashpa llaquichijcunallami ashtahuan mirashca. Paicunaca, ashtaca cashpapash, shujllapash na puchungachu. Paicunamandaca, pipash na huacangachu.

12Chai punllacunaca ñami chayamushca. Maijan imata randishpapash ama cushijuchun, maijan imata jatushpapash ama huacachun. Ñucaca ninanda fiñarishpami tucuicunata tucuchigrini.

13Imatapash jatuj runacuna causaj saquirishpapash, paicuna jatushcataca na tigrashpa japi ushangachu. Tucuicunata llaquichinata muscuipishna ricuchishcataca, na pipash jarcai ushangachu. Paicuna jatun na alita rurashcamandami, shujllapash na quishpiringa.

14Macanajuiman ringapa, trompetata huacachinajujpipash, pipash na ringachu. Ñucaca, tucuicunahuanmi ninandapacha fiñarishca cani.

15Pueblo canllaman saquirijcunaca, macanajuipimi huañunga. Pueblo ucupi saquirijcunaca, millai ungüihuan, yarjaihuanmi huañunga.

16Chai llaquicunamanda quishpiringapaca, urcuman rishpami palomacunashna pacajugringa. Paicunaca, paicuna na alita rurashcamandami, huacai huacai rinajunga.

17Tucuicunami ushai illaj saquirishpa, paicunapaj maquicunapash, chaquicunapash chujchunajunga.

18Cañamuta churajushpami, ninan manllaihuan purinajunga. Tucuicunami, paicunapaj ajchatapash ruturishpa, ninanda pingai tucushca purinajunga.

19Paicunapaj, culquitapash, curitapash, mapatashnami ñangunapi shitanajunga. Mandaj Dios ninanda fiñarishpa llaquichijui punllapica, paicunapaj culquipash, curipash na quishpichingachu. Chai tucui charishcacunahuan pundacuna jariyanajushcapash, yangallatami canga.

20Tucui imatalla juyailla charishcacunahuan jariyashpa, rurashcalla dioscunata rurashcamandami, chashna llaquichisha. Tucui imatalla juyailla charishcacunaca, imapapash na alichu carca.

21Caru llactamanda, na rijsishca runacuna shamushpa tucuita quichushpa apachunmi saquircani. Chai na ali runacuna, cai llactaman shamushpami, cai pueblotaca na alicunata rurashpa mapayachinga.

22Israel gentecunata Ñuca jichujpimi, Ñucapajlla shicanyachishca huasiman shuj llactamanda runacuna yaicushpa, na alicunata rurashpa mapayachinga.

23Canga, cadenacunata apamuilla. Cai llactapica, ashtaca huañuimi tiyan. Cai pueblopica, ninan macanajuimi tiyan.

24Na ali gentecunatami, shuj llactamanda caiman pushamusha. Chai runacunami, cangunapaj huasicunata quichushpa causanajunga. Ninan ushaita charijcuna jariyashpa causanapash tucuringami. Paicuna rurashca dioscunapaj huasicunapash, yangapimi churai tucunga.

25Tucuillata tucuchingapami shamunga. Tucuicunahuan ali causaita charingapa munashpapash, napacha ushangachu.

26Jatun llaquica, cati catimi shamunga. Llaquicunatallami maipipash villanajunga. Ñucamanda villaj profetacunapash na tiyangachu. Yachachij sacerdotecunapash illangami. Ali yuyaicunata cuj, mandaj rucucunapash illangami.

27Jatun mandajpash, cati mandajpash, llaquilla cajta ricuchij churajunatami churajunga. Cai llactapi causajcunapash, tucuicunami ninan manllaihuan purinajunga. Paicuna imashna na alita rurashpa causashcamandami, chashnallata paicunatapash llaquichisha. Chashna rurajpimi Ñucataca, Mandaj Dios cajta yachanga” nihuarcami.