Psalms 51 - Quichua Imbabura 2016

Ñuca juchata perdonahuai nishpa mañashcamanda(2 Sam. 12:1-15)Betsabé huarmihuan, David pacta puñushca jipa, profeta Natán, Davidpajman shamushcamanda. Candajcunata mandaj candachijuchun, David rurashca Salmomi.

1Taita Dioslla,

Can ninan juyaita charishcamanda llaquihuayari.

Can imashna ninanda llaquin cashcashnallata, ñuca juchacunata anchuchipayari.

2Ñuca juchataca, ashtahuan ashtahuan maillahuayari.

Ñuca juchataca anchuchipayari.

3Ñucaca, juchayujpacha cashcatami yachapani.

Juchata rurashcataca, na cungai ushashpami ninanda llaquirijuni.

4Juchata rurashpaca, Candami ninanda fiñachipashcani.

Cambaj ñaupajpimi, chai jatun na alitaca rurashcani.

Canga, llaquichina cajpillatami llaquichihuashcangui.

Ñuca juchamandallata llaquichishcataca, imata nitapash na ushapanichu.

5Ñuca mamapaj vijsapi cajpillatami, juchaca ñucapi cashca.

Ñuca mamapaj vijsamandaca, juchayujmi huacharishcani.

6Canga, na llullashpa causajcunatami ninanda juyangui.

Chaimandami, tucuita ali yachachihuarcangui.

7Ñuca juchataca, hisopo malquihuan fichashpa anchuchipayari.

Can maillajpimi, rasutapash yali yuraj tucupasha.

8Ninan cushijuita carahuayari.

Chashna rurajpimi, llaquichishca cajpipash, cutin cushijuita charisha.

9Ñuca juchacunataca, ama ricupaichu.

Na alita rurashcataca, tucuilla anchuchipayari.

10Taita Dioslla,

ñuca shungupica, ima mapapash illajta rurahuayari.

Ñucamanga, aligutalla ruraj espirituta cutin carahuayari.

11Cambaj ñaupajmandaca, ama anchuchihuaichu.

Cambaj jucha illaj Espiritutapash, ñucamandaca ama anchuchipaichu.

12Can quishpichijpi cushijunataca, cutinllata cuhuayari.

Ñuca causaipica, Can shinllichishpa charihuanguiyari.

13Shina rurajpimi, na ali gentecunataca, Canda cazushpa causanata yachachisha.

Juchata rurajcunaca, Cambajman tigrarinajungami.

14Ñucata quishpichij Taita Dioslla,

huañunamandaca jarcahuayari.

Can alitalla ruraj cashcatami, ñuca shimihuanga candasha.

15Jatun Dioslla,

ñuca shimita pascahuayari.

Shina rurajpimi Candaca, tucuicunapaj ñaupajpi alicachijusha.

16Canga, animalta cushpa ñuca huañuchijuchumbash,

animalta Canman cushpa tucuillata rupachijuchumbash na munanguichu.

17Taita Dioslla,

ninanda llaquirishpa Cambaj ñaupajman shamujcunatami chasquipangui.

Taita Dioslla,

shungumanda ninanda llaquirishpa shamujcunataca, chasquipanguimi.

18Sion pueblopica, Cambaj juyaihuan alita rurapayari.

Jerusalén muyundipica, pircacunata shayachipayari.

19Chashna rurajpimi, animalcunata Canman carashpa huañuchishcapash ali ricuripanga.

Animalta, Canman cushpa tucuillata rupachishcatapash,

ofrendacunatapashmi ali chasquipangui.

Shina cajpimi, Cambaj altarpica, shicucunata canman cushpa rupachinajunga.