1Job runaca cashnami nirca:
2“Cunambashmi ninan llaqui shunguhuan rimagrini.
Ñuca huacaitapash yalitami, Diosca llaquichihuajun.
3¡Taita Dios maipi cajta yachashpaca,
Paipaj ñaupajmanmi riman!
4Paipaj ñaupajpimi tucuita villaiman.
Ñuca shimihuanga tucuitami villaiman.
5Pai imatalla nijpica tucuitami ali yachaiman.
Pai imatalla nishcatami yuyaipi ali japiman.
6¿Ñucataca, shinllita rimashpachu tigrachinman imashi?
Napacha chashna ruranmanllu.
Ashtahuangarin Paica llaquishpami uyahuanman.
7Alitalla ruraj runaca, chaipimi Diosman tucuita villai ushanga.
Juezpaj ñaupajmandaca, na ashtahuan juchachijpimi llujshinman.
8Indi llujshimujman rishpapash, Paitaca napacha tarishachu.
Indi huashajunman rishpapash, napacha tuparishachu.
9Diospaj ushaita janajman ricuchijpipash, na ricui ushashachu.
Uraman pacajujpimi, na ricui ushasha.
10Ashtahuangarin Paica, ñuca causaitaca, tucuitami rijsin.
Pai, ima llaquita cujpipash, curishnami ricurisha.
11Ñucaca, Paitami catijurcani.
Paipaj ñanda aliguta catijushpami, napacha anchurircani.
12Paipaj shimihuan mandashcataca, tucuitami pactachijurcani.
Paipaj mandashca shimicunataca, micunatapash yalimi munarcani.
13Ashtahuangarin, Pai imatapash rurangapa munajpica,
¿pita shujman tigrachi ushangayari?
Pai imata rurangapa munashcataca rurarcallami.
14Paica, ñucata imatalla rurangapa munashcataca pactachingami.
Paica, chashna ruranataca ashtacatami charin.
15Chaimandami, Paipaj ñaupajpica ninanda manllani.
Pai imashna cajta yarishpacarin, chujchurinimi.
16Taita Diosmi, ñuca shungupica manllachihuarca.
Tucuita rurai ushaj Diosmi, ninanda manllachishpa charihuajun.
17¿Imashpata yana yana tutapillata na huañurcani?
¿Imashpata ñuca ñavica, yana tutahuan na quilpai tucurca?
Who We AreWhat We EelieveWhat We Do
2025 by iamachristian.org,Inc All rights reserved.
