1Mandaj Diosca, cutinmi cashna nihuarca:
“Cambaj huarmica, shujhuanmi juyarishpa causajun.
Shina cajpipash chai huarmitaca juyanami cangui.
Israel gentecunataca, Mandaj Dios Ñucaca chashnami juyani.
Chai gentecunataca rurashcalla dioscunata mañashpa causajpipashmi juyani
Shinallata, uvata chaquichishpa rurashca, mishqui tandacunatami ninanda munashpa ricunajun” nihuarcami.
2Shina nijpimi chai huarmitaca, ñucapajlla cachun randircani.
Paimandaca, chunga picha culquita,
shinallata, quimsa patsaj kilo cebadatapashmi curcani.
3Chai jipaca cashnami nircani:
“Canga, ashtaca punllacunatami ñucahuan causangui.
Shuj jaricunahuanga na huainayanachu cangui.
Ñucapajpash, canllami ñuca huarmi cangui” nircanimi.
4Israelcunaca, ashtaca punllacunatami jatun mandajpash, cati mandajpash illaj causanga.
Diosman animalta cushpa huañuchinapash illangami.
Rumicunapash, efodpash, terafín dioscunapash illajmi causanajunga.
5Chai jipami Israelcunaca na alita ruranajushcataca saquinajunga.
Paicunapaj Mandaj Taita Diostami mascanajunga.
Jatun mandaj Davidtapashmi mascanajunga.
Tucurimui punllacunapi alicunata japinata yachashpami, Mandaj Diostaca manllashpa causanajunga.
Who We AreWhat We EelieveWhat We Do
2025 by iamachristian.org,Inc All rights reserved.
