MATEO 20 - Quichua Imbabura 2016

Uvata pallajcunamanda

1Jahua pachapi Dios mandajuj llactaca, shuj huasiyuj taitashnami. Chai runami, uva chagrapi pallachun runacunata mascangapa, tutamandata rirca.

2‘Shuj punllata pallashpa chishajpica, shuj denario culquitami cupasha’ nishpami, chai runaca pallajcunahuan ari nirirca. Ña ari nijpimi, paipaj chagrapi uvacunata pallachun cacharca.

3Chai runaca, cutinmi iscun pacha ña tucunallapica, plazaman tigrarca. Chaipica, yanga tiyanajuj runacunatami ricurca.

4Chaicunata ricushpaca: ‘Ñuca chagrapi uvacunata pallangapa, ¿nacha cangunapash ripanguichiman? Cuna cashcatapachami cupasha’ nirca. Shina nijpimi, paicunaca rirca.

5Chai runaca, chaupi punllapipash, ña quimsa pacha chishi tucujujpipash, cutinmi chashnallata mascangapa rirca.

6Shinallata, ña picha pacha chishi tucujujpipash, cutinmi plazaman rirca. Chaipica, yanga tiyashpa chishanajuj shuj runacunatami ricurca. Paicunatapash: ‘¿Imashpata chashna chishanajunguichi?’ nishpami tapurca.

7Shina tapujpica: ‘Imata ruranapash na taririjpimi, cashna chishanajunchi’ ninajurcami. Shina nijpimi: ‘Ñuca chagrapi uvacunata pallangapa, ¿nacha cangunapash ripanguichiman? Cuna cashcatapachami cupasha’ nirca.

8Ña tutayajujpimi, chagrayuj taitaca, mayordomota cashna nirca: ‘Pallajcunata cayashpa, jipa shamujmandara callarishpa, punda shamujcunamambash cungui’ nirca.

9Ña shamujushpaca, chishipi yaicujcunara punda shamushpami, shuj denario culquitaca japinajurca.

10Pallangapa punda yaicujcunapash shamushpaca: ‘Ñucanchicarin ashtahuanmi japishun’ yashpami shuyanajurca. Ashtahuangarin paicunapash, shujlla denario culquitami japinajurca.

11Chashna japishpami, chagrayuj taitataca, fiñarishpa rimashpa,

12cashna ninajurca: ‘Caicunaca, chairalla yaicumushpa, shuj horastallamari pallanajurca. Ñucanchicarin, ninanda shaijushpa rupaipipash llaquinayaitami pallashpa chisharcanchi. ¿Imashpata paicunamambash, ñucanchimambash chashnallata cungui?’ ninajurcami.

13Chashna nijpimi, chagrayuj taitaca, paicunapuramanda shuj runataca, cashna nirca: ‘Candaca, ima na alitapash na rurashcanichu. ¿Nachu shuj denario culquita cusha nijpi, canga ari nihuarcangui?

14Can japina cashca culquitaca japishpa rilla. Cambaj jipa shamujmambash, canmanshnallatami cungapa munani.

15¿Nachu ñuca charishcataca, ñuca munashcata ruranalla cani? ¿Na cashpaca, ali shunguta ñuca charijpichu, paica ama chashnallata japishcanman yashpa fiñahuangui?’ nircami.

16Chashnami, pundapi churai tucushcacunaca, huashaman churai tucunajunga. Shinallatami, huashaman churai tucuncunapash, pundapi churai tucunajunga. Ashtacacunami cayai tucunajun, shina cashpapash, huaquingunallami agllai tucushca” nijurcami.

Jesusca, Pai huañunatami cutin villashca(Mar. 10:32-34; Luc. 18:31-34)

17Jesusca, Jerusalenman vichai rijushpami, Paipaj chunga ishcai yachajujcunatalla pushashpa, ñambi cashna nirca:

18“Cunanga, Jerusalenmanmi vichai rinajunchi. Chaipimi, Runa Aichayuj tucushca Ñucataca, sacerdotecunata mandajcunapajman, mandashca Shimita yachachijcunapajman japishpa apanga. Paicunami, ‘huañunapachami cangui’ nihuanga.

19Shinallata, na Israelcunapaj maquipimi churahuanga. Paicunami, Ñucataca na alicachishpa, astishpa, cruzpi chacatashpa huañuchihuanga. Ashtahuangarin quimsa punllahuanga causarishallami” nircami.

Santiagopash, Juanbash mañashcamanda(Mar. 10:35-45)

20Chai jipami, Zebedeopaj huahuacunapaj mamaca, paipaj churicunandi, Jesuspajman quimirishpa, Paipaj ñaupajpi cungurishpa shuj mañaita rurarca.

21Shina mañajpimi:

“¿Imagutata munanguiyari?” nishpa, Jesusca tapurca.

Shina tapujpimi, chai huarmica:

“Can mandangapa tiyarishpaca, cai ñuca ishcai churicunataca, shujtaca ali maquiman, shujtaca lluquiman tiyachipangui” nishpami mañarca.

22Shina nijpimi Jesusca cashna nirca:

“Na yachaimandami, chashna mañahuanguichi. ¿Cangunaca, Ñuca ufiana vasomanda ufiai ushanachu canguichi? ¿Ñuca bautizarijshna bautizari ushanachu canguichi?” nircami.

Shina tapujpimi paicunaca:

“Ari, ushapashunllami” ninajurca.

23Shina nijpimi Jesusca cashna nirca:

“Ñuca vasomandaca ufianguichipachami. Ñuca bautizarijshna bautizaritapash ushanguichimi. Shina rurajpipash, Ñuca ali maquiman, lluqui maquiman tiyarinataca, na Ñuca cunachu cani. Ashtahuangarin maijanman cashpapash, Ñuca Taita alichishcamanmi cunga” nircami.

24Chaitaca caishuj chungapuracuna uyashpami, chai ishcai huauquicunataca ninanda fiñarca.

25Chaimi Jesusca, paicunata cayashpa cashna nirca:

“Llactacunata mandajcunallami, chai llactapi causajcunataca, ninanda mandashpa charin. Shinallata, ashtahuan mandai ushajllami, caishujcunatapash mandanajun. Chaitaca, cangunallata yachanguichimi.

26Cangunapurapica, na chashna tucungachu. Maijambash mandaj tucungapa munashpaca, shujpajta rurashpa causachun ninimi.

27Cangunapurapi maijambash pundapi cangapa munashpaca, shujcunapajta rurashpa causachun ninimi.

28Runa Aichayuj tucushca Ñucapash, shujcuna Ñucaman ruranajuchunga na shamurcanichu. Ashtahuangarin, Ñuca shujcunaman rurashpa, shujcunamanda huañushpa, ashtacacunata quishpichingapami shamurcani” nijurcami.

Ishcaipura ñausa runacunatami Jesusca alichishca(Mar. 10:46-52; Luc. 18:35-43)

29Jericó pueblomanda, paicuna llujshishpa rinajujpica, ashtaca gentecunami catinajurca.

30Chai ñan manñapica, ishcaipura ñausa runacunami tiyanajushca carca. Paicunaca: “Jesusmi shamujun” nijta uyashpami:

“¡Taita Davidpaj Churi, Apunchi Jesús, ñucanchitaca llaquihuaiyari!” nishpa ninanda caparinajurca.

31Shina caparinajujpimi:

“¡Upalla caichi!” nishpa, gentecunaca shinllita rimanajurca.

Shina jarcajpipash:

“¡Taita Davidpaj Churi, Apunchi Jesús, ñucanchitaca llaquihuaiyari!” nishpami, ashtahuan caparinajurca.

32Shina caparinajujpimi Jesusca shayarishpa, paicunata cayashpa:

“Cangunaca, ¿imatata rurachun munanguichi?” nishpa tapurca.

33Shina tapujpimi paicunaca:

“Ñucanchi ñavicuna ricuchun alichihuai Apunchi Jesús” ninajurca.

34Shina ninajujpimi, Jesusca ninanda llaquishpa, paicunapaj ñavipi tacarirca. Shina tacarijpica, chai ñausa runacunaca ñapash ali tucushpami, Jesusta catishpa rinajurca.