JEREMÍAS 44 - Quichua Imbabura 2016

Egiptopi causanajuj, Judá llacta runacunaman Jeremías villashcamanda

1Judá llacta runacunaca, Egipto llactapi causanajushpaca, Migdol, Tafnes, Menfis, Patros shuti pueblocunapimi causajunajurca. Paicunamanda, Mandaj Dios villashcatami, Jeremiasca cashna nishpa villajurca:

2“Tucuita Mandaj, Israelcunapaj Taita Diosca, cashnami nin: ‘Jerusalenbi causajcunatapash, Judá llactapi tiyaj pueblocunapi causajcunatapash, ñuca ninanda llaquichijtaca, cangunallata ricurcanguichimi. Chai pueblocunaca, cunangamanmi, pipash na chaipi causajpi, jichushca tiyanajun.

3Paicunaca, rurashcalla dioscunamanra, inciensota cushnichinajushpami, Ñucataca ninandapacha fiñachihuarca. Paicunapash, paicunapaj ñaupaj taitacunapash, na rigsishca dioscunatara alicachinajujpimi, chashna llaquichircani.

4Chashna cajpipash, Ñucapajta ruraj profetacunata cati cati cachamushpami, cashna villajurcani: Ñuca na ricunayachishca chashna na alicunataca, napacha ruranachu canguichi nishpa villachunmi cachamurcani.

5Ashtahuangarin, paicuna na alita rurashpa causanajushcata saquishpa Ñucapajman tigraringapaca, napacha munarcachu. Chaimandami, rurashcalla dioscunaman inciensota cushnichinatapash na saquinajurca.

6Shinamandami Ñucaca, Judá llacta pueblocunapi causajcunahuambash, Jerusalenbi causajcunahuambash, nina japirinshna, ninandapacha fiñarircani. Shina cajpimi, chai pueblocunaca, cunan punllacaman, pipash na causajpi, jichushca sirinajun’ ninmi” nishpami villajurca.

7Cunanga, tucuita Mandaj, Israelcunapaj Taita Diosca cashnami nin: “¿Imashpata cangunallata llaquita apangapa, chashna na alitaca ruranajunguichi? Caita rurashcamandaca, jaripash, huarmipash, huambrapash, chuchujuj huahuapash huañushpami, Judá llactapica shujllapash na saquirishpa, tucuilla tucuringa.

8Egipto llactapi causangapa yaicumushpaca, cangunapaj maquihuanllata rurashca dioscunaman inciensota cushnichishpa, Ñucata ninandapacha fiñachishcamandami, cangunataca llaquichishpa tucuchisha. Shinamandami cangunaca, shuj llactacunapi causajcuna, ninanda na alicachijpi causanguichi.

9Cangunapaj ñaupa taitacunapash, Judá llactata jatun mandajcunapash, paicunapaj huarmicunapash, cangunapaj huarmicunapash, Judá llactapi, Jerusalén pueblopi jatun na alita rurashpa causashcataca, ¿Nachu yaringuichi?

10Chashna cashpapash, na pingashpa, manllaitapash na charishpa, Ñuca mandashca shimicunatapash na cazushpami, cunan punllacaman causanguichi. Chai mandashcacunataca, cangunapaj ñaupaj taitacunamambash, cangunamambashmi curcani” ninmi.

11Shinamandami tucuita Mandaj, Israelcunapaj Taita Diosca, cashnatapash nin: “Cangunatapash, Judá llactapi tucui causajcunatapash tucuchingapami, ninandapacha fiñarishpa llaquichingapa ricujuni.

12Judá llactapi causaj huaquinlla saquirishca runacuna, Egipto llactapi causangapa rishcacunaca, tucuillami huañuchi tucunga. Paicunaca, yarjaihuan, espadahuanmi, uchillamanda callarishpa rucucunacaman huañuchi tucunga. Chaipimi, ninanda na ricunayachijpi, ninan manllaihuan, na ali shimicunahuan rimai tucushpa causanajunga.

13Egipto llactapi causangapa shamujcunataca, Jerusalenbi llaquichishcashnami, espadahuan, yarjaihuan, jatun ungüihuan llaquichisha.

14Huaquinlla saquirishca, Judá llacta runacuna, Egipto llactaman rishcacunaca shujllapash na quishpiringachu. Judá llactaman tigrangapaca, shujllapash na causangachu. Paicunaca, Judá llactaman tigrangapa munashpami, ninanda llaquirishpa causanajunga. Shina cajpipash, pacajushpa huaquin llujshijcunallami tigrai ushanga” ninmi.

15Chashna villajpimi, paicunapaj huarmicuna rurashcalla dioscunaman inciensota cushnichishcata yachaj runacunapash, chaipi tandanajushca huarmicunapash, ashtaca gentecunapash, Egipto llactapillata causaj gentecunapash, Patros shuti pueblopi causajcunapash, Jeremiastaca cashna ninajurca:

16“Mandaj Diospaj shutipi can villashcataca, napacha cazuringachu.

17Ashtahuangarin ñucanchi shimihuan imata rimashcatami rurashpa causashun. Ñucanchi ñaupa taitacunapash, jatun mandajcunapash, cati mandajcunapash, Judá llactapi tiyaj pueblocunapi, Jerusalén ñangunapica, jahua pachata mandaj huarmi diosmanmi, inciensota cushnichij carcanchi. Vinotapash carashpami, talin carcanchi. Chashna rurashpami, ashtaca granocunata charircanchi. Ima llaquitapash na ricushpami, cushijushpa causanajurcanchi.

18Ashtahuangarin, jahua pachata mandaj huarmi diosman inciensota cushnichinatapash, vinota carashpa talinatapash saquishca punllamandapachami, tucui imapash illaj causanajunchi. Chaimandami, espadahuan, yarjaihuan huañushpa tucurinajunchi.

19Jahua pachata mandaj huarmi diosman inciensota cushnichishpa, vinotapash talishpa carashpa, tortillacunata rurashpa cushpaca ¿Nachu ñucanchi cusacuna yachajta ruraj carcanchi?” ninajurcami.

20Chaimandami Jeremiasca, jaricunata, huarmicunata, tucui chaipi gentecunataca cashna nijurca:

21“Cangunapaj ñaupa taitacunapash, jatun mandajcunapash, cati mandajcunapash, Judá llactapi causajcunapash, Judá llacta pueblocunapi, Jerusalén ñangunapi, rurashcalla dioscunaman inciensota cushnichishcataca, Mandaj Diosca, ¿Cungashcangachu?

22Chashna na alita rurashcataca, Mandaj Diosca napacha cungashpami llaquichinga. Chaimandami, cangunapaj llactaca llaquinayaita tucuchishpa, ninan manllaihuan, na ali shimicunata rimajpi causachun saquishca. Shina cajpimi, pipash na causajpi, jichushca sirijun.

23Cangunallatami, Mandaj Diosta fiñashpa, rurashcalla dioscunamanra inciensota cushnichishpa juchata rurarcanguichi. Mandaj Dios mandashca tucui Shimicunatapash na cazujpimi, cangunataca cunangaman chashna llaquichijun” nijurcami.

24Jeremiasca, chaipi gentecunatapash, ashtahuangarin tucui huarmicunatami cashna nijurca:

“Egipto llactapi causanajuj, Judá llactamanda tucui gentecuna, Mandaj Dios rimashcata uyaichi.

25Tucuita Mandaj, Israelcunapaj Taita Diosca, cashnami nin: ‘Cangunaca, cangunapaj huarmicuna rimashcataca, pactachishun nishpami cashna nishcanguichi: Jahua pachata mandaj huarmi diosmanmi inciensota cushnichishun. Vinotapash carashpa talishun nishcataca, pactachishunmi ninajurcanguichimi. Cangunaca, chaitapacha rurashpami causanajunguichi’ ninmi.

26Shina cashcamandaca, Egipto llactapi causanajuj, Judá llactamanda tucui gentecuna, Mandaj Diospaj Shimita uyaichi: ‘Mandaj Dios Ñucami, cashna nishpa juramenturcani: Egipto llactapi causanajuj, Judá llactamanda maijan runacunapash, Mandaj jatun Diosca causajmi nishpaca, na ashtahuan mañanajungachu.

27Paicunaman alita rurangapa randica, jatun llaquitami cachamugrini. Egipto llactapi causanajuj Judá llactamanda runacunataca, espadahuan, yarjaihuan huañuchishpami tucuchisha.

28Espadahuan huañunamanda quishpirij huaquin runacunallami, Egipto llactamandaca, Judá llactaman tigranajunga. Chaita ricushpami, Judá llactamanda, Egiptoman shamushpa causajcuna rimashcata, na cashpaca Ñuca rimashca Shimicuna pactashcataca yachanajunga.

29Mandaj Dios Ñuca rimashca Shimicuna pactashcata yachachunmi, cai llactapi cajpillata llaquicunata cachamugrini. Chashna rurajta ricushpaca, Ñuca imata nishcatapash, pactachijpacha cashcatami yachanguichi’ ninmi Mandaj Diosca.

30Mandaj Diosca, cashnatapashmi nin: ‘Judá llactata jatun mandaj Sedequías runataca, paita fiñashpa huañuchingapa munajuj, Babilonia llactata jatun mandaj Nabucodonosor runapaj maquipimi churarcani. Shinallatami, Egipto llactata jatun mandaj Hofra shuti Faraondaca, paita fiñashpa huañuchingapa munaj runapaj maquipi churani’ ninmi” nijurcami.