1Temán shuti llactamanda Elifaz shuti runami cashna nishpa tigrachirca:
2“Runaca, Taita Diospaca ¿imapata ali canga?
Ashtahuangarin alipacha imata yachajushcapash, paipaj alipajllami canga.
3¿Can imatapash alita rurashcamandachu, tucuita rurai ushaj Diosca cushijunga?
¿Imatapash alitalla rurashcamandachu, Paica canhuan canga?
4¿Can ali cashcamandachu llaquichijun?
¿Can, Paita manllashpa ali causashcamandachu llaquichijun?
5Can na alita rurashcacunaca ashtacapachami.
Cambaj juchata ricujpica, na tucuringachu.
6Cambaj huauquicuna, imata charishcatapash yangamandami quichurcangui.
Huajcha gentepaj churajunatami quichurcangui.
7Shaijushca runamambash yacutaca na cararcanguichu.
Yarjachijuj runamambash, micunataca na cararcanguichu.
8Ashtahuangarin ninan ushaita charij runallami, alpataca japirca.
Alicachi tucushca runaca, chaipimi causarca.
9Sapalla mamacunatapash, tucuilla quichushpami calpachircangui.
Taita mama illaj huahuacunatapash, ninandami llaquichircangui.
10Shinamandami candaca, huascahuan huatanshna llaquichinajun.
Chai llaquicunami, candaca cungashcapi manllachijun.
11Ninanda yanayajpimi, na ashtahuan ricungui.
Manllanayai yacumi, candaca quilpanga.
12Taita Diosca, ¿nachu jahua pachapi tiyajun?
Ricui, luzerocunapash jahuamandami punchayachinajun.
13Chashna cajpipash: ‘Taita Diosca, ¿imatata yachan? nijunguimi.
Yana tutapica, ¿imashnata ricushpa llaquichingayari? nijunguimi.
14Fuyu quilpajpica, Paica na ricungachu.
Jahua pachapillami purijun’ nijunguimi.
15¿Na alita ruraj runashnachu, cambash catingapa munangui?
Na ali gentecunami chai ñandaca catinajushca.
16Paicunaca, punllapash nara pactajpillatami huañunga.
Huasichingapa churashca rumicunata, yacu apashcashnami tucunajurca.
17Paicunaca, Taita Diostaca: ‘Ñucanchimanda anchuri’ ninajurcami.
Tucuita rurai ushaj Diosca, ¿paicunataca imatashi rurarca?
18Paicunapaj huasipica, tucui ima munashcatami jundachishca carca.
Ashtahuangarin, paicunashnalla cangapaca na munanichu.
19Na alita ruraj runacuna llaquita apanajujpimi,
alita ruraj runacunaca cushijunga.
Na alita ruraj runaca, asishpami cashna nijunga:
20‘Ñucanchita fiñajcunataca, tucuchishcami.
Paicuna imata charishcapash, ninapimi rupashpa tucurishca’ nijungami.
21Cunanga, Dioshuanmi ali tucuna canguichi.
Shina rurashpami, ali causaita charinguichi.
Paimandami, ima alipash cambajman shamunga.
22Cunanga, Paipaj shimihuan imata mandashcami cazuna canguichi.
Paipaj shimitami, cambaj shungupi alichina canguichi.
23Tucuita rurai ushaj Diospajman tigrarijpimi, candaca jatarichinga.
Cambaj huasimanda llaquitapash tucuillami anchuchinga.
24Canga curitaca, alpatapash yalimi charingui.
Ofir shuti llactamanda curitaca, huaicu yacupi tiyaj rumitashnami charingui.
25Tucuita rurai ushaj Diosmi, canmandaca shayaringa.
Culquitapash, ashtacatami charingui.
26Shina charishpami, Tucuita Rurai Ushaj Dioshuan cushijungui.
Cambaj ñavihuanmi Taita Diostaca vichai ricungui.
27Can Paita mañajpica, uyangami.
Paiman imata cusha nishcataca pactachinami cangui.
28Can imata rurangapa callarijpipash tucuitami pactachinga.
Cambaj purina ñambipash, michashnami punchayachinga.
29Jatun tucushcacunataca Diosllatami llaquichinga.
Ali shunguta charijcunatami, Taita Diosca quishpichinga.
30Alitalla ruraj runataca, Paimi quishpichinga.
Ima na alitapash na rurashcamandami chashna quishpichinga” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
