JEREMÍAS 16 - Quichua Imbabura 2016

Judá llactataca, Mandaj Dios llaquichina cashcamanda

1Mandaj Diosca, cashnami nihuarca:

2“Canga, cai llactapica ama cazaranguichu. Churicunata, ushicunatapash ama charinguichu.

3Cai llactapi huacharishca churicunata, ushicunata, mamacunata, taitacunataca, Mandaj Dios Ñucami, cashna nini:

4Millai ungüicunahuanmi huañunajunga. Paicunamandaca, pipash na huacangachu. Paicunataca pipash na pambajpimi, sirinajunga. Paicunaca macanajuicunapi, ninan yarjaihuanmi huañunga. Paicunataca, angacuna, sacha animalcunami micunajunga” nihuarcami.

5Mandaj Diosca, cashnatapashmi nihuarca: “Huañushca cajpi, ninan llaqui tiyanajuj huasipica, ama huacangapapash, cushichingapapash yaicunguichu. Cai gentecunamandaca, ali causaitapash, llaquinatapash, juyanatapash Ñucallatami anchuchircani. Mandaj Dios Ñucami, cashna nini.

6Cai llactapica, jatungunapash, uchillacunapashmi huañunga. Paicunataca, pipash na pambangachu. Pipash na huacaj shamushpami, churajunatapash na liquinga, uma ajchatapash na ruturinga.

7Huañushcamanda llaquilla cajpi cushichingapaca, ima micunatapash pipash na carangachu. Taita, mama huañujpipash ima yacullatapash na carangachu.

8Shinallata, maijan huasipi jatun micui tiyajpipash, paicunahuan micushpa, ufiashpa tiyajungapaca ama yaicunguichu” nihuarcami.

9Tucuita Mandaj, Israelcunapaj Taita Diosllatami, cashnatapash nin: “Canguna causajui punllacunapica, cai llactamandaca cushijuihuan candanapash, cushijuihuan caparinapash, cusayuj, huarmiyuj tucushpa, cushijushpa candanapash na tiyangachu.

10Cai llaquicunata paicunaman villajpica, cashnami ninajunga: ‘Mandaj Diosca, ¿imashpata ñucanchitaca, chashna jatun llaquihuan llaquichisha nijunyari? Ñucanchica, ¿ima na alitata rurashcanchiyari? Na cashpaca, ¿ima juchata rurashpata, ñucanchita Mandaj Taita Diostaca fiñachishcanchiyari?’ ninajungami.

11Shina nijpica, cashna ningui: Mandaj Diosca, cashnami nin: ‘Cangunapaj taitacunami, Ñucata saquishpa, rurashcalla dioscunatara mañashpa causanajurca. Paicunapaj ñaupajpi cungurishpami, Ñuca mandashcataca na pactachinajurca.

12Cangunacarin, cangunapaj ñaupa taitacunatapash ashtahuan yali na alicunami canguichi. Cangunaca, Ñucata na cazushpami, cangunapaj na ali shungu munashcata rurashpa causanajunguichi.

13Shinamandami, cangunapash na rigsishca, cangunapaj ñaupa taitacunapash na rijsishca llactamanmi cachagrini. Chai llactapimi tutapash, punllapash rurashcalla dioscunata catishpa causanguichi. Cangunataca napacha llaquishachu’ ninmi ningui” nihuarcami.

14Mandaj Diosllatami, cashnatapash nin: “Israelcunata, Egipto llactamanda llujchimuj Mandaj Diosca, causaitami causajun” nishpa alicachina punllacunaca na ashtahuan tiyangachu.

15Ashtahuangarin, cangunapaj ñaupa taitacunaman carashca llactaman Ñuca tigrachimujpica, cashnami ninajunga: “Janaj llactamandapash, tucui shuj llactacunaman cachashcamanda, Israelcunata cutin tigrachimuj Mandaj Diosca causaitami causajun ninajungami” ninmi.

16Mandaj Diosca, cashnatapashmi nin: “Pijita japinshna japichunmi, ashtaca runacunata cachamugrini. Shinallata, urcucunapi, lomacunapi, jaca utujucunapi pacajushcacunata mascashpa japichunmi cachamugrini.

17Ñucaca, paicuna imatalla rurashpa causanajujtapash, tucuitami ricujuni. Ñucamandaca, imallapash na pacalla tiyajunllu. Paicuna na alita rurashcatapash, tucuitami ricujuni.

18Ashtahuangarin, paicuna juchata rurashcamandaca, chai rurashcatapash ashtahuan yalitami llaquichisha. Paicunapaj rurashcalla dioscunahuanmi, Ñuca alpataca mapayachinajurca. Ñuca carashca llactapimi, chai millanayaicunata jundachinajurca” ninmi.

19Mandaj Dioslla, Canmi ñucaman ushaita carashpa shinllichihuangui.

Llaqui japijui punllacunapipash, Canmi huacaichihuangui.

Cai pacha tucui llactacunamanda Cambaj ñaupajman shamushpami, cashna ninajunga:

“Ñucanchi taitacunaca, imapash llullacunata, rurashcalla dioscunatami catinajushca.

Paicunamandaca, ima alipash na shamushcachu.

20¿Runaca, paicunallata dioscunata rurai ushangachu?

Ashtahuangarin, paicuna rurashca dioscunaca, napacha dioscunachu” ninajungami.

21“Shinamandami cunanga, Ñuca ushaita, Ñuca pi cashcata rijsichigrini.

Shina rurajpimi Ñucataca, Mandaj Diospacha cashcata yachanajunga” ninmi.