1 CORINTIOS 1 - Quichua Imbabura 2016

“Alillachu capanguichi” nishcami

1Taita Dios munashpa cayajpi, Jesucristomanda villaj apóstol Pablo, shinallata Sóstenes shuti huauquindimi,

2Corinto pueblopi, Taita Diospajlla tandanajushca crijcunata, alillachu capanguichi ninajunchi. Cangunaca, Cristo Jesushuan Diospajlla shicanyachishca, maipi cashpapash Diospajlla cachun agllashcacunahuan tandanajushpa, mandaj Jesucristota alicachishpa causajcunami canguichi. Jesucristoca, paicunatapash, ñucanchitapashmi mandajun.

3Ñucanchi Taita Diospash, Apunchi Jesucristopash, ninan juyaita, ali causaiguta cangunaman carachunmi munapanchi.

Diospajta rurachun ushaita carashcamandami pashi nishca

4Cangunamandaca, ñuca Taita Diostaca pashi nijunillami. Cristo Jesusmanda, Taita Diosca cangunata ninanda juyashcamandami pashi nijuni.

5Cristohuan cashpami, ali rimanatapash, alipacha yachajunatapash chasquishcanguichi.

6Shinallata, Cristomanda villajuj Shimipash, cangunapaj shungupica, ali shinllipachami saquirishca.

7Shinamandami, Dios bendiciajpi, ñucanchi Apunchi Jesucristo shamunata shuyashpa, imapash na illaj causanajunguichi.

8Diosmi tucurimui punllacunacaman, cangunataca shinllichinga. Shina cashpami, ñucanchi Apunchi Jesucristo tigramui punllapica na juchachi tucunguichi.

9Taita Diosca, imatapash pactachij cashpami, Paipaj Churi ñucanchi Apunchi Jesucristohuan shujlla tucushpa causachun cangunataca cayarca.

¿Cristoca chaupirishcachu canga?

10Juyashca crijcuna, ñucanchi Apunchi Jesucristopaj shutipimi, cangunataca cashna nipani: Tucuilla shujllashnalla yarishpami parlana canguichi. Cangunapurapica na shicanyarinachu canguichi. Ashtahuangarin, shujlla yuyai tucushpami, chashnallata yarishpa causana canguichi ninimi.

11Juyashca crijcuna, Cloé shuti huarmipaj ayllucuna villajpimi yachani. Cangunapurapica, fiñanajushpa, ninanda rimarinajushcatami uyarcani.

12Cangunapurapica: “Ñucaca Pablota catijmi cani, ñucaca Apolosta catijmi cani, ñucaca Cefasta catijmi cani, ñucaca, Cristota catijmi cani” nirinajun nijtami uyani.

13¿Cristoca chaupirishcachu? ¿Pablochu cangunamandaca chacatai tucurca? Na cashpaca, ¿Pablopaj shutipichu bautizai tucurcanguichi?

14Taita Diostami pashi nini. Cangunataca, maijandapash na bautizarcanichu. Crispo shuti, Gayo shuti runacunatallami bautizarcani.

15Cangunaca: “Pablopaj shutipimi bautizarircani” nishpa ama pandarinajuchunmi pitapash na bautizarcani.

16Shinallata, Estéfanas shuti runatapash, paipaj huasi ucupurandimi bautizarcani. Ashtahuanga maijanda bautizashcatapash na yarinichu.

17Cristoca, bautizachunga na cachamuhuarcachu. Ashtahuangarin, ali villanata villachunmi cachamuhuarca. Alipacha yachajushca shimicunahuan villachunga na cachamuhuarcachu. Ñuca munaitalla rurajushpaca, Cristota cruzpi chacatashcatami yangapi churaiman carcani.

Cristomandapash, ninan ushaimandapash, Taita Diospaj ali yachaimandapash

18Cristota cruzpi chacatashcata villashca shimicunaca, chingaita chingangapa rijcunapajca, juizu illaj runa parlashcashnami uyarin. Ashtahuangarin, ñucanchi quishpirishcacunapajca, chai shimicunaca Taita Dios ninan ushaita charijtami ricuchijun.

19Quilcashcapica cashnami nijun:

“Alipacha yachajushcacuna yachajushcataca tucuchishami.

Shinallata, ali yuyaita charijcuna,

ali yuyaita charishcatapash yangapimi churasha” nijunmi.

20¿Alipacha yachajushca runaca maipita? ¿Mandashca shimicunata yachachij runaca maipita? ¿Cai pachapi yuyaisapa runaca maipita canga? ¿Nachu Taita Diosca, cai pachapi ali yachajushcacunataca, juizu illajshna ricurichun churashca?

21Taita Diosca, Paipaj tucui yachaicunataca, cai pachapi causaj ali yachajushcacunapash, na yachai ushachunmi rurarca. Shinamandami, juizu illaj runa villashcahuajshna, crijcunataca quishpichingapa munarca.

22Judiocunaca, “imatapash na rurai ushanallacunata rurashpa ricuchihuai” ninajunmi. Griegocunaca ninanda yachajunatami mascanajun.

23Ashtahuangarin ñucanchica, Cristota chacatashcatami villanajunchi. Chaica, judiocunapajca pandachij shimicunami, shinallata, na Israelcunapaca, juizu illajcuna parlashcashnami uyarin.

24Ashtahuangarin, quishpichi tucushca judiocunacunapajpash, griegocunapajpash, Taita Dios ninan ushaita charijtapash, tucuita yachashcatapashmi Cristoca ricuchijun.

25Juizu illajshna causajcunarami Taita Diospaj ñaupajpica ali yachajushcacuna ricurinajun. Shinallata, imatapash na rurai ushajcunarami Taita Diospaj ñaupajpica ashtahuan ushaita charijcuna ricurinajun.

26Juyashca crijcuna, cangunata Dios cayashcataca aliguta yarichi. Gentecunapaj ricuipica, ashagutalla yachanshnalla, ushaitapash na charijshnallami ricuringuichi. Shinallata, imatapash na charij ayllumandashnami ricuringuichi.

27Ashtahuangarin, alipacha yachajushcacunata pingaichingapami, cai pachapi imatapash na yachajcunatara Taita Diosca agllashca. Shinallata, ninan ushaita charijcunatapash pingaichingapami, cai pachapi na ushaita charijcunatara agllashca.

28“Ashtahuan alimi canchi” nijcunata pingaichingapami, imapapash na ali, yangapi churai tucushcacunatara Taita Diosca agllashca.

29Diospaj ñaupajpica, pipash ama jariyanajuchunmi chashna agllarca.

30Ashtahuangarin Diosmandami cangunaca, Cristo Jesushuan shujlla tucushcanguichi. Paillatami, Taita Diosmanda ali yachanatapash, Diospaj ñaupajpi chasqui tucunatapash, Diospajlla causanatapash, juchamanda quishpirinatapash caramurca.

31Quilcashcapica cashnami nijun: “Maijambash jariyangapa munashpaca, Jatun Diosmanda jariyachun” nijunmi.