1Ñuca huahualla,
ñuca imata yachachishcataca aligutami uyana cangui.
Ali yuyaita cushcataca, aligutami uyana cangui.
2Ñuca ali yuyaita cushcataca, cazunami cangui.
Chashna cashpami, aliguta yachajushcahuan rimai ushangui.
3Na alita ruraj huarmica, juyaillagutami riman.
Paica imata cashpapash uyanayaigutami riman.
4Ashtahuangarin jipamanga, jayaj ajenjo yacushnami canga.
Shinallata, ishcandi pundaman filo espadashnami canga.
5Paita catishpaca, huañuimanmi apai tucungui.
Seolmanmi apai tucungui.
6Paica, ali causanataca napacha munanllu.
Chai causaitaca na catinachu cangui.
Paica, huañuiman rijushcataca na yachanllu.
7Ñuca huahuacunalla, uyahuaichi.
Ñuca ali yuyaita cushcataca, napacha cunganachu canguichi.
8Chai huarmimandaca anchurinami cangui.
Paipaj huasi pungumanllapash, na chayanachu cangui.
9Can alicachi tucushpa causashcataca na yangapi churanachu cangui.
Chashna rurashpaca, cambaj causaitami llaquiman apangui.
10Cambaj tucui ushaihuan imata rurashpa charishcatapash, shujcunara tucuchinman.
Shujcunapaj huasipira, imatapash rurashpa causangapa ringuiman.
11Chaita na uyashpaca, jipamanmi huacashpa causangui.
Can rucuyashpami, chashna ninan llaquicunahuan causangui.
12Chai llaquihuan cashpami cashna nijungui:
“Ali yuyaihuan causanata yachachijujtaca, ¿imashpata na ali uyashcani?
Na alimanda jarcashpa rimajpipash, ñucallatami na uyangapa munarcani.
13Yachachijcuna imata yachachijpipash, na uyanayachircanichu.
Ñucata yachachijcunataca, napacha cazurcanichu.
14Tucuipimi ñucaca na ali causashcani.
Tucui gentecunapaj ñaupajpimi chashna na ali causashcani” nijunguiman.
15Can alichishca yacutallami ufiana cangui.
Cambaj pugyumanda yacutallami ufiana cangui.
16¿Cambaj pugyumanda yacutaca, ñangunapi shitanallachu canga?
¿Chai yacutaca, plazacunapi shitanallachu canga?
17Chai yacutaca, canllami ufiana cangui.
Chaitaca, napacha shujcunaca ufiangachu.
18Cambaj pugyumanda llujshijuj yacuca bendiciashca cachun.
Cambaj cazarashca huarmihuanllami cushijuna cangui.
19Paica, juyashca tarugashna, juyailla gacelashnami.
Pai ninanda juyajpimi, ninanda cushijungui.
Paipaj juyaihuanmi, ninan cushijuita charingui.
20Ñuca huahualla,
¿imamandata shujpaj huarmitara juyajunguiyari?
¿Imamandata shuj huarmitara ugllarijunguiyari?
21Cai pachapi causajcunataca, Mandaj Dios ricujunmi.
Imata rurashpa causajtapash, Paica ricuriajunmi.
22Diosta na cazuj runataca, na alita rurashcamandami llaquichinga.
Paipaj juchallatami, paitaca tugllashna japinga.
23Ali causachun yachachishcata na cazushcamandami huañunga.
Juizu illajshna na alita rurashcamandami, paica chinganga.
Who We AreWhat We EelieveWhat We Do
2025 by iamachristian.org,Inc All rights reserved.
