2 REYES 24 - Quichua Imbabura 2016

1Joacim shuti runa Juda llactata mandajui huatacunapimi, Babilonia llactata jatun mandaj Nabucodonosor runaca, paipaj runacunandi macanajungapa shamurca. Shinami, Joacim runaca, quimsa huatata Nabucodonosor runapajta rurashpa causarca. Shina cashpapash Joacim runaca, paita na cazushpami jatarirca.

2Shina cajpimi Mandaj Diosca, Joacim runahuan macanajuchun, Caldeo, Siria, Moab, Amón llactacunamanda macanajuj runacunata cachamurca. Paicunataca, Mandaj Dios imashna profetacunaman villashcashnami, Judá llactapi causajcunata tucuchinajuchun cachamurca.

3Judá llactapi causajcunapaj cai jatun llaquica, Mandaj Diospacha cachamujpimi, chashna shamurca. Juchata, ashtahuan na alicunatapash, Manasés runa rurashcata anchuchingapami, chashna cachamurca.

4Shinallata, ima na alitapash na ruraj gentecunata huañuchishpa Jerusalenbi yahuarta jichashcamandami, Mandaj Diosca na cungarca.

5Joacim runa ashtahuan imatalla rurashcapash, tucui imatalla rurashcapash, ¿nachu Judá llactata jatun mandajcuna imatalla rurashcacunata quilcashca libropi tiyajun?

6Joacim runa huañushpa, paipaj taitacunahuan tandanajungapa rijpica, paipaj churi Joaquín runami mandajurca.

7Egipto llacta jatun yacumanda callarishpaca, Éufrates jatun yacucamanmi, Babilonia llactata jatun mandajca quichurca. Chaimandami, Egipto llactata jatun mandajca, paipaj llactamanda llujshitaca na ashtahuan usharca.

Joaquín runapash, cati mandajcunapash, Babilonia llactaman prezu apai tucushcamanda(2 Crón. 36:9-10)

8Joaquín runaca, chunga pusaj huatata charishpa, mandai callarishpami, quimsa quillata Jerusalenbi mandajurca. Paipaj mamaca, Jerusalenbi causajuj Elnatán runapaj ushi Nehusta shutimi carca.

9Joaquín runaca, paipaj taita na alita rurashcashnami, Mandaj Diospaj ñaupajpica, na alita rurashpa causajurca.

10Chai huatacunapimi, Babilonia llactata jatun mandaj Nabucodonosor runapajta rurajcunaca, Jerusalenbi causajcunahuan macanajungapa vichai shamushpa, chai pueblotaca chaupipi churarca.

11Babilonia llactata jatun mandaj Nabucodonosor runapashmi, paipajta rurajcuna chaupipi churashca cajpi, Jerusalenbi causajcunahuan macanajungapa shamurca.

12Shina cajpimi, Judá llactata jatun mandaj Joaquín runaca, paipaj mamandi, paipajta rurajcunandi, cati mandajcunandi, caishuj mandajcunandi prezu japi tucurca. Babilonia llactata jatun mandajca, ña pusaj huatata mandajushpami chashna prezu japirca.

13Shinallata, Mandaj Diospaj huasipi, mandana huasipi tucui ima tiyashcatami llujchirca. Chai jipaca, Israel llactata jatun mandaj Salomón, Mandaj Diospaj huasipi curimanda rurachishcacunatami faquishpa saquirca. Chaicunataca, Mandaj Dios imashna villashcashnami rurarca.

14Shinallata, Jerusalenbi causajcunatapash, mandajcunatapash, ninan shinlli macanajuj runacunatapash, imatalla ruranata tucui yachajcunatapash, jirruta tacashpa tucui imatalla rurajcunatapash, chunga huarangacaman tandachishpami prezu aparca. Llactapica, imagutapash na charij gentecunallami saquirirca.

15Shinallata Joaquín runatapash, paipaj mamatapash, paipaj huarmicunatapash, paipajta rurajcunatapash, Judá llactapi jatun ushaita charij runacunatapashmi, Jerusalenmandaca, Babilonia llactaman prezu aparca.

16Jatun macanajuiman llujshinalla canchis huaranga tucui runacunatapash, imatalla ruranata yachajcunatapash, jirruta tacashpa imatalla rurajcunatapash, huaranga runacunatami aparca. Shinallata, macanajunata ali yachaj runacunatapashmi, Babilonia llactata jatun mandajca prezu aparca.

17Babilonia llactata jatun mandajca, Joaquín runapaj taitapaj huauqui Matanías shuti runatami, Joaquín runapaj randi jatun mandaj cachun churarca. Matanías shuti runataca, Sedequías shutitami shutichirca.

Sedequías shuti runa mandajushcamanda(2 Crón. 36:11-16; Jer. 52:1-3)

18Sedequías shuti runaca, ishcai chunga shuj huatata charishpa, mandai callarishpami, chunga shuj huatata, Jerusalenbi mandajurca. Paipaj mamaca, Libna shuti pueblomanda Jeremiaspaj ushi Hamutal shutimi carca.

19Paipaj ñaupa taita Joacim shuti runa tucui na alita rurashcashnami, paipash Mandaj Diospaj ñaupajpica, na alita rurajurca.

20Shinamandami Mandaj Diosca, Jerusalenbi causajcunahuan, Judá llactapi causajcunahuan ninandapacha fiñarishpa, paipaj ñaupajmanda llujchishpa cacharca. Shinallata, Sedequías runaca, Babilonia llactata jatun mandajta na cazungapa munashpami jatarirca.