ISAÍAS 47 - Quichua Imbabura 2016

Babilonia llactata llaquichina cashcamanda

1“Nara cazarashca cuitsashna, jariyashca tiyajuj Babilonia llactalla, alpapimi tiyarigringui.

Caldeo gentecunamanda mirashca llactalla, alpapimi tiyarigringui.

Candaca cutinga, pipash na: ‘Juyaillagumi cangui’ ningachu.

2Cutana rumipi, jacuta cutangapa tiyarilla.

Umata quilparishcatapash, anchuchilla.

Chaquipi churajushcatapash llujchishpa, jatun yacuta chimbangapa ucha rilla.

3Churajushcatapash llujchishpa, pinganayaita, shayajungapa rilla.

Can llaquichishcamandami, candapash tigrashpa llaquichisha.

Cambaj llactapi causajcunaca, shujllapash na quishpichingachu” ninmi.

4Ñucanchita quishpichij Diosca, tucuita mandaj Diosmi.

Paica, Israelcunapaj jucha illaj Diosmi. Paica cashnami nijun:

5“Caldeo gentecunamanda mirai llactalla.

Canga yana yana ucuman yaicushpa upalla tiyaringapa rilla.

Candaca, na ashtahuan: ‘Llactacunata mandajmi cangui’ ninajungachu.

6Ñuca agllashca gentecunahuanga fiñarircanimi.

Ñucapajlla shicanyachishca gentecunataca, cambaj maquipi churarcani.

Paicunataca, imatallapash na llaquircanguichu.

Rucu taitacunatapash, ashtahuanmi llaquichircangui.

7Canga: ‘Tucui causaipimi, ñucalla mandajusha’ yajurcanguimi.

Jipaman cashna llaquita apanataca, napacha yacharcanguichu.

8Juyailla, jariyashca huarmishna, Babilonia llactalla, uyanami cangui.

Canga, ima llaquipash na japihuangachu yashpami, mandashpa tiyajurcangui.

Canga, cambaj shungupica: ‘Ñucallami mandaj cani, ñucamanda ashtahuan shuj mandajca, pipash na tiyanllu.

Cusa illajpash, huahuacuna illajpash na canichu’ yajurcanguimi.

9Ashtahuangarin ishcai llaquicunami, candaca cungashcapi japimunga.

Chai punllami canga, sapalla, huahuapash illaj ricuringui.

Chai llaquicunaca, brujucunahuan, yumbucunahuan tiyajujpipashmi candaca japimunga.

10Ñucataca: ‘Pipash na ricujunllu’ yashpami, na alitalla rurashpa causajurcangui.

Cambaj yachajushcallata, cambaj yuyaillatami candaca pandachirca.

Cambaj shungupica: ‘Ñucallami cani, ñucamanda ashtahuan shujca, na tiyanllu’ yajurcanguimi.

11Candaca cungashcapimi, ninan llaquicunaca japimunga.

Chai llaquicuna maimanda shamujtapash, na yachanguichu.

Cungashcapimi, chai llaquicunaca ñapash japimunga.

Chai llaquimandaca, pipash na quishpichingachu.

12Unaitami brujucunahuan, yumbucunahuan jambirircangui.

Chaita rurashpaca, ashtahuan ushaita charisha yashpami causajurcangui.

13Canman ima yuyaita cungapapash, ashtacami tiyarca.

Cunanga, jahua pachata ricujcuna, luzerocunata ricushpa yachajcuna,

quillacunata yupajcuna, cambaj llaqui chayamunataca villangapa shamuchun.

14Paicunataca ujsha jupashna cajpimi, ninahuan rupachinga.

Chai ninamandaca, na quishpiringachu.

Chai ninaca, na cunungapachu canga. Ashtahuangarin llaquichingapallami canga.

15Candaca chashna causashcamandami llaquichinga.

Canga, chaira viñaimandami chashna causashcangui.

Candaca, paicuna saquishpa rijpimi, pipash na quishpichinga.