SANTIAGO 5 - Quichua Imbabura 2016

Llaquichishpa causaj charij runacunata na alicachishcamanda

1¡Charij runacuna, caita uyaichi! Cangunata jatun llaquicuna japij shamunata yachashpa, caparishpa ninanda huacaichi.

2Canguna imatalla charishcacunapash, ñamari ismushca. Cangunapaj churajunatapash, polilla jurumi micushca.

3Cangunapaj curipash, culquipash ñamari ismushca. Chai ismushcacunami, canguna na ali cajtaca ricuchimunga. Chaillatami, cangunapaj cuerpotapash, ninashna rupachishpa tucuchinga. Cangunaca tucurimui punllacunapami chaicunataca chashna tandachishcanguichi.

4Uyaichi, cangunapaj chagracunamanda granota tandachijcunaca ninandami caparinajun. Umashpami paicuna imatalla rurashcamandaca, imatapash na cushcanguichi. Shinamandami, cangunapaj granota tandachijcuna caparinajujca, tucuita mandaj Jatun Diospajman uyarishca.

5Cai pachapica, tucuita charishpami ninanda cushijushpa sumajta causashcanguichi. Huañuchina punlla chayamungacaman virayachishcashnami, cangunapaj shungupi chashna tucushcanguichi.

6Ima na alitapash na rurajtami, Paica imatapash na nishpa jarcarijpi, cangunaca huañuchishcanguichi.

Diosta mañashpa catinamanda

7Juyashca crijcuna, shinamandami Apunchi Jesús tigramungacaman, na llaquirishpa shuyana canguichi. Tarpuj runaca: Juyailla granoguta japingapaca, punda tamia, jipa tamia shamushpa fucuchingacaman, na llaquirishpa shuyajujtaca yachanami canguichi.

8Shinallatami, cangunapash na llaquirishpa, shungupi shinlli tucushpa causana canguichi. Apunchi Jesús tigramuna punllapash ñami chayamujun.

9Juyashca crijcuna, canguna ama llaquichi tucungapami, caishujmanda chaishujmanda na juchachirina canguichi. Uyaichi, juezca pungu ñaupajpimi shayajun.

10Ñuca juyashca crijcuna, Jatun Diospaj shutipi villaj profetacunaca, ninanda llaquichijpipash na ñapash fiñarishpa catishcashnami cangunapash catina canguichi.

11Llaquita apajcunaca, ninanda cushijushcatami yachanchi. Job runagutaca, na ñapash fiñarishpa catijushcataca uyashcanguichimi. Shinallata, Jatun Dios ninanda llaquishpa, juyashpa ashtahuan carashcatapashmi yachanguichi.

12Ñuca juyashca crijcuna: “Jahua pacha, cai pacha” nishpapash ashtahuan shuj imamandapash na juramentunachu canguichi. Ashtahuangarin, cangunata Dios ama ninanda llaquichijuchunmi, imatapash: “Ari” nina cajpica, “ari” nina canguichi, “Na” nina cajpica, “na” ninami canguichi.

13Cangunapurapi maijambash llaquilla causanajuj tiyashpaca, Diostami mañana canguichi. Maijambash cushijushpa causanajushpaca, cushijuihuanmi Diosta alicachina canguichi.

14Cangunapurapi maijambash huañujuj tiyashpaca, tandanajuj crijcunata pushaj ancianocunatami cayana canguichi. Huañujunmandaca, paicunami aceiteta javishpa Diosta mañanga.

15Alipacha crishpa mañajpimi Apunchi Jesusca, chai huañujujta alichishpa jatarichinga. Ima juchata rurashcatapash, Diosca anchuchingami.

16Canguna ima juchata rurashca cashpapash, caishujmanda chaishujmanda villarishpa, ali tucushpami, shujmanda shujmanda Diosta mañarina canguichi. Diosta cazujcuna mañashcataca, Taita Diosca uyashpa, ima nanaitapash anchuchingami.

17Eliaspash, tucui imapipash ñucanchishnami carca. Shina cashpapash ama tamiachun, Diosta ninandapacha mañajpica, quimsa huata chaupicamanmi cai pachamanga na tamiamurca.

18Diosta cutin mañajpica tamiachimurcallami. Shina tamiajpimi, alpapica cutin imagupash fucushca.

19Juyashca crijcuna, cangunapuramanda maijambash, Diospaj Shimita yachashca jahua pandashpa purijujpi, maijan cashpapash tigrachimushpaca,

20juchata rurashpa purijuj runatami, huañunamanda jarcashpa, tucui juchacunatapash Dios perdonachun tigrachimunga.