MATEO 17 - Quichua Imbabura 2016

Jesusca, punchapamba tucushpami ricurishca(Mar. 9:2-13; Luc. 9:28-36)

1Jesusca, sucta punlla jipami Pedrotapash, Jacobotapash, Jacobopaj huauqui Juandapash paicunatalla pushashpa, jahua urcuman rirca.

2Paicunapaj ñaupajpimi Jesusca, shujman tigrashpa ñavipash, indishna punchapamba ricurirca. Pai churajushcapash, yuraj yuraj michagushnami ricurirca.

3Chaipimi Moisespash, Eliaspash, Jesushuan parlanajuj ricurirca.

4Shina ricushpami Pedroca, Jesusta cashna nirca:

“Ñucanchica, alipajmari shamupashcanchi, Apunchi Jesús. Can munajpica, quimsa chugllaguta rurapashun ninchimi. Shujtaca canman, shujtaca Moisesman, shujtaca Eliasman rurapashun” nircami.

5Chashna nijujpillatami, paicunataca punchapamba fuyu ñapash quilpamurca. Chai fuyu ucumandaca, cashna rimajmi uyarirca:

“Caimi, Ñuca juyashca Churigu. Paimandami, ninanda cushijuni. Pai imata yachachishcataca, aliguta uyanguichi” nircami.

6Chashna rimamujta uyashpami, Paipaj yachajujcunaca ninanda manllarishpa, cungurishpa urai cumurirca.

7Jesusca paicunapajman shamushpa tacarishpami:

“Jatarichilla, na manllarinachu canguichi” nirca.

8Shina nijpi vichai ricushpaca, Jesuslla chaipi cashcatami ricurca.

9Chai urcumanda urai shamunajushpami Jesusca, cashna nishpa mandarca:

“Runa Aichayuj tucushca Ñucami, huañushcacunapaj chaupimanda causarisha, chaicaman canguna ricushcataca, pimambash na villanachu canguichi” nirca.

10Shina nijpimi paipaj yachajujcunaca, cashna nishpa tapunajurca:

“Mandashca Shimita yachachijcunaca, ¿imashpata: ‘Eliasrami punda shamunapacha’ ninajun?” ninajurcami.

11Shina nijpimi Jesusca, paicunaman cashna nishpa tigrachirca:

“Eliasca, punda shamunapachami. Pai shamushpami, cutin tucuita alichinga.

12Ashtahuangarin cangunamanga, cashna nishpami villani: Eliasca, ñami shamurca. Paitaca, na chasquishpami, paicunapaj munaita rurashpa llaquichinajurca. Paicunallatami, Runa Aichayuj tucushca Ñucatapash llaquichihuanga” nircami.

13Chashna villajpimi, Paipaj yachajujcunaca Bautizaj Juanmanda villajushcata yachaj chayarca.

Maipipash shitarishpa tucurijlla huambratami, Jesusca alichishca(Mar. 9:14-29; Luc. 9:37-43)

14Ashtaca gentecunapajman Jesús chayajpimi, shuj runaca Paipaj ñaupajman shamushpa, ñapash cungurishpa cashna nirca:

15“Ñuca churiguta llaquipayari, Apunchi Jesús. Paica, ñapash shitarishpa tucurishpami, ninan llaquita apajun. Paica, cutin cutinmi ninacunapi, yacucunapi urmapan.

16Cambaj yachajujcunamanmi apamurcani. Ashtahuangarin paicunaca, na alichi ushapanllu” nircami.

17Shina nijpimi Jesusca, cashna nirca:

“¡Na ali crij millai gentecunamanda miraicuna, ¿ima punllacamanda cangunahuanga cashna cashayari? ¿Ima punllacamanda cangunahuanga cashna llaquilla cashayari? Chai huambrataca, caiman apamugrichi” nircami.

18Jesusca, chai ayata shinllita rimajpimi chai huambramanda llujchirca. Shina llujchijpimi, chai punllamandapacha ali tucushpa saquirirca.

19Chaita ricushpami Paipaj yachajujcunaca Jesuspajman shamushpa cashna ninajurca:

“Ñucanchica, ¿imashpata chai ayataca na llujchi usharcanchi?” ninajurca.

20Shina tapujpimi Jesusca cashna nirca:

“Na tucui shunguhuan crishcamandami, na llujchi usharcanguichi. Na llullashpami, cangunataca cashna nini: Mostaza muyushnallatapash crishpaca, cai urcuta ‘caimanda chaiman ri’ nijpica ringallami. Imapash na rurai ushanaca na tiyanllu.

21Ashtahuangarin, na micushpa Diosta ninanda mañashpallami, ayataca llujchina” nircami.

Jesusca, Pai huañunata cutin villashcamanda(Mar. 9:30-32; Luc. 9:43-45)

22Galilea llactapi cashpami, Jesusca cashna nirca:

“Runa Aichayuj tucushca Ñucataca, runacunapaj maquipimi japichihuanga.

23Paicuna Ñucata huañuchijpipash, quimsa punllahuanga causarishallami” nircami.

Shina nijpimi Paipaj yachajujcunaca, ninandapacha llaquirirca.

Diospaj huasimanda impuestota cunatami villajun

24Capernaúm puebloman paicuna chayamujpimi, ishcai dracma culquita tandachijcunaca, Pedropajman shamushpa:

“Cangunata yachachijca, ¿ishcai dracma culquita cunata yachanllu?” nishpa tapunajurca.

25Shina tapujpimi Pedroca:

“Ari” nirca.

Chai jipami, huasi ucuman Pedro yaicujpica, Jesusca punda cashna nishpa tapurca:

“Ima yanguita Simón, cai pachapi jatun mandajcunaca, ¿picunatata imamandapash culquita na cashpaca imatapash cuchun mandan, shinallata na cashpaca impuestotaca cuchun mandan? ¿Chai llactapillata causajcunata, na cashpaca shuj llactamanda shamushca gentecunatachu shina mandan?” nishpami tapurca.

26Shina tapujpimi Pedroca:

“Shuj llactamanda shamushca gentecunatami cuchun mandan” nirca.

Shina nijpimi Jesusca cashna nirca:

“Chai llactapillata causajcunaca, na cunachu.

27Ashtahuangarin impuestota japijcunata ama fiñachingapa, cuchaman rilla. Chaipica, pijita japij anzuelota shitashpa, callaripi japi ushashca pijipaj shimita pascashpami, shuj estatero culquita taringui. Chaita japishpaca Ñucamandapash, canmandapash paicunaman cugringui” nircami.