ÉXODO 29 - Quichua Imbabura 2016

Aarondapash, paipaj churicunatapash Diospajlla cachun shicanyachishcamanda(Lev. 8:1-36)

1Ñucapajlla sacerdotecuna cachun paicunata shicanyachingapaca, caitami rurana cangui: Huagracunamanda shuj shicuta, ishcai jari llamacunatapash, alicunatapachami apamuna cangui.

2Shinallata tandacunatapash, mishqui tandacunatapash, jamzi tortillacunatapash, ashtahuan ali trigo jacuta agllashpami, levadura illajtami, aceitehuan masashpa rurana cangui.

3Chai tandacunataca, shuj uchilla canastapi churashpa apamungui. Shinallata shicundi, ishcai jari llamacunandimi apamuna cangui.

4Aarondapash, paipaj churicunatapash, Ñucahuan tuparina jatun carpa punguman pushashpa armachingui.

5Chai jipaca, jahualla churajuna tunicatapash, efodhuan jahualla churajunatapash, efodtapash, pectoraltapash Aaronman churachingui. Shinallata, efodpillata tiyajuj cintahuan chumbilichingui.

6Shinallata, mitratapash, paipaj umapi churachingui. Chai mitra jahuapica, Ñucapajlla shicanyachishca diadematapash churachingui.

7Chai jipaca, aceiteta japishpa, Aaronbaj umapi talishpa javingui.

8Paipaj churicunatapash cayashpami, jahualla churajuna tunicata churachina cangui.

9Aarondapash, paipaj churicunatapash, cintahuan chumbilichingui. Umapi churajuna tiaratapash churachingui. Chashna rurajpimi, tucui causaicaman sacerdotecuna tucushpa catinga. Chashnami Aarondapash, paipaj churicunatapash Diospajlla cachun shicanyachingui.

10Chai jipaca, Ñucahuan tuparina jatun carpa ñaupajman shicuta apangui. Chaipica Aaronbash, paipaj churicunapashmi, paicunapaj maquita shicupaj umapi churanga.

11Shicutaca, Mandaj Dios Ñuca ñaupajpimi, Ñucahuan tuparina jatun carpa pungupi huañuchingui.

12Shicupaj yahuarta japishpaca, altar cachucunapimi cambaj dedohuan javina cangui. Puchushca yahuartaca, altar chaquipimi tucuilla talina cangui.

13Shinallata, chunllulicunata quilpashca viratapash, hígado jahuapi tiyaj viratapash, ishcandi riñondapash, chai riñongunapaj jahuapi tiyaj viratapash llujchishpami, altarpi rupachina cangui.

14Ashtahuangarin shicu aichataca, paipaj caratapash, huanutapash, carpacunamanda canllaman llujshishpa rupachingui. Chai shicuca, juchamanda apamushca ofrendami canga.

15Shinallata jari llamacunamanda, shuj jari llamata japingui. Chai jari llamapaj umapica Aaronbash, paipaj churicunapashmi, paicunapaj maquita churanga.

16Jari llamata huañuchishpami, chai yahuarhuanga altar jahua muyundipi tsirapachina cangui.

17Chai jari llamapaj aichataca, asha asha fitingui. Llamapaj chunllulicunata, changacunataca, maillashpa, asha asha fitishca aichacunapaj jahuapi, llama umatapash chaipi churangui.

18Shina churashpaca, chai jari llamataca, altarpi tucuillata rupachingui. Chaitaca, Mandaj Dios Ñucapaj ñaupajpi mishquillagu ashnajuchunmi tucuillata rupachishca canga. Shinallata, Mandaj Diosman ofrendata cushpa rupachishcami canga.

19Chai jipaca, shuj jari llamata japingui. Chai llamapaj umapica, Aaronbash, paipaj churicunapashmi, paicunapaj maquita churanga.

20Chai llamata huañuchishpa, chai yahuarta japishpami, ali maquiman tiyajuj Aaronbaj rinri pundapi, paipaj churicunapaj rinri pundapi javina cangui. Shinallata, ali maquiman paicunapaj maqui mama dedopi, paicunapaj chaqui mama dedopipashmi javina cangui. Shinallata, chai yahuartaca, altar jahua muyundipimi tsirapachina cangui.

21Altar jahuapi tiyajuj yahuartapash, talishpa javina aceitetapash, Aaronbipash, paipaj churajunapipash, paipaj churicunapipash, churicunapaj churajunapipash, jahualla tsirapachingui. Chashna rurajpimi Aaronbash, paipaj churajunapash, paipaj churicunapash, churicunapaj churajunapash, Ñucapajlla cachun shicanyachishca canga.

22Chai jipaca, jari llamapaj viratapash, chupatapash, chunllulicunata quilpashca virata, higadomanda virata, ishcandi riñongunata, chai riñongunapaj jahuapi tiyaj virata, ali rigratapash japingui. Chai jari llamaca, Ñucapajlla cachun shicanyachishcami canga.

23Shinallata, jatunda rurashca mishqui tandatapash, aceitehuan rurashca mishqui tandatapash apamungui. Shinallata, Mandaj Dios Ñucaman cushca levadura illaj tandacuna tiyanajuj uchilla canastamanda, shuj jamzi tortillatapash japishpa apamungui.

24Chaitaca Aaronbaj, paipaj churicunapaj maquipi tucuillata churangui. Chaitami, paicunaca, Mandaj Dios Ñuca ñaupajpi vichai ricuchishpa Ñucaman cunajunga.

25Chai jipaca, paicunapaj maquimanda japishpa, tucuillata rupachina animalpaj jahuapi churashpa, mishquillagu ashnajuchun, Mandaj Dios Ñucaman, altarpi rupachingui. Chaica, Mandaj Dios Ñucaman carashpa rupachishca ofrendami canga.

26Ñucapajta rurachun Aaronda shicanyachingapa cushca, jari llamapaj pecho aichatapash japingui. Chaitapash, Mandaj Diospaj ñaupajpi vichai ricuchishpa cunami canga. Chaitaca, canmi japina cangui.

27Ñuca ñaupajman carangapa apamushca ofrendacunataca, jari llamapaj pecho aichatapash, vichai ricuchishpa cushca jari llamapaj changa aichatapashmi shicanyachingui. Chaicunatami, Aaronbash, paipaj churicunapash, shicanyachishcataca japinajunga.

28Israelcuna, Diosman vichai ricuchishca ofrendacunaca, Aaronbajpash, paipaj churicunapajpashmi canga. Cai mandashcataca, Israelcunaca, causaita causaicamanmi pactachinajunga. Chai ofrendaca, Ñucahuan ali tucungapa vichai ricuchishpa Ñucaman cushcami canga. Mandaj Dios Ñucaman vichai ricuchishpa cushca ofrendataca, paicunapaj canatallami japinga.

29Ñucapajlla cachun shicanyachishca, Aaronbaj churajunacunaca, pai huañushca jipaca, churicunapajmi canga. Paicunaca, chaicunata churajushpami, Ñucapajta rurangapa shicanyachishpa churai tucunga.

30Paipaj churicunamanda maijan cashpapash, paipaj randi sacerdote cashpami, canchis punllacaman chai churajunacunataca churajunga. Ñucahuan tuparina jatun carpaman, Ñucapajlla huasipi rurangapa shamushpami chaicunataca churajushca canga.

31Ñucaman carangapa apamushca jari llamata japishpaca, Ñucapajlla shicanyachishca pushtupi yanungui.

32Jari llamapaj aichataca, Aaronndi, paipaj churicunandimi, uchilla canastapi tiyajuj tandahuan micunajunga. Chaitaca, Ñucahuan tuparina jatun carpa pungupimi micunajunga.

33Juchacunata anchuchingapa apamushca ofrendacuna cashcatami, chashna micunajunga. Ashtahuangarin, chai aichacunataca, Ñucapajlla shicanyachishca cajpimi, maimandapash purij runaca na micunga.

34Ñucaman carangapa apamushca aichapash, tandapash, ashallapash cayandipaj puchujpica, ninapimi rupachina cangui. Chaicunataca, Ñucapajlla shicanyachishca cajpimi na micuna canga.

35Chashnami Aarondapash, paipaj churicunatapash, tucuita Ñuca mandashcashnallata rurashpa pactachina cangui. Canchis punllacamanmi, paicunataca Ñucapajlla shicanyachina cangui.

36Juchata anchuchijuchun apamushca shicutaca, punllandimi huañuchishpa cuna cangui. Paipaj juchamanda animalta cushpaca, altartaca Ñucapajlla cachun shicanyachingapa, aceiteta talishpa javingui.

37Canchis punllacamanmi animalta cushpa chai altarpica rupachina cangui. Chashna rurajpimi, Ñucapajlla shicanyachishca altar tucunga. Chai altarpi ima tacarishcapash, Ñucapajlla shicanyachishcami tucunga.

Diosman ofrendata punllandi cunamanda(Núm. 28:1-8)

38Shuj huatata charij ishcai llamagutami, chai altarpica punllandi Ñucaman cuna cangui.

39Shuj llamagutaca tutamandata, caishuj llamagutaca, chishimi rupachina cangui.

40Shinallata, shuj llamaguhuanga, shuj litro olivocunata tacashpa llujchishca aceiteta japishpami, ishcai kilo yali ashtahuan ali jacuta masashpa cuna cangui. Shinallata, altarpica shuj litro vinotami talina cangui.

41Caishuj llamagutaca, ña chishipimi imashna tutamanda cushpa rupachishcashnallata, imashna vinota talishcashnallata, mishquilla ashnajuchun rupachina cangui. Chaica, Mandaj Dios Ñucaman cushpa rupachishcami canga.

42Cangunapaj jipa miraicunapajpashmi, chashnallata rurashpa, Mandaj Dios Ñuca ñaupajpi, Ñucahuan tuparina jatun carpa pungupi rurashpa punllandi pactachinajunga. Chaipimi, cangunapaj chaupipi rimajusha.

43Chaipimi Israelcunahuan tuparisha. Chaimandami, chai pushtuca, Ñuca ninan ushaimanda, Ñucapajlla tucunga.

44Shinallata, Ñucapaj jatun carpatapash, altartapash, Ñucapajlla cachunmi rurasha. Shinallata, Aarondapash, paipaj churicunatapash, Ñucapajlla sacerdotecuna cachunmi churasha.

45Israelcunapaj chaupipi causajushpami, paicunapaj Taita Dios casha.

46Shina cajpimi, paicunapaj Taita Diospacha cajtaca ali rijsinajunga. Egipto llactamanda llujchimushpa, paicunapaj chaupipi causajujtami rijsinajunga. Ñucami, Paicunata Mandaj Taita Dios cani.