1Huarmimanda huacharishca runaca,
asha punllacunatalla causana cashpapash, llaquihuan shaijushcami causan.
2Sisashna juyaillagu cashpapash cuchujpi chaquinllami.
Llandu ricurishpa ñapash chinganshnami tucurin.
3¿Shina cajta ricushca jahuachu,
ñuca imatalla rurashcacunata tapuchingapa cayahuangui?
4Mapa cajtaca, ¿pita mapa illajta rurai ushanga?
Chaitaca, pipash na ushangachu.
5Runapaj causaica, mashna punllacunacaman causanatapash, ña ricushcallami.
Mashna quillacunata causanatapash, ñami yachangui.
Ima punllacaman causachun can churashcamandaca, na yali ushangachu.
6Paita can saquijpica, paica huañungallami.
Chaicamanga, imatapash rurashpa causajuchun saquilla.
7Quiruta cuchujpipash, cutin viñachun shuyana tiyanrami.
Cutin viñajpica, mushuj malquicunaca, napacha illangachu.
8Alpa ucupillata sapi chaquijpipash,
alpapillata racu sapicuna chaquijpipash,
9yacuta chupashpaca, cutinmi verdeyangalla.
Mushuj yura viñashpami, fanga junda tucunga.
10Ashtahuangarin runa huañushpaca, tucuillami tucuringa.
Runa ña huañushpaca, ¿cutinga maipishi ricuringa?
11Cuchamanda yacu rishpa,
larca yacu asha asha chaquishpa tucurijshnami canga.
12Chashnami runa huañushpa sirijushcamandaca, na cutinga jataringa.
Jahua pacha tucuringacaman napacha rijcharingachu,
puñujushcamandaca napacha jataringachu.
13¡Seolpi pacajugrichun saquishpachari ali cahuanguiman!
Can ninanda fiñarishca ali tucungacaman, chaipi pacajugri nishpachari ali canman.
Ashata shuyashpaca, ñucata cutin yarishpachari ali canguiman.
14¿Runa huañushpaca, cutin causaringachu?
Ñuca causai punllacunapica, shuyajushallami,
ñuca quishpirina chayamungacamanmi shuyajushalla.
15Chashna shuyajujpi, Can cayajpica shamushallami.
Chaipica, Cambaj maquihuan rurashcataca juyahuanguimi.
16Ashtahuangarin cunanga, ñuca purishcatapashmi yupajungui.
Ñuca juchamandaca, napacha samachihuanguichu.
17Ñuca juchacunataca shuj costalpi jundachishcashnami sellashca charijungui.
Tucui na alita rurashcacunatapash, costalpi sirashcashnami charijungui.
18Urcu urmashpaca, tucuillapachami tucurin.
Jatun rumicunapashmi, tiyajushcamandaca shujman anchurin.
19Ashtaca yacu shamushpa huajtashpami rumicunatapash tucuchin.
Yacu mirashpaca, ñutu alpatapash tucuillami apan.
Chashnallatami, runapaj causaitaca imatapash na shuyashpa tucuchingui.
20Canga, causaita causaicamanmi runata yali shinlli cangui,
Runaca huañushpa chingangallami.
Ñavipash shuj tigrashpa huañujpimi, cayacaman nishpa cachanguilla.
21Paipaj churicuna alicachi tucushcatapash, paica na yachangachu.
Paicuna, llaquichi tucushcatapash na yachangachu.
22Causajushpallami, nanaihuan llaquirinchi.
Causajushpallami, shungupi llaquirinataca charinchi” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
