ZACARÍAS 1 - Quichua Imbabura 2016

Mandaj Diosca, ñucapajman tigrarimuichi nishcami

1Persia llactata jatun mandaj Darío shuti runaca, ishcai huata pusaj quillatami ña mandajurca. Chai huatapimi Mandaj Diosca, profeta Zacariasman villarca. Zacariasca, Berequías runapaj churimi carca, Berequías runaca Iddo shuti runapaj churimi carca. Mandaj Diosca cashna nishpami villarca:

2“Mandaj Dios Ñucaca, cangunapaj ñaupa taitacunataca ninandapachami fiñarcani.

3Shina cashcamanda cashna ningui: Tucuita Mandaj Diosca, cashnami nin: ‘Ñucapajman tigrarimuichi’ ninmi tucuita Mandaj Diosca. Shina rurajpica: ‘Ñucapash, cangunapajman tigrarishami’ ninmi tucuita Mandaj Diosca ningui” nircami.

4Cangunapaj ñaupa taitacunashnaca, na causanachu canguichi. Punda profetacunaca, paicunamanmi cashna nishpa villanajurca: “Tucuita Mandaj Diosca, cashnami nin: ‘Cunanga, na alita rurashpa, na ali causanajushcataca saquinami canguichi’ nishpami villanajurca. Shina cajpipash na cazushpa, na uyangapa munanllu carca.

5Cangunapaj ñaupa taitacunaca, ¿maipita canga? Profetacunapash, ¿causaita causanajungallachu?

6Ashtahuangarin Ñuca shimicunata, Ñuca mandashcacunata, Ñucapajta ruraj profetacuna villashca shimicunaca, ¿nachu cangunapaj ñaupa taitacunapi pactarca? Chaimandami, Ñucata cutin cazushpa cashna ninajurca: ‘Mandaj Diosca, ñucanchi na alita rurashpa, na ali causashcamandami, llaquichinata yarirca. Paica, ñucanchihuanga chashnallatami rurarca’ ninajurcami nishpa villai” nircami.

Caballocunatami muscuipishna ricushca

7Jatun mandaj Darioca, ishcai huata chunga shuj quillatami ña mandajurca. Sebat shuti quillapaj ishcai chunga chuscu punllapimi, profeta Zacariasman, Mandaj Diosca villarca. Zacariasca, Berequías runapaj churimi carca, Berequías runaca Iddo shuti runapaj churimi carca. Mandaj Diosca cashnatami muscuipishna ricuchirca:

8Tutami, puca caballopi tiyarishca shuj runata ricurcani. Chai runaca, pugru pambapi tiyaj mirto shuti yura chaupipimi shayajurca. Paipaj huashatapash, puca caballocuna, quillushnalla caballocuna, yuraj caballocunami catinajurca.

9Chaita ricushpami: “¿Ñucata mandajlla, caicunaca imata capan?” nircani. Shina nijpimi, ñucahuan rimajuj angelca: “Caicuna ima cajtaca, ñucami villasha” nihuarca.

10Mirto shuti yura chaupicunapi shayajuj chai runa tigrachishpaca, cashnami nihuarca: “Cai pachata muyushpa tigrachun Mandaj Dios cachashcacunaca caicunami” nihuarcami.

11Paicunami, mirto yura chaupipi shayajuj, Mandaj Diospaj angeltaca cashna ninajurca: “Ñucanchica, ñami cai pachata muyushpa shamupanchi. Ricui, tucui cai pachapi causajcunaca imatapash na manllashpa aligutami causanajun” ninajurcami.

12Shina nijpimi Mandaj Diospaj angelca, cashna nirca: “Tucuita Mandaj Dioslla, Jerusalenbi causajcunata, Judá llacta pueblocunapi causajcunataca, ¿ima punllacamanshi na llaquipangui? Paicunataca, ña canchis chunga huatacunatamari fiñashca cangui” nircami.

13Shina nijpimi Mandaj Diosca, ñucahuan parlajuj angelman juyailla shimicunahuan, cushichij shimicunahuan tigrachirca.

14Chaimandami ñucahuan parlajuj angelca, cashna nihuarca: “Caparishpa cashna ningui: Tucuita Mandaj Diosca cashnami nin:

‘Jerusalendapash, Sión lomatapash,

Ñucapajlla cachunmi ninandapacha munarcani.

15Chaimandami cungashca causanajuj llactacunataca, ninanda fiñashca cani.

Paicunaca, ashatalla fiñarishca cajpipash, ashtahuanmi fiñachihuarca’ ninmi.

16Mandaj Diosca, cashnatapashmi nin:

‘Ñucaca cutinmi Jerusalendaca ninanda llaquijuni.

Chaipimi, Ñuca huasitaca shayachinajunga.

Jerusalenbimi, plomadataca churanajunga’ ninmi tucuita Mandaj Diosca.

17Ashtahuan cashnatapash ningui: Tucuita Mandaj Diosca, cashnami nin:

‘Ñuca pueblocunaca, cutinmi ashtahuambacha tucuita charinga.

Mandaj Dios Ñucaca, Sión lomataca juyasharami.

Jerusalendaca agllashpa chasquisharami’ ninmi ningui” nihuarcami.

Cachucunatapash, caspihuan imatapash ruraj runacunatapash muscuipishna ricushcamanda

18Chai jipa ñuca vichai ricushpaca, chuscu cachutami ricurcani.

19Chaita ricushpami, ñucahuan parlajuj angeltaca: “¿Chaicunaca imata capan?” nircani. Shina nijpimi chai angelca: “Chai cachucunami, Judá llactapi, Israel llactapi, Jerusalenbi causajcunataca, caiman chaiman cachajurca” nircami.

20Chai jipaca, caspihuan imatapash ruraj chuscu runacunatami Mandaj Diosca ricuchihuarca.

21Chaita ricushpami: “Cai runacunaca, ¿imata rurangapata shamunajun?” nircani. Shina nijpimi chai angelca, cashna nihuarca: “Chai cachucunami, Judá llactapi causajcunataca, caiman chaiman cachanajurca. Chaimandami cutin jataritaca maijanllapash na ushanajurca. Ashtahuangarin cai runacunaca, chai llaquichinajuj llactacunapaj cachucuna, Judá llactapi causajcunata caiman chaiman cachashcamandami llaquichishpa tucuchingapa shamunajun” nircami.