1Yacunaihuan cashpaca, yacuta ufiangapa shamuichilla.
Culqui illaj cashpapash, yanga micungapa shamuichilla.
Culqui illaj cashpapash, vinotapash, lechetapash apangapa shamuichilla.
2Cangunaca, ¿Imashpata, micunata na randishpa, imatapash rurashpa tarishca culquitaca yanga tucuchishcanguichi?
Ñuca yachachijujta ali uyashpaca, ali micushcashnami causanguichi.
Cangunaca ali micushcashnami, cushijushpa causanguichi.
3Ali uyashpa yachajungapa, Ñucapajman shamuichilla.
Aliguta yachajushpallami, ali causaitaca charinguichi.
Davidta llaquishpa juyashcashnami, cangunatapash causaita causaicaman, llaquishpa juyangapa ari nircani.
4Ñucami, gentecunamanbash villachun,
llactacunatapash mandashpa yachachijuchun, paitaca churarcani.
5Cunanga: Canmi na rijsishca gentecunatapash cayangui.
Shinallata, na rijsishca gentecunapash Cambajmanmi shamunajunga.
Israelcunapaj jucha illaj, cangunata Mandaj Dios jatumbi churajpimi, chashna shamunajunga.
6Mandaj Diostaca, quishpirina punllacunapimi mascana canguichi.
Mandaj Diostaca, Pai uyana punllacunapimi mañana canguichi.
7Diosta na manllajcunapash, na alita ruranataca saquinami canguichi.
Na alita ruranata yariajlla causajcunapash, Mandaj Diospajman tigrarinami canguichi.
Paimi, cangunataca juyashpa charinga.
Ñucanchi Taita Diosmi, tucui juchacunata perdonanga.
8Mandaj Diosca cashnami nijun:
“Ñuca imata yarijushcapash, na cangunapaj yuyaishnachu.
Ñuca imata ruranapash, na canguna ruranashnachu.
9Jahua pachaca, cai pachamandaca ashtahuan jahuamanmi tiyajun.
Chashnallatami, Ñuca imata ruranapash, pipash na rurai ushanalla.
Ñuca imata yarijushcapash, cangunapaj yuyaitaca ashtahuan yalipachami.
10Tamiapash, rasupash jahua pachamanda urmashpaca, na chaimanllata tigranllu.
Alpaman tamiamushpa shutuchijpimi, granocunaca viñashpa fucun.
Chaimandami runaca, micungapapash, tarpungapapash, granocunataca charin.
11Chashnallatami, Ñuca imata rimashcapash na yangallata canga.
Ashtahuangarin, Ñuca imata nishcapash pactangapachami.
Ñuca imapa cachashcatapash, ashtahuan mirachishpami pactachinga.
12Cushijushpami llujshimunguichi.
Ima llaquipash illajmi tigramunguichi.
Urcucunapash, lomacunapash, cangunapaj ñaupajpimi candanajunga.
Pambacunapi shayanajuj quirucunapash, ninandami cangunamanda cushijunajunga.
13Zarza cashapaj randica, ciprés quirumi viñanga.
Tsinipaj randica, arrayán yurami viñanga.
Mandaj Dios Ñucapaj shuti jatun cajtaca chashnami ricuchinga.
Causaita Causaicamanmi chaicunaca, Ñuca ninan ushaita charijta ricuchinga” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
