1 SAMUEL 19 - Quichua Imbabura 2016

Saúl, Davidta huañuchingapa munashcamanda

1Saulca, paipaj churi Jonatandapash, paipajta rurajcunatapashmi, Davidta huañuchigrichun mandarca. Ashtahuangarin Saulpaj churi Jonatanga, ninandapachami Davidtaca llaquij carca.

2Chaimandami, cashna nishpa Davidman villachun cacharca: “Ñuca taita Saulca, candaca huañuchingapami munajun. Shina cashcamandami, pipash na ricunalla pushtupi, caya tutamandacaman pacajuna cangui.

3Ñucami, can pacajushca pushtuman, ñuca taitahuan llujshigrini. Chaipica, canmanda, ñuca taitahuan parlashpami, pai ima nishcatapash, canman villasha” nijurcami.

4Jonatanga, Davidmandaca alitallami paipaj taita Saulman parlashpa, cashna nijurca: “Jatun mandajlla, cambajta ruraj Davidta llaquichishpaca, ama juchata ruraichu. Paica, ima na alitapash candaca na rurashcachu. Ashtahuangarin imata cashpapash, alitallami rurashca.

5Paica, huañunatapash na manllashpami, chai filisteo runataca huañuchirca. Chashna rurashpa, tucui Israelcunata, Mandaj Dios quishpichijta ricushpami, canga ninanda cushijurcangui. Cunanga ¿imashpata David ima na alitapash na rurajpita, yahuarta jichashpa juchata ruragringui?” nijurcami.

6Jonatán chashna nijpimi, Saulca: “Mandaj Diospash ricujunmi, Davidtaca napacha huañuchishachu” nirca.

7Chai jipami Jonatanga, Davidta cayashpaca, imatalla parlashcacunata tucuilla villarca. Paillatami Davidtaca, Saulpajman pushamurca. Chaimandami Davidca, pundashnallata Saulman rurangapa saquirirca.

8Jipa punllacunapi, cutin macanajui tiyajpimi, Davidca, filisteocunahuan macanajungapa llujshirca. Paicunata mishashpa, ashtacacunata huañuchijpimi, pacajungapa calpanajurca.

9Taita Dios saquijpimi, shuj na ali espíritu, Saultaca cutin japirca. Paica, paipaj huasipimi, tucsishpa huañuchina jirruta chaririyaj tiyajurca. Chaipimi Davidca, arpata taquijurca.

10Saulca, tucsina jirruhuan shitashpa Davidtaca pircaman yalijta cusha yashpami, shitarca. Ashtahuangarin Davidca, Saulpaj ñaupajmanda anchurijpimi, pircapilla chayachirca. Shina cajpimi Davidca, chai tutallata pacajushpa upalla rirca.

11Saulca, huasipi chapashpa, tutamandata Davidta huañuchigrichunmi, paipajta ruraj runacunata cacharca. Ashtahuangarin Davidpaj huarmi Micalmi, cashna nishpa villarca: “Cunan tutallata na pacajushpa rishpaca, cayapaca huañunguimi” nirca.

12Shina nishca jipami Mical huarmica, Davidtaca, paipaj huasi ventanata llujchishpa uriajuchijpi, pacajungapa calparca.

13Chai jipami Mical huarmica, chivo milmata saunachishpa, jahualla churajunatapash churachishpa, rurashcalla diosta, David puñuna pushtupi sirichirca.

14Saúl cachashca runacuna Davidta japingapa chayajpimi, Mical huarmica: “Davidca huañujunmari” nirca.

15Shina villagrijpimi Saulca, paipajta rurajcunataca: “Caipi huañuchingapa, camandi apamugrichilla” nishpa, Davidpajman cutin cacharca.

16Chai cachashca runacuna huasiman yaicushpa ricujpica, genteman rijchajta rurashcami, chivo milmata saunashca, camapi sirijurca.

17Chaimandami Saulca, Micaltaca cashna nirca: “¿Imashpata chashna llullashpa, ñucata fiñaj runa pacajushpa richun saquircangui?” nijpimi Micalca, Saultaca cashna nirca: “Paica: ‘Ñucata richun saquihuai, na saquijpica huañuchishami’ nijpimi, richun saquircani” nircami.

18Chashna pacajushpa rishpami Davidca, Ramá shuti pueblopi causajuj Samuelpajman shamurca. Chaipimi, tucui imatalla Saúl paita rurashcata villajurca. Chai jipami Davidpash, Samuelpash, Naiot shuti pushtupi causangapa rirca.

19Chaitami Saulman cashna villarca: “Ricui Davidca, Ramá shuti pueblopi tiyaj Naiot shuti pushtupimi causajun” nishpami villarca.

20Chaimandami Saulca, Davidta pushamuchun shuj runacunata cacharca. Chaiman chayashpami, tandanajushca profetacuna, Dios ima nishcata villanajujpi, Samuel paicunataca mandajujta ricunajurca. Chaipimi Saúl cachashca runacunapajman, Diospaj Espíritu shamujpi, paicunapash Dios ima nishcata villanajurca.

21Chaita yachashpami Saulca, shujcunata cutin cacharca. Paicunapashmi, Dios ima nishcata villai callarinajurca. Chaimandami Saulca, shuj runacunatapash, caihuanga quimsacaman cutin cacharca. Paicunapashmi, chashnallata Dios ima nishcata villanajurca.

22Chaimandami Saulca, Ramá shuti puebloman paipacha rishpa, Secú shuti pueblopi tiyaj jatun pugyuman chayashpaca: “¿Samuelpash, Davidpash maipita?” nishpa tapujpimi, shuj runaca: “Paicunaca, Ramá shuti pueblopi tiyaj Naiot shuti pushtumanmi rishca” nishpa villarca.

23Ramá shuti pueblopi tiyaj Naiot shuti pushtuman Saúl ña rijujpimi, Diospaj Espíritu paipajman shamujpi, Ramá shuti pueblopi tiyajuj Naiot shuti pushtuman chayangacaman, paipash Diosmanda villashpandi rijurca.

24Saulca, paipaj churajunacunatapash llujchirishpami, paipash caishuj runacunashnallata, Samuelpaj ñaupajpi Diosmanda villajurca. Shina villajushpaca, tucui punlla, tucui tutatami lluchulla carca. Shina tucushcamandami: “¿Saulpash, profetapurallatachu?” ninajurca.