GÁLATAS 2 - Quichua Imbabura 2016

1Chunga chuscu huatacuna jipami, Bernabehuan, Jerusalenman cutin vichai rinajushpaca, Titotapash pushashpa rircanchi.

2Ashtahuangarin Dios ricuchijpimi, ñuca punda imatalla rurashcacuna, ama yanga saquirichun Jerusalenman vichai rircani. Chaipimi, crijcunata pushajcunatalla tandachishpa, na Israelcunaman quishpirinamanda ñuca imashna villashcatapash, paicunaman villarcani.

3Shina cajpimi ñucahuan shamuj Titotaca, griego cajpipash, circuncisionda ruranapachami cangui nishpaca, pipash na ni usharca.

4Shinallata, Cristo Jesusmanda, ñucanchi quishpirishcata ricungapallami huaquingunaca, “crijcunami canchi” nij tucushpa, pacalla purinajushca carca. Cutinllata gañanshna causachun munashpami chashna purinajurca.

5Shina cajpimi, paicunataca ashatallapash na cazurcanchi. Na llullashpa villajuj shimitalla cazushpa catingapami chashna rurarcanchi.

6Imamandapash alicachi tucushcacunami carca. Chai alicachi tucushcacunaca, ñuca nara yachashcataca imatapash na yachachihuarcachu. (Paicuna punda imashna causashcatapash, na yachanayanllu. Taita Diosca, na ñavita ricushpalla chasquijunllu).

7Ashtahuangarin, circuncisionda na rurashca gentecunaman quishpirinamanda villachun, ñucaman Dios mingashcatami paicunaca ricurca. Circuncisionda rurashcacunaman villajuchun Pedroman mingashcashnami, ñucamambash mingahuarca.

8(Circuncisionda rurashcacunaman villachun Pedrota cachaj Diosllatami ñucatapash, na Israelcunaman villajuchun cachahuarca).

9Jacobopash, Cefaspash, Juanbash tandajushca crijcunapaca ninanda alicachi tucushca pushajcunami carca. Paicunaca, ñucata Dios ninanda juyashpa na Israelcunaman villagringui nishcata yachashpami, Bernabehuan pacta villagrichun saquirca. Shina rurashpami cashna ninajurca: “Cangunaca, na Israelcunamanmi villagrina canguichi, ñucanchica circuncisionda rurashcacunamanmi villagrina canchi” ninajurcami.

10Paicunaca: “Imagutapash na charijcunata yaripanguichi” nishpallami mingarca. Chaitaca na cungashpami pactachijurcani.

Pabloca, Antioquía pueblopimi Pedrotaca shinllitapacha tacurishca

11Antioquía puebloman Pedro chayamujpica, na alitapacha rurashpa purijujta ricushpami, paitaca shinllitapacha ñavi ñavi tacurircani.

12Jacobo cachamushca runacuna nara chayamujpimi Pedroca, na Israelcunahuan micushpa tiyajushca carca. Ashtahuangarin, paicuna chayamujpica, circuncisionda rurashcacunata manllashpami, paicunamanda anchurishpa, caru carulla purijurca.

13Pedro chashna purijujpimi, chaishuj judiocunapash paishnallata purinajurca. Bernabepash, chaitaca alicachishcami purijurca.

14Quishpirinamanda villana shimita na cazushpa purijujta ricushpami Pedrotaca, tucuicunapaj ñaupajpi cashna nircani: “Canga, judío cashca jahuachu, na judiocunashna causashpa, na Israelcunashnalla causajungui. ¿Imashpata na Israelcunatara judiocunashnalla tucuchun mandajungui?” nircanimi.

15Ñucanchica, huahuamandapacha judiocuna cashpami, na shuj llactacunapi causajcunashna, juchayujcuna canchi.

16Mandashcacunata pactachijujpilla, alitalla rurashcatashnaca na chasquircachu, chaitaca yachanchimi. Ashtahuangarin, Jesucristota crijpillami chasquirca. Shinamandami, ñucanchipash, alitalla rurashcatashna chasquichunga, Jesucristota crircanchi. Mandashcata pactachishcamandalla na chasquishpami, Jesucristota crijpilla chasquinga. Shina cajpimi, mandashcata pactachishcamandalla, alitalla rurashcatashnaca, pitapash na chasquinga.

17Cristomandalla, alitalla rurashcatashna chasquichun munashcamandaca, ñucanchipashmi juchayu ricurinchi. Shina cashpaca, ¿Cristochu juchataca rurachijun? napacha shinachu.

18Ima na alita ruranatapash shitashca jahua, cutinllata chaita tigra rurajushpaca, cutinmi juchayu tigrajuni.

19Ñucaca, mandashca shimicunata ama rurangapaca huañushcashnami cani. Chai mandashca shimillatami huañushcatashna saquihuashca. Shina cashpapash cunanga Taita Diospajllami causajuni.

20Cristohuan chacatai tucushcashna cashpami, na ñucapajllata causajuni. Ashtahuangarin, Cristopajmi causajuni. Cunan cai causaipi causajushpapash, Taita Diospaj Churita crishpami causajuni. Paica, ñucata juyashpami ñucamanda huañurca.

21Taita Dios, ñucata ninanda juyajujtaca na yangapi churashachu. Mandashca shimicunata pactachishcamandalla, alitalla rurashcatashna Dios chasquina cajpica, Cristoca yangami huañunman carca.