1Job runaca, cashnatami ashtahuan nishpa catirca:
2“Tucuita rurai ushaj Diosmi.
Paimi, ñuca japina cashcataca quichuhuarca.
Paimi, ñuca almatapash ninandapacha llaquichihuashca.
3Ñuca causana punllacamanga,
Taita Dios samaita carashca punllacamanga,
4ñuca shimihuanga, napacha ima na alitapash rimashachu.
Ñuca jallupash, napacha llullashpa rimangachu.
5Canguna, imata nishcatapash napacha chasquishachu.
Huañungacamanmi, ñucaca ima na alitapash na rurashpa causasha.
6Ñuca causajui punllacunapica, alitalla rurashpami causasha.
Chashna causashpami, imapipash na pingai tucusha.
7Ñucata fiñaj runaca, Diosta na manllaj runashna llaquita apachun.
Ñucata na ricunayachij runapash, na alita ruraj runashna cachun.
8Taita Dios causaita quichujpica, ninanda shuhuashca cashpapash,
Diosta na manllaj runaca, ¿ima alitashi japinga?
9¿Paita jatun llaqui japijpica,
ninanda caparishpa pai mañajtaca Taita Diosca uyangachu?
10¿Paica, tucuita rurai ushaj Diosmandaca cushijungachu?
¿Paica, Taita Diostaca tucui punllacuna mañajungallachu?
11Taita Diospaj ushaihuan imatalla rurajtaca, ñucami cangunaman ricuchisha.
Tucuita rurai ushaj Dios imata yarijujtaca, na pacashpami villasha.
12Uyaichi, cangunaca tucuicunami ricushcanguichi.
¿Imashpata, cangunaca yangata rimarcanguichi?
13Diosta na manllaj runamanmi cai llaquitaca cungapa charijun.
Na alita rurashpa llaquichijcunaca, tucuita rurai ushaj Diosmandami cai llaquicunata japinga:
14Paipaj huahuacuna ninanda mirashpapash, espadahuanmi huañuchi tucunga.
Uchilla huahuacunapash, yarjaimanda llaquitami causanga.
15Paipuramanda huaquin puchushcapash, ungüicunahuanmi huañunga.
Sapalla saquirij huarmicunapash, paicunamandaca na huacanajungachu.
16Ñutu alpatashna culquita mirachishcatapash,
churajunata ninanda mirachishcatapash,
17chashna mirachishcataca, alita rurashpa causajcunami churajunga.
Ima na alita na ruraj runacunami, culquitapash chaupirinajunga.
18Paipaj huasitapash, polillami micushpa tucuchinga.
Chai huasica, ricushpa causaj runa rurashca chuglla huasishnami canga.
19Ninan charij runaca, cungashcami puñujunga.
Ñavita pascajpica, imapash illajmi canga.
20Shina cajpimi, yacu miramujpishna jatun llaqui japinga.
Tutapash, jatun acapana pillunshnami llaquichinga.
21Shinlli huaira jatarishpami paitaca apanga.
Ninan huairahuan tamia jatarishpami,
pai tiyajushca pushtumandaca anchuchinga.
22Taita Diosca, na alita rurashcata na cungashpami ninanda llaquichinga.
Paica, Diospaj maquimanda pacajungapa munashpapash na ushangachu.
23Chashnami na alicunataca,
na alicachishpa maquita huajtashpa, silbanajunga.
Who We AreWhat We EelieveWhat We Do
2025 by iamachristian.org,Inc All rights reserved.
