1Mandajcunataca, tucuicunami cazuna canguichi. Mandana ushaitaca, Taita Dios cujpillami charin. Cunanbi mandajcunaca, Taita Dios churajpimi mandashpa tiyanajun.
2Mandajcunata pipash na cazushpaca, Taita Dios mandachun churashcatami na cazunajun. Na cazungapa munajcunaca, paicunallata llaquichi tucungapami, chashna ruranajun.
3Mandajcunaca, alita rurashpa causajcunata manllachingapaca na tiyanajunllu. Ashtahuangarin na alita rurajcunatami llaquichinga. ¿Mandajcunata na cazushpa causangapachu munangui? Alitalla rurashpa causashpaca mandajcuna alicachijpimi causangui.
4Paicunaca, cambaj ali cachunmi, Taita Diospajta ruranajun. Na alita rurajushpaca, manllanami cangui. Paicunaca, Taita Diospajta rurajcuna cashpami, na yangamanda espadata charinajun. Paicunami, na alita rurajcunataca chashnallata llaquichinga.
5Shina cajpica, llaquichinata manllaimandalla cazunaca na canllu. Ashtahuangarin, cazunapacha cashcata yarishpami, chaita rurana canguichi.
6Mandajcunaca, Taita Diospajta rurajcuna cashpa, chaita pactachinajujpimi, impuestotapash cunajunguichi.
7Imata mañashca cashpapash, chashnallatami tucuicunaman tigrachina canguichi: Impuestota cuna cajpipash cunami canguichi. Cazuna cajpipash, cazunami canguichi. Alicachina cajpipash, alicachinami canguichi.
8Tucuicunaman alita rurashpami, caishuj chaishuj juyarishpa causana canguichi. Paipaj cumbata juyashpami, mandashca shimita pactachijun.
9Mandashca shimipica, cashnami nijun: “Cazarashca jahua, ama shujcunahuan causanguichu, ama huañuchinguichu, ama shuhuanguichu, ama llullanguichu, shujcuna imata charijtapash ama munanguichu” nijunmi. Cai mandashcacunapash, ashtahuan shuj mandashcacunapash: “Can juyarinshnallatami, shujcunatapash juyana cangui” nishpa mandashcapimi tucuita pactachijun.
10Juyaita charishpaca, shujcunataca na llaquichingachu. Juyaita charishpaca, mandashcatami pactachijun.
11Cai punllacuna imashna cajta yachashpami, puñunajujshna causanajunmanda rijcharina canguichi. Ñucanchi crishpa callarishca punllacunata yarijpica, quishpirishcacuna rina punllacunaca ñami ashtahuan chayamujun.
12Tutaca pacarimushpami ña punllayamujun. Shina cajpimi, yanapishna causashpa, na alita ruranataca saquishpa, michapi causanata yarina canchi.
13Punllapi purinajujshna alitalla rurashpa causashunchi. Yapata micushpa, ufiashpa causanatapash saquishunchi. Ima munashcata ruranata, na ali munaicunatalla ruranata, fiñanajushpalla causanata, shujcuna imata charijta munashpa ricunatapash saquinami canchi.
14Ashtahuangarin, Apunchi Jesucristopaj ushaitami churajujshna japina canguichi. Aicha munaicuna japijpipash, napacha ruranachu canguichi.
Who We AreWhat We EelieveWhat We Do
2025 by iamachristian.org,Inc All rights reserved.
