1Tucui mandajcuna,
¿Cangunaca, ali ricushpachu mandanajunguichi?
Huañuna aichayuj runacuna,
¿Ima llaquitapash, ali ricushpachu alichinguichi?
2Ashtahuangarin na alita ruranatallami yarinajunguichi.
Cangunaca jatun llaquicunatallami, cai pachapica ruranajunguichi.
3Diosta na manllajcunaca, mamapaj vijsapi cashpallatami, Diosmanda anchurinajurca.
Llullacunaca huacharishca punllallatami, pandarishpa chinganajurca.
4Culebrapaj venenohuanshnami, paicunaca llaquichinajun.
Paicunaca, na uyaj millai culebrashna cashpami, na uyanajun.
5Na uyaj culebrashna cashpami, yumbu rimajtapash na uyan.
Ali yachaj yumbu taquijpipash, na uyanllu.
6Taita Dioslla,
paicunapaj quirucunataca, paicunapaj shimipillata faquipayari.
Mandaj Dioslla,
maltun leongunapaj quirucunatapash faquipayari.
7Paicunaca, yacu jicharijshna chingachun.
Paicunapaj flechacunata cacharijpica, ñuturishpa tucurichun.
8Paicunaca, churu yacuyajshna chingachun.
Huañushcata ungushca huahuashna, inditaca ama ricuchun.
9Paicuna nara yachajpillata,
casha yamdatashna rupachishca cachun.
Causaj cajpillata, ninan huairahuan tamia shamushpa apachun.
10Alitalla ruraj runaca, Dios llaquichijta ricushpami cushijunga.
Paita fiñajcunapaj yahuar jicharishcatami sarujunga.
11Gentecunaca: “Alitalla ruraj runaca, alita japinatami charin.
Cai pachapica, tapuchishpa llaquichij Taita Diosca tiyambachami” ninajungami.
Who We AreWhat We EelieveWhat We Do
2025 by iamachristian.org,Inc All rights reserved.
