ESDRAS 6 - Quichua Imbabura 2016

1Shina nijpimi, jatun mandaj Darío shuti runaca, quilcashcacunata alichishca ucupi mascachun cacharca. Babilonia llactapica, chai huasipimi ima alitapash alichishpa charij carca.

2Chashna mascachun cachajpimi, Media shuti llactapi, Acmeta shuti pueblopi mandashpa tiyajuna huasipi shuj quilcashcacunata pillushpa alichishcata tarirca. Chaipica cashnami quilcashca carca: “Jatun mandaj quilcachishcacuna:

3Jatun mandaj Ciro shuti runami, Babilonia llactata mandai callarijui huatapica, Jerusalenbi Taita Diospaj huasita cutin shayachinajuchun, cashna mandajun: ‘Callari rumicunata churashpami, Diospaj huasitaca cutin shayachishpa, pircacunatapash shayachina canguichi. Chaipimi Diosman animalta cushpa huañuchina canguichi. Chai huasitaca, ishcai chunga canchis metro jatunda, anchotapash chashnatallatami rurana canguichi.

4Pircataca, quimsa fila labrashca rumicunahuan, shuj fila tablatapash mushujta churashpami rurana canguichi. Chai huasita rurachunga, jatun mandaj ñuca huasipi alichishca culquitami cunga.

5Shinallata, Diospaj huasi Jerusalenmanda, curita, culquita, imalla tiyashcata, Nabucodonosor runa Babiloniaman apashcataca, cutin Jerusalenman tigrashpa apanguichilla. Chaita apashpaca, Taita Diospaj huasipi churagringuichi’ nishpami mandarca” nishpa quilcashcami tiyajurca.

6“Cunanga, jatun yacu chimba llactacunata mandaj Tatnai shuti runapash, Setar-boznai shuti runapash, jatun yacu chimba llactacunata mandaj cangunapaj cumbacunandi, Jerusalenmandaca anchuringuichi.

7Diospaj huasita shayachinataca na jarcanachu canguichi. Judá llactata mandajpash, cati mandajcunapash, Diospaj huasitaca punda shayajushca pushtupillata cutin shayachinajuchun saquichilla.

8Diospaj huasita cutin shayachinajuchun, Judá llactata mandajcunataca, canguna tucuipi yanapachunmi mandani. Chai huasita rurana ama jarcarichunmi, jatun yacu chimbaman causajcuna, jatun mandajman impuestota cunataca, na jipayashpa cuna canguichi.

9Jahuapachapi causajujlla Diosman cushpa tucuillata rupachingapa, sacerdotecuna imatalla mañashcatapash, tucui punllami, huagrata, jari llamacunata, maltun llamacunata Jerusalenbi cuna canguichi. Shinallata, trigota, cachita, vinota, aceitetapash, na mitsashpami cuna canguichi.

10Jahua pachapi causajujlla Dios munashcashnami tucuillata rupachinajuchun cuna canguichi. Shinallata jatun mandaj ñucamandapash, ñuca churicunapaj causaimandapash, Diosta mañanajuchunmi cuna canguichi.

11Cashnatapashmi mandani: Ñuca mandashcata maijambash na cazujtaca, paipaj huasipi viga caspita surcushpa, chai caspita shayachishpa sipinguichi. Paipaj huasica mapata shitana pushtumi tigranga.

12Taita Diosllata, Paipaj shuti Jerusalenbi tiyajuchun rurachishca, Diospaj huasita urmachindaca, jatun mandaj cajpipash, shuj gentecuna cajpipash ninanda llaquichishca cachun. Jatun mandaj Dariomi chaicunataca ucha rurachun mandarcani” nishpami mandarca.

13Chaimandami, jatun yacu chimba llactata mandaj Tatnai shuti runaca, Setar-boznai shuti runandi, paicunapaj cumbacunandi, jatun mandaj Darío mandashcataca tucuita pactachinajurca.

14Shinallata, Diospaj profeta Hageo runapash, Iddo shuti runapaj churi Zacariaspash, Judá llactapi causajcunata mandajcunapash, tucuillami chai huasita shayachishpa tucuchirca. Chashnami Israelcunapaj Taita Dios mandajpi, Ciro shuti, Darío shuti mandajcunapash, Persia llactata jatun mandaj Artajerjes shuti runapash, chai huasita shayachinajuchun mandarca.

15Chai huasitaca, jatun mandaj Darío shuti runa sucta huatata mandajujpimi, Adar quilla quimsa punllapi tucuchirca.

16Chaipimi Israelcunapash, sacerdotecunapash, levitacunapash, prezu apai tucushcacuna huaquin tigramushcacunapash, Diospaj huasitaca ninanda cushijushpa Diosman minganajurca.

17Diospaj huasita, Diosman minganajushpaca, patsaj shicuta, ishcai patsaj jari llamata, chuscu patsaj maltun llamacunatami Diosman cunajurca. Israelcunapaj juchamandaca, chunga ishcai Israel ayllucuna cashcamandami, chunga ishcai maltun chivota cunajurca.

18Chai jipami, Moisés mandashpa quilcashcashna pactachinajuchun sacerdotecunataca, catipi catipi yaicuchun churarca. Jerusalenbica, imata rurana cashcapipash levitacunatami, Diospajta ruranajuchun churarca.

19Huata callari quilla, chunga chuscu punllapimi, prezu apai tucushcacuna tigramushpaca, pascua punllapi jatun micuita ruranajurca.

20Sacerdotecunapash, levitacunapash, shujllashnalla yarishpami mapa illaj saquirirca. Chashna cashpami, prezu apai tucushcacuna tigramushcamanda, paicunapaj huauqui sacerdotecunamanda, paicunamandallatapash, Diosman animalcunata cushpa huañuchinajurca.

21Chai pascua punllapica, prezu apai tucushcamanda tigramushca gentecunami, Israelcuna ama ashtahuan juchata rurangapa, Diospajman tigrarishca gentecunahuan tandanajushpa micunajurca

22Levadura illaj tandata micui cushijuitaca, canchis punllacamanmi ruranajurca. Asiria llactata jatun mandajpaj shungutapash, paicunata juyana yuyaita cushpa, Mandaj Diospaj huasita shayachinatapash yanapashcamandami, chashna cushijunajurca.