1Chai jipami Job runaca, pai huacharishca punllata na alicachishpa rimajurca.
2Job runaca caparishpami, cashna nijurca:
3“Ñuca huacharishca punllatapash, na alicachinichu.
‘Jari huahuatami ungushca’ nishpa villashca tutatapash, na alicachinimi.
4Chai punllapash, yana tutashna cachun.
Chai punllataca, Taita Diospash ama yarishca cachun.
Chai punllapica, ima punchayachijpash illashca cachun.
5Chai punllataca, yana tuta quilpashca cachun.
Yana fuyupash quilpashca cachun.
Chashna quilpashca manllanai cachun.
6Chai tutaca, yana tutapacha cachun.
Chai punllataca, huatapica na yupashca cachun.
Shinallata quillacunapipash, na yupashca cachun.
7¡Chai tutapica, ama pipash huacharishca cachun,
Chai tutapica, imata candanapash ama tiyashca cachun!
8Punllata na alicachijcunapash, na alicachishca cachun.
Leviatán animalta rijchachijcuna, na alicachishca cachun.
9Punllayajujpi llujshijuj luzerocunapash, ama punchayachishca cachun.
Punchayachijta shuyajujpipash, ama punchayachishca cachun.
Pacarishpa punchayachijuj indipash ama ricurishca cachun.
10Ñuca mamapaj vijsata na vichashcamanda,
ñuca ñavi cai llaquicunata ricuchun saquishcamanda, chashna cachun.
11Ñucaca, ¿imashpata na vijsapillata huañurcani?
Na cashpaca, ¿imashpata huacharishcandi na huañurcani?
12¿Imashpata ñuca mamamanda llujshircaniyari?
¿Imapata chuchuchihuashcayari?
13Huañushca cashpaca, cunanga samajuimanmi carcani.
Puñushpa, samajuimanmi carcani.
14Jatun mandajcunahuan, paicunaman yuyaita cuj runacunahuanmi samajuiman carcani.
Paicunaca, paicunata yarichunmi, urmashca huasicunata shayachinajun.
15Na cashpaca, curita charij mandajcunahuan,
culquita huasipi jundachij runacunahuanmi samajuiman carcani.
16¿Imashpata na chullushca huahuatashna, na pambahuarcanguichiyari?,
¿imashpata nara huacharishpata huañushca huahuatashna, na pambahuarcanguichiyari?
17Huañujpica, na ali gentecunaca na llaquichij shamunllu.
Shaijushca, ushai illajcunapash, chaipimi samanajun.
18Prezucunapash, chaipimi samanajun.
Chaipica, mandashpa llaquichijcunapash na uyarinllu.
19Huahuacunapash, rucucunapash chaipillatami.
Cacharichi tucushca gañangunapash chaipimi.
20¿Imashpata llaquita apajcunara causanajunchiyari?
¿Imashpata, na cushijuita charijcunara causanajunchiyari?
21¿Imashpata, huañungapa munajcunara na huañun?
¿Imashpata, huañuita ninanda mascajcunara na huañun?
22Huañushpaca, ninandapachami cushijunga.
Pambai tucushpacarin, ashtahuanmi cushijunga.
23¿Imashpata, na causai ushajcunamanra causaita caran?
¿Imashpata, Taita Diosllata chashna llaquihuan causachun churashca?
24Micungapa randica, ninan llaquicunami chayamunhuan.
Ñuca llaquirishca viquicunapash, yacushnami calpajun.
25Ñucata manllachij llaquicunami japihuashca.
Ñuca ninanda manllashca llaquicunami japihuashca.
26Cushilla, cungailla ali causaitaca, napacha charishcanichu.
Ashtahuangarin, musparina llaquicunami japihuashca” nijurcami.
Who We AreWhat We EelieveWhat We Do
2025 by iamachristian.org,Inc All rights reserved.
