1Taita Diosca punda huatacunallatami, profetacunahuan, ñaupa taitacunaman, imashnapash, cutin cutin ninanda yarichishpa villajushca.
2Cai tucurimui punllacunapica, Paipaj churihuanmi ñucanchiman villajushca. Tucui ima tiyachumbash Paihuanllata rurashca cashpami, tucui ima tiyashcatapash Paimanllata cushca.
3Taita Diospaj ninan ushaita, Dios imashna cajtapash Paipaj Churimi, chashnapacha cajtaca ricuchijun. Paillatami, tucui ima tiyashcatapash, ninan ushaihuan rimashpa cazuchishpa charijun. Paillatami, ñucanchi juchacunata anchuchishpa, mapa illajta rurashca. Chai jipaca ninan ushaihuan, jahua pachapi mandashpa tiyajuj Diospaj ali maquimanmi tiyarirca.
4Paica, angelcunatapash yali ushaitami charin. Chashna cashpami, angelcunatapash ashtahuan yali juyailla shutiguta chasquirca.
Diospaj Churica, angelcunatapash yalimi5Taita Diosca maijan angeltata:
¿“Canga, Ñuca Churigumi cangui.
Cunanga, Ñucami, Cambaj Taita cani” nirca?
Cutinbash:
“¿Ñucami, Paipaj Taita casha.
Paica, Ñuca Churimi canga” nircachu?
6Cutimbashmi, Paipaj shujlla Churita, cai pachaman cachamushpaca:
“Taita Diospaj tucui angelcuna,
Paitaca ninanda alicachinguichi” nijunmi.
7Angelcunamanda parlashpaca cashnatami nijun:
“Paipaj angelcunataca, huairatashnami rurashca.
Paipajta rurajcunataca, nina rupajujtashnami rurashca” nijunmi.
8Ashtahuangarin, Paipaj Churimanda parlashpaca cashnami nijun:
“Taita Dioslla,
Can mandashpa tiyarinaca,
causaita causaicamanmi canga.
Can mandana vara caspica,
Can mandajuj llactapaj ali cachun mandanami canga.
9Alitalla ruranata juyashpami, na alita ruranataca millanayachishcangui.
Shina cajpimi Taita Diosca, Candaca aceiteta talishpa javirca.
Paica, cambaj Taita Diosmi.
Cambaj cumbacunatapash yali cushijuchunmi, shina rurarca” nijunmi.
10Shinallata cashnatapashmi nijun:
“Cai pachataca, Canmi callarichiparcangui.
Jahua pachatapash, Canmi ruraparcangui.
11Tucui chaicuna tucurijpipash, Canga causajunguillami.
Chaicunaca, churajuna tucurijshnami maucayanga.
12Shina cajpimi, chaicunataca shitashpa mushujta churangui.
Ashtahuangarin, Canga causaitami causajungui.
Cambaj causanaca, napacha tucuringachu” nijunmi.
13Taita Diosca, napacha maijan angeltapash:
“Canda na ricunayachijcunata,
can saruchun, cambaj chaquipi churangacaman,
ñuca ali maquiman tiyarilla” nishcachu.
14¿Nachu tucui angelcuna, Diospajta ruraj espiritucuna? Paicunataca, quishpirinata chasquijcunata yanapachunmi cachamushca.
Who We AreWhat We EelieveWhat We Do
2025 by iamachristian.org,Inc All rights reserved.
