COLOSENSES 3 - Quichua Imbabura 2016

1Cristohuan causarishpa, mushuj causaita charishca cashcamandami, jahua pachapajtalla rurashpa causana canguichi. Chaipimi Cristoca, Taita Diospaj ali maquiman tiyajun.

2Cai pachapi ima tiyajtapash na yarishpami, jahua pachapi japigrinatalla yarishpa causana canguichi.

3Cangunaca, cai pachapaca ñamari huañushcashna canguichi. Cangunapaj causaitaca, Cristota crishcamandami Taita Diosca alichishca charijun.

4Cangunaman causaita caraj Cristo ricurimujpimi, cangunapash Paishnalla ninan ushaihuan, juyailla ricuringuichi.

Punda causaimanda, mushuj causaimandapash villashcami

5Cai pachapajta rurachun yarichijuj munaicunataca, tucuchinami canguichi: Huainayanata, mapatalla rurashpa causanata, na alitalla rurana yuyaicunata, na ali munaicunata, charijyanatalla munanataca saquinami canguichi. Chaicunaca, rurashcalla dioscunata mañashcashnallatami ricurijun.

6Taita Diosca, Paita na cazushpa chashna na alita rurajcunatami, ninanda fiñashpa llaquichinga.

7Cangunapash, chashnallata na alita rurashpami pundaca causarcanguichi.

8Ashtahuangarin cunanga, tucui caicunatami saquina canguichi: Ninanda fiñarinata, shungu ucupilla fiñarinata, na alicachishpa rimanata, na ali shimicunata rimanata, mapa shimicunata rimanataca, saquinami canguichi.

9Na alita rurashpa punda causashcataca saquishpami, caishujmanda chaishujmanda na llullarishpa causana canguichi.

10Cangunaca, ñami mushuj causaita japircanguichi. Shinamandami, cangunata ruraj Taita Dios mushujyachijpi, Paishnalla cana munaihuan, Paita alipacha rijsingacaman, punllandi catina canguichi.

11Shinamandami cunanga: Griego cashpa, judío cashpa, circuncisionda rurashca cashpa, na rurashca cashpapash, shuj llactamanda cashpapash, ashatalla yachajushca cashpapash, gañan cashpa, na gañan cashpapash, chashnallata canguichi. Ashtahuangarin Cristoca tucuicunapajmi, tucuicunahuanmi causajun.

12Cangunaca, Taita Dios juyashpa, Paipajlla causachun agllashcacuna cashpami, tucui shunguhuan llaquishpa, jatun juyaihuan, na jariyashpa, ali shunguhuan, na ñapash fiñarishpa aliguta causana canguichi.

13Caishujhuan chaishujhuan aliman chasquirishpa, shujcuna llaquichijpipash, perdonarishpami causana canguichi. Cristo cangunapaj juchata perdonashca cajpimi, cangunapash chashnallata perdonarina canguichi.

14Ashtahuambacha tucuita yalica, ninan juyaitami charina canguichi. Shina causashpami, imapipash na pandarishpa aliguta causanguichi.

15Ali causanaguta Taita Dios carashpa, cangunapaj shungupi yarichijuchunmi munani. Cangunaca, shujlla cuerpo tucushpa causanajuchun agllashcacunami canguichi. Chaimandami, Paita pashi nishpa causana canguichi.

16Cristo villashca shimicunataca napacha cungashpami causana canguichi. Cangunaca caishujhuan, chaishujhuan aliguta yarichirishpa, aliguta yachajushpami ali yuyaita japina canguichi. Salmocunata, Apunchi Jesusta alicachishpa candanacunata, Diospaj Espíritu yachachishca juyailla candanacunatapash, tucui shunguhuanmi candana canguichi.

17Tucui imata rurashpapash, imata parlashpapash, Apunchi Jesuspaj shutipimi tucuita rurana canguichi. Paimandallami, Taita Diostaca pashi nina canguichi.

Crijcuna imashna causanamanda

18Huarmicuna, cangunapaj cusataca, Apunchi Jesús munashcashnami, aliguta cazuna canguichi.

19Cusacunapash, cangunapaj huarmitaca juyanami canguichi. Paicunataca na llaquichinachu canguichi.

20Huahuacunapash, cangunapaj taita mama mandashcataca, tucuitami cazuna canguichi. Shina cachunmi Apunchi Jesusca munan.

21Taitacunapash, cangunapaj huahuacunapaj shungupi ama yapata llaquirichunmi, na yangamanda fiñachina canguichi.

22Gañangunapash, cai pachapi cangunata mandajcunataca, tucuipi cazunami canguichi. Gentecuna ricunajujpilla alita rurajcunashnaca na canachu canguichi. Paicunaca, ricunajujpillami alita ruranajun. Ashtahuangarin Taita Diosta manllashpami, tucui shunguhuan rurana canguichi.

23Tucui imata rurashpapash, gentecunaman rurajshnaca na ruranachu canguichi. Ashtahuangarin, tucuitami Apunchi Jesuspajta rurajshna, tucui shunguhuan rurana canguichi.

24Taita Dios carasha nishcata japigrinataca alimi yachanguichi. Shinamandami, Apunchi Jesucristoman tucuita aliguta rurashpa causana canguichi.

25Ashtahuangarin na alita rurashcamandaca, na alitallatami japinga. Diosca, na ñavita ricushpalla chasquijunllu.