EFESIOS 3 - Quichua Imbabura 2016

Na Israelcunamanmi Pabloca villajushca

1Cristo Jesusmanda, na Israelcunaman villajushpa prezu tiyajuj Pablomi cani.

2Taita Diospaj ninan juyaimanda, cangunapaj ali cachun villajushcataca ñami yachanguichi.

3Diosca, pacashpa charishcacunatami ñucaman ricuchihuarca. Chaitaca, ñami pundallata quilcamurcani.

4Chaita quilca catishpaca, Cristo tucui pacalla charishcacunata, ñucaman yachachishcatami yachai ushanguichi.

5Chai pacashpa charishcacunataca, punda miraicunamanga na ricuchishcatami yachanguichi. Ashtahuangarin cunanbica, Paipajlla causaj apostolcunaman, profetacunamambashmi, Paipaj Espirituta carashpa ricuchimushca.

6Dios “carashapachami” nishcataca, Cristo Jesusmandami, na Israelcunapash japinajun. Quishpirinamanda villajpi chasquishpami, na Israelcunapash, Israelcunahuan shujlla tucushca.

7Taita Dios ninanda juyashpami, Paipajta rurachun ñucaman mingahuarca. Shina rurashpami, Pai ninan ushaita charishcata ricuchijun.

8Diospajlla causajpuramandaca, ñucami tucuita yali ashtahuan jipa cani. Chashna cajpipash, Diosca ñucata ninanda juyashpami, Cristo Paipaj ninan juyaihuan quishpichijujta, na Israelcunaman villachun mingahuarca.

9Shinallata, Taita Diosca, tucuita rurai callarishca punllamandapacha pacalla charijushcatami, tucuicunaman villachun ñucaman mingahuarca.

10Tucuita yachaj Taita Dios cashcataca, jahua pachapi mandajcunaman, ushaita charijcunamambash, tandanajushca crijcuna ricuchinajuchunmi chashna churashca.

11Chaitaca, pundamandapacha, Dios imata pactachingapa shuyajushcashnami, ñucanchita Mandaj Cristo Jesusta cachamushpa pactachirca.

12Ñucanchica, Cristota crishpa Paihuan shujlla tucushpami, “Diospajman chayagrishapachami” yashpa shuyanajunchi.

13Cangunamanda cashna jatun llaquicunata ñuca apajujpipash, na shaijushpami catina canguichi. Chaicunaca, cangunapaj ali cachunmi chashnaca tucushca.

Jesucristomi ñucanchitaca ninanda juyajun

14Shina cashcamandami, ñucanchi Apunchi Jesucristopaj Taita Diospaj ñaupajpica cungurishpa mañajuni.

15Paimi, jahua pachapipash, cai pachapipash tucui ima tiyachumbash churarca.

16Tucui ushaita charij Taita Dios, Paipaj Espirituhuan cangunapaj shungupi ushaita carajpi, shinlli catinajuchunmi mañajuni.

17Canguna crishcamanda, Jesucristo cangunapaj shungupi causajuchun, shinallata, shungumandapacha ninanda juyarishpa causanajuchumbashmi mañajuni.

18Shina cajpimi, Diospajlla causanajuj tucui crijcunandi, cangunaca, Cristo ninanda juyajujta, aligutapacha yachanguichi. Paipaj juyaica tucui cai pachata yalipachami.

19Cristopaj juyaica, cai pachapi tucuitapash yalipacha ali cajta yachachunmi mañajuni. Taita Dios cangunapaj shungupi tiyajujpimi chaitaca yachanguichi.

20Diosca, ñucanchi imata mañajujtapash, imaguta japingapa yarijujtapash, ashtahuan yali carangapami tucui ushaita charin. Chaitaca, ñucanchi shungupi causajuj Paipaj ushaihuanllatami chashnaca ruranga.

21Cristo Jesusmanda tandanajushca crijcunaca, tucuicunami causaita causaicaman, Taita Diostaca ninanda alicachina canguichi. Chashna cachun.