Psalms 105 - Quichua Imbabura 2016

Mandaj Diosca, Israelcunaman alicunata rurashcamanda(1 Crón. 16:7-22)

1Mandaj Diosta ninanda alicachishpa, Paipaj shutipi mañaichi.

Pai imatalla rurashcataca, shuj gentecunaman villaichi.

2Salmocunata, Paiman candaichi.

Pai imatalla juyailla rurashcacunata villaichi.

3Jucha illaj Paipaj shutipi ninanda cushijuichi.

Mandaj Diosta mascajcunaca, tucui shunguhuan cushijuichi.

4Mandaj Diospajman quimirishpa, Paipaj ushaita mascaichi.

Paitaca punllandi mascaichi.

5Ima juyaillacunata Pai rurashcataca na cungashpa yarichi.

Jatun manllarinacunata rurashcatapash,

Paipaj shimihuan rimashpa llaquichinatapash yarichi.

6Diospajta ruraj Abraham runapaj miraicunalla,

Pai agllashca Jacobpaj miraicunami canguichi.

7Mandaj Diosmi, ñucanchi Taita Dios.

Pai rimashca shimicunaca, tucui cai pachapimi uyarijun.

8Pai ari nishcataca, causaita causaicamanmi Paica yarijun.

Huaranga huaranga miraicunaman,

Pai mandashca shimicunatapash na cungashpami yarijun.

9Abrahamman pactachishapacha nishpa ari nishcatapash,

Isaacman juramentushca shimicunatapash na cungashpami yarijun.

10Mandashcata pactachijuchunmi Jacobman curca.

Taita Israelmanmi, causaita causaicaman ari nirca.

11Paica cashnami nirca: “Canaán llactatami canman carasha.

Can japinataca, cambaj cachunmi carasha” nircami.

12Shuj llactamanda huaquinlla shamushpa,

chai llactapi huaquinlla purinajujpimi chashna nirca.

13Paicunaca, llactan llactanmi purinajurca.

Shuj llactamandaca, shuj gentecunapajman yalishpami causanajurca.

14Paicunata pipash llaquichishpa charichunga, na saquircachu.

Ashtahuangarin, paicunata juyaimandami jatun mandajcunataca llaquichijurca.

15“Ñuca agllashca mandajcunataca, na tacarinachu canguichi.

Ñucapaj profetacunataca, na llaquichinachu canguichi” nircami.

16Paicunapaj llactamanga, yarjai punllacunatami cachamurca.

Micuna tucui granocunatami chingachirca.

17Chai llaquimanda llujchijuchunga, shuj runatami cacharca.

Paica, gañan cachun jatushca Josemi carca.

18Paipaj chaquipica, grillocunata churachishpami llaquichirca.

Paitaca, prezuna huasipimi vicharca.

19Dios villashca shimicuna pactangacamanmi, chaipi carca.

Mandaj Dios rimashcami Josetaca, ali cajta na ali cajta ricuchijurca.

20Jatun mandajmi, Joseta cacharichun mandarca.

Llactata mandaj runami cacharirca.

21Josetaca, mandajpaj huasipi mandajuchunmi churarca.

Chai mandajpaj ima tiyashcacunata ricushpa mandachunmi churarca.

22Cati mandajcunatapash, pai munashcashna cazuchijuchunmi saquirca.

Ali yachajushcacunata, ashtahuan yachachijuchunmi churarca.

23Chai jipami taita Israelca, Egipto llactaman shamurca.

Paica, Cam shuti llactapimi causajurca.

24Chaipimi, Dios agllashca gentecunaca ninanda miranajurca.

Paicunata fiñajcunataca, ashtahuan yali shinllicunami tucunajurca.

25Chai llactapi causajcunaca, na ricunayachishpami,

Dios agllashca gentecunataca, ninanda llaquichi callarirca.

26Taita Diosca, Paipajta ruraj Moisestapash,

Pai agllashca Aarondapashmi cacharca.

27Paicunamanga, imatalla rurashpa ricuchina ushaitami curca.

Cam shuti llactapica, jatun manllarinacunatami ruranajurca.

28Chai llactamanga, yana tutatami cachamurca.

Dios rimashca shimitaca napacha cazunajurcachu.

29Yacucunata yahuarman tigrachishpami, pijicunatapash huañuchirca.

30Chai llactapica, sapocunatami jundachirca.

Jatun mandajcunapaj huasi ucucamanmi jundagrirca.

31Dios mandajpimi chuspicunapash,

piliscunapash tucuilla llactapi fuyushna jundarca.

32Yacupaj randica, rundutami tamiachirca.

Paicunapaj llactamanga, rupajuj ninatami cachamurca.

33Uva chagracunatapash, higo yuracunatapashmi tucuchirca.

Paicunapaj llactapi quirucunataca tucuillami tucuchirca.

34Dios mandajpimi, langostacunapash

fahuashpa purij jurucunapash ninanda jundarca.

35Chai llactapica tucuilla jihuacunatami micushpa tucuchirca.

Chai llactapi fucushcacunataca, tucuillami tucuchirca.

36Chai llactapi huacharishca punda churicunatapash, tucuillami huañuchirca.

Punda charishca churicunatami huañuchirca.

37Israelcunamanga, ashtaca culquita, curita carashpami cacharca.

Israel ayllucunapica, ungüihuanga shujllapash na tiyarcachu.

38Egipto llactapi causajcunaca, Israelcuna llujshishpa rijpica ninandami cushijurca.

Paicunaca, ninanda manllashpami causanajushca carca.

39Israelcunataca, fuyuhuanmi quilparca.

Tutacunaca, ninahuanmi punchayachijurca.

40Paicuna mañajpica, codorniz angacunatami cachamurca.

Jahua pachamanda tandatami, na ushangacaman cararca.

41Jaca rumita chaupijpimi, yacucunapash llujshirca.

Chaquishca pambacunatami, jatun yacushna calparca.

42Diosca, Pai ari nishcatami yarirca.

Paipajta ruraj Abrahamman ari nishcatami yarirca.

43Israelcunataca, ninan cushijuihuanmi llujchirca.

Pai agllashcacunataca, ninan cushijuihuanmi llujchirca.

44Shuj llacta alpacunatami cararca.

Shuj gentecuna tarpushcatami cararca.

45pactachinajuchun cushca shimicunata,

mandashca shimicunata cazuchunmi curca.

Aleluya.