1 JUAN 2 - Quichua Imbabura 2016

Cristomi ñucanchimandaca, Taita Dioshuan rimajun

1Ñuca huahuacunalla, ama ashtahuan juchata rurashpa causanajuchunmi caitaca quilcamuni. Maijambash pandarishpa juchata rurashpaca, ñucanchimanda Taita Dioshuan rimaj, tucuita pactachij Jesucristotami charinchi.

2Paica, na ñucanchi juchacunatalla anchuchingapa huañurcachu, ashtahuangarin, cai pachapi tucuicunapaj juchacunatapash anchuchingapami huañurca.

3Dios mandashca shimicunata cazushpallami, Diosta ñucanchi rijsishcataca yachai ushanchi.

4Maijan cashpapash: “Ñucami Taita Diostaca rijsini” nijushpaca, Dios mandashca shimicunata na cazushpami, llullashpa chashna nijun. Shina cashpami, paica llullapacha cashcata ricuchijun.

5Ashtahuangarin, Diospaj Shimita cazushpa causajcunaca, Taita Diospaj juyaitami ashtahuan alipacha pactachinajun. Chashna cashpami Dioshuan shujlla cashcataca yachanchi.

6“Dioshuan shujlla tucushcami cani” nijushpaca, Jesucristo causashcashna causachun ninimi.

Mushujta mandashcamanda

7Juyashca crijcuna, shuj mushuj mandashcataca na quilcajunichu. Ashtahuangarin, callarimandapacha charishca, ñaupa mandashca shimicunatami quilcajuni. Cai ñaupa mandashca shimicunatami, cangunaca callarimandapacha ña uyashpa causashcanguichi.

8Shina cajpipash cunanga, na llullashpa rimashca Shimicuna Jesuspipash, cangunapipash causajujpimi, shuj mushuj mandashcata quilcani. Na llullashpa punchayachijuj micha punchayachijpimi, yana tutapishna causanaca tucurijun.

9“Ña michapimi causajuni” nijushpapash, shuj crijta na ricunayachijushpaca, tutapillatami causajun.

10Maijan cashpapash, shuj crijta juyashpallami michapi causajun. Shina cashpami, paica na juchapi urmanga.

11Ashtahuangarin, shuj crijta na ricunayachishpaca yanapillata purijushpami, yanapillata causajun. Yanapillata causajushpami, ñavipash ñausayashca cashpa, maiman rijurijtapash na yachashpallata purijun.

12Juyashca huahuacuna, cangunapaj juchacunataca, Jesucristopaj shutipi perdonashca cajpimi, caicunataca quilcamuni.

13Causaita causajuj Diosta rijsijpimi, tucuilla taitacunaman quilcamuni. Shinallata, na alita rurachij diablota mishashca cajpimi, chairalla viñaicunamambash quilcamuni. Taita Diosta rijsishca cajpimi, can huahuacunamambash quilcamuni.

14Causaita causajuj Diosta rijsijpimi, tucuilla taitacunaman quilcarcani. Alipacha crishpa, Diospaj Shimitapash shungupi alichishpa, diablota mishashca cajpimi, chairalla viñaicunamambash quilcarcani.

15Cai pachatapash, cai pachapi ima tiyajcunatapash, na juyanachu canguichi. Pipash, cai pachata juyajushpaca, Taita Diosta juyashpa causaitaca napacha ushangachu.

16Cai pachapi tucui ima tiyajcunaca, aichapi na ali munaicuna cashpa, ricushpa na alita yuyarina cashpa, jariyana cashpapash, Taita Diosmandaca na shamunllu, ashtahuangarin cai pachamandami shamun.

17Cai pachaca, tucui ima na ali munaicunandimi tucurijun. Ashtahuangarin, Taita Dios munashcata rurajcunaca, causaitami causanga.

“Cristomi cani” nishpami shamunga

18Juyashca huahuacuna, ñamari tucurimui punllacunaca pactamujun. “Ñucami Cristo cani nishpa” llullashpa villangapa shamungami nijtaca ñami uyarcanguichi. Chashna nishcashnami ashtacacuna llullashpa villanajun. Chashna cajpimi tucurimui punllacuna chayamushcataca ña yachanchi.

19Paicunaca, napacha ñucanchipura cashpami, ñucanchimandaca llujshirca. Ñucanchipura cashpaca, ñucanchihuanllata catinajunmanmi carca. Ashtahuangarin, na tucuilla ñucanchipura cashcata ricuchingapami chashna llujshirca.

20Ashtahuangarin, jucha illaj Diospaj Espirituta chasquishca cashpami, cangunaca tucuita yachai ushanguichi.

21Na llullashpa villajuj Shimita, canguna na yachashcamandaca na quilcanichu. Ashtahuangarin, yachajpipashmi quilcani. Na llullashpa villajuj shimimandaca, ima llullapash na llujshinllu.

22¿Pita llullapacha canga? “Jesusca, na Cristochu” nishpa villajmari llullapacha canga. “Taitapash, Churipash” na tiyanllu nishpa villajmi, llulla Cristo canga.

23Maijan cashpapash, Diospaj Churita na crishpaca, Taita Diostapash na crinllu. Diospaj Churi Jesusmanda villajushpallami, Taita Diostaca shungupi charin.

24Canguna, crishpa callarimandapacha, imata villajta uyashcataca, cangunapaj shungupimi alichina canguichi. Callarimandapacha, imata uyashcatapash shungupi alichishca cashpaca, Taita Dioshuambash, Paipaj Churihuambash shujlla tucushcami canguichi.

25Cristoca causaita causagrinata, “carashapachami” nijurcami.

26Llullashpa villajcuna purinajujpimi, caicunataca quilcamuni.

27Ashtahuangarin, jucha illaj Diospaj Espirituta chasquijpimi, cangunapaj shungupi causajun. Shina cashpami, maijan yachachinajuchumbash na shuyanguichi. Diospaj Espiritullami, na llullashpa, tucuita aliguta yachachijun. Pai yachachijushcashna cazushpallami, Cristohuan shujlla tucushpa causanajunguichi.

28Cunanga juyashca huahuacuna, cangunaca Cristopajllami causana canguichi. Shina causanajushpami Pai tigramujpica, Paipaj ñaupajmandaca na pingai tucushpa anchuringuichi.

29Cristoca, alitalla ruraj cashcataca yachanguichimi. Shinallata, alitalla rurajcunallami, Diospajlla huahuacuna tucushca. Chaitapash yachanami canguichi.