PROVERBIOS 22 - Quichua Imbabura 2016

1Alicachi tucunaca, ninan charij canatapash ashtahuan yali alimi.

Tucuicuna rijsishca canaca, culquitapash, curitapash ashtahuan yali alimi.

2Charij runatapash, huajcha runatapash,

Mandaj Diosllatami ishcandita rurashca.

3Ali yuyaita charij runaca, ima llaqui japinata yachashpaca anchurinllami.

Ashtahuangarin na yachajushca runaca, yangata rishpa llaquichi tucunllami.

4Mandaj Diosta manllashpa, na jariyashpa causashpaca,

charijyanatapash, alicachi tucunatapash, causaitapashmi chasquinga.

5Na alita ruraj runaca, cashashna, huañuchina tugllashnami.

Paipaj causaita llaquishpaca, chai runamanda caruyanami.

6Huahuacunataca, ali causachunmi yachachina cangui.

Shina yachachijpica, rucuyashpapash napacha cungangachu.

7Huajcha runaca, charij runapajta rurashpami causanga.

Culquita mañaj runaca, culquita mañachij runapajta rurashpami causanga.

8Ima na alita rurashpapash, chai llaquitallatami japinga.

Yapata jariyashpa mandajushca vara caspipash, faquiringami.

9Llaquishpa imagutapash caraj runaca, bendiciai tucungami.

Huajchacunaman micunata carashcamandami, chashna japinga.

10Na cazushpa asij runata llujchishpa cachajpica, fiñanajuicunaca tucuringallami.

Shinallata, fiñanajushpa macanajuipash tucuringallami.

11Shungupi mapa illaj causanta munaj runataca,

pai ali yuyaita charishcamandami, jatun mandajca alicachinga.

12Ali yachajushca canataca, Mandaj Diosmi caramun.

Ashtahuangarin, yachashpata na cazuj runacunapaj yuyaitaca, tucuchingami.

13Imata rurangapapash na munaj runaca:

“Leonmari canllapi, chapajun, ñambi huañuchi tucushamari” nijunmi.

14Na ali huarmi rimashca shimicunaca, ucu ucuta allashca utujushnami.

Mandaj Diosta na cazuj runaca, chaipimi urmanga.

15Chairalla viñai huambrapaj shungupica, na cazuna yuyailla jundami.

Ashtahuangarin, vara caspihuan astishpa yachachijpimi, chai yuyaicunaca anchuringa.

16Huajchacunata shuhuashpa, ashtahuan charij tucujpash,

charijcunamanra imatapash carashpa causajca, imapash illajmi saquiringa.

Shinllita tacurishpa mandashcamanda

17Alipacha yachajushcacuna yachachishcataca, aligutami uyana cangui.

Ñuca yachachishca ali yuyaitapash, tucui shunguhuan pactachishpami causana cangui.

18Cai shimicunata cambaj shungupi alichijpica, ali juyaillami canga.

Chaicunata yarishpa rimashpaca, ashtahuan alimi canga.

19Cai shimicunataca, Mandaj Diosta yariashpa causachunmi,

cunanga canman yachachijuni.

20Ali yuyaita cushpapash, aliguta yachajuchumbash,

¿nachu quimsacaman quilcarcani?

21Na llullashpa villaj, cai shimicunata, chashnapacha cajta can yachashpa,

canda cachamujcunaman apashpa tigrachun

¿nachu cai shimicunataca quilcarcani?

22Huajchacunataca, imagutapash na charijpimi na shuhuana cangui.

Llaquilla causaj runataca, pueblo pungupi mandajcunaman pushashpallapash, ama llaquichinguichu.

23Mandaj Diosmi, paicunamandaca shayaringa.

Paicunata quichujcunataca, Paillatami causaita quichunga.

24Ñapash fiñarijlla runahuanga, ama tandanajunguichu.

Fiñarijlla runahuanga, ama cumba tucunguichu.

25Paicuna ruranajushcata catishpara,

tugllapi huashajunshna llaquita apanguiman.

26Shujcunapaj randi imatapash cungapa ama shayaringuichu.

Shujcuna culquita mañashcata cungapapash, ama shayaringuichu.

27Culquita na tigrachi ushajpica,

can puñuna camatapashmi quichunga.

28Cambaj alpacunapi, mujungunataca ama suchuchinguichu.

Chaicunataca, cambaj ñaupa taitacunami churarca.

29¿Imatapash ali ruranata yachaj runata ricushcanguichu?

Paica, jatun mandajcunapajta rurashpami causanga.

Yangalla runacunapajta rurashpaca na causangachu.